Evangeli Ya Mateo

15 Vhafarisei na vhamaṅwalo+ vha ḓa kha Yesu vha tshi bva Yerusalema vha amba nae vha ri: 2 “Ndi ngani vhafunziwa vhau vha sa tevhedzi sialala ḽa vhomakhulukuku washu? A vha ṱambi* zwanḓa musi vha tshi ḽa.”+

3 A vha fhindula a ri: “Ndi ngani ni tshi pfuka mulayo wa Mudzimu na tevhela masialala aṋu?+ 4 Mudzimu o ri, ‘Hulisa khotsi au na mme au,’+ a dovha a ri, ‘A semaho khotsi awe kana mme awe nga a vhulawe.’+ 5 Fhedzi inwi ni ri, ‘Ane a amba na khotsi awe kana mme awe a ri: “Zwe nda vha ndi tshi nga u thusa ngazwo ndi tshifhiwa tshine tsha tea u ṋewa Mudzimu,”+ 6 inwi ni ri onoyo ho ngo fanela u thusa khotsi awe.’ No ita uri ipfi ḽa Mudzimu ḽi si vhe ḽa ndeme nga nṱhani ha masialala aṋu.+ 7 Inwi vha re na muhoyo, Yesaya o porofita zwone nga ha inwi musi a tshi ri:+ 8 ‘Havha vhathu vha nkhulisa nga milomo yavho, ngeno mbilu dzavho dzi kule na nṋe. 9 U ngwadamela havho ndi ha mahandana, ngauri vha funza milayo ya vhathu.’”+ 10 A vhudza vhathu uri vha sendele, a ri: “Thetshelesani uri ni pfesese:+ 11 Muthu u tshikafhadziwa nga zwine zwa bva mulomoni wawe, hu si nga zwine zwa dzhena mulomoni wawe.”+

12 Vhafunziwa vhawe vha ḓa vha amba nae vha ri: “Naa u a zwi ḓivha uri zwe wa zwi amba zwo khukhulisa Vhafarisei?”+ 13 A vha fhindula a ri: “Zwimela zwoṱhe zwi songo ṱavhiwaho nga Khotsi anga wa ṱaḓulu zwi ḓo tupulwa. 14 Vha litsheni. Vha sumbedza vhaṅwe nḓila ngeno na vhone vha sa vhoni. Arali muthu a sa vhoni a tshi sumbedza muṅwe muthu a sa vhoni nḓila, vha ḓo wela mulindini vhoṱhe.”+ 15 Petro a ri: “Ri ṱalutshedze zwine tshifanyiso tsha amba zwone.” 16 Yesu a ri: “Naa na inwi a ni athu u zwi pfesesa?+ 17 Naa a ni zwi ḓivhi uri tshi dzhenaho mulomoni tshi fhira nga thumbuni, tsha kona u bva? 18 Naho zwo ralo, zwi bvaho mulomoni zwi bva mbiluni, ndi zwone zwine zwa tshikafhadza muthu.+ 19 Ngauri mbiluni hu bva mihumbulo mivhi:+ u vhulaya, vhupombwe, u ḓifara luvhi nga zwa vhudzekani,* vhuvhava, mazwifhi na maṱamba. 20 Hezwi ndi zwone zwine zwa tshikafhadza muthu; fhedzi u ḽa u songo ṱamba* zwanḓa a zwi tshikafhadzi muthu.”

21 Yesu a ṱuwa henefho a ya dzinguni ḽa Tiro na ḽa Sidoni.+ 22 Ha ḓa muṅwe mufumakadzi a bvaho dzinguni ḽa Fenikia a tshi vhidzelela a tshi ri: “Murena, Murwa wa Davida, nkhathutshele. Ṅwananyana wanga u khou tambudzwa nga dimoni.”+ 23 Fhedzi Yesu a fhumula. Vhafunziwa vhawe vha amba nae vha ri: “Mu vhudze a ṱuwe ngauri u khou sokou ri tevhela a tshi khou lila.” 24 Yesu a fhindula a ri: “Ndo rumiwa kha nngu dzo xelaho dza vha nnḓu ya Isiraele fhedzi.”+ 25 Mufumakadzi a ḓa a mu losha* a ri: “Murena, nthuse!” 26 Yesu a ri: “Zwo khakhea u dzhia zwiḽiwa* zwa vhana zwa ṋewa zwibwanana.” 27 Mufumakadzi a ri: “Murena u khou amba zwone, fhedzi na zwibwanana zwi a ḽa matshakatshaka ane a wela fhasi a tshi bva ṱafulani ḽa vhaṋe vhazwo.”+ 28 Yesu a mu fhindula a ri: “Iwe mufumakadzi, u na lutendo luhulu, zwine wa zwi tama nga zwi itee.” Ṅwananyana wawe a fhola nga tshenetsho tshifhinga.

29 Yesu a ṱuwa henefho a ya tsini na Lwanzhe lwa Galilea,+ a gonya thavha a dzula henefho. 30 Vhathu vhanzhi vha ḓa khae, vhe na vho holefhalaho, vho huvhalaho, vha sa vhoni, vha sa koni u amba na vhaṅwe vhalwadze vhanzhi, vha vha vhea tsini na milenzhe yawe, a vha fhodza.+ 31 Vhathu vha mangala musi vha tshi vhona vha sa koni u amba vha tshi vho amba, vho holefhalaho vha tshi vho tshimbila na vha sa vhoni vha tshi vho vhona, vha renda Mudzimu wa Isiraele.+

32 Fhedzi Yesu a vhidza vhafunziwa vhawe a ri: “Havha vhathu ndi vha pfela vhuṱungu+ ngauri ho no fhela maḓuvha mararu vhe na nṋe vha si na zwiḽiwa. A thi ṱoḓi u vha litsha vha ṱuwa vhe na nḓala, ngauri vha nga ṋoka nḓilani.”+ 33 Vhafunziwa vha amba nae vha ri: “Ri ḓo zwi wana ngafhi zwiḽiwa* zwa u fusha vhathu vhanzhi nga u rali ri kule na miḓi?”+ 34 Yesu a vha vhudzisa a ri: “Ni na ḽofo nngana?” Vha ri: “Ri na ḽofo dza sumbe na khovhenyana dzi si gathi.” 35 Musi o no vhudza vhathu uri vha dzule fhasi, 36 a dzhia ḽofo dza sumbe na khovhe, musi o no rabela, a zwi ṅwatekanya a zwi ṋea vhafunziwa vhawe, vhafunziwa vha zwi ṋea vhathu.+ 37 Vhoṱhe vha ḽa vha fura, matshakatshaka e vha a kuvhanganya a ḓadza mimanngi mihulu ya sumbe.+ 38 Vho ḽaho ndi vhanna vha 4 000, hu sa vhalwi vhafumakadzi na vhana vhaṱuku. 39 Musi o no litsha vhathu vha tshi ṱuwa, a ṋamela tshikepe a ya dzinguni ḽa Magadala.+