Vhurifhi Ha U Thoma Ha Petro

5 Samusi na nṋe ndi muhulwane u fana na inwi, ndi tshi ḓo wana na vhaṅwe vhugala vhune ha ḓo dzumbululwa.+ Ndo vhona Kristo a tshi tambula, ndi humbela* vhahulwane vha re vhukati haṋu hezwi: 2 Lisani sambi ḽa Mudzimu+ ḽe a ni kumedzela ḽone, ni shume sa vhane vha ḽi ṱhogomela, ni zwi ite nga u ḓifunela, hu si nga u tou kombetshedzwa;+ ni zwi ite nga mbilu yoṱhe, ni sa zwi iteli u ḓivhuyedza;+ 3 ni sa vhusi vha re ifa ḽa Mudzimu,+ fhedzi ni vhe tsumbo kha sambi.+ 4 Musi mulisa muhulwane+ a tshi vhonala, ni ḓo wana khare ya vhugala i sa ṱahali.+

5 Na inwi vhanna vhaṱuku, ni ḓiṱukufhadze kha vhanna vhahulwane.+ Fhedzi noṱhe ni ḓiṱukufhadze musi ni tshi shumisana, ngauri Mudzimu u lwa na vhane vha ḓihudza, fhedzi u ṋea vhuthu vhuhulu vhane vha ḓiṱukufhadza.+

6 Ngauralo, ḓiṱukufhadzeni nga fhasi ha tshanḓa tsha maanḓa tsha Mudzimu, uri a ni hulise nga tshifhinga tsho teaho.+ 7 Ni mu kumedzele mbilaelo dzaṋu dzoṱhe,+ ngauri u na ndavha na inwi.+ 8 Dzulani no dzivhuluwa, no fhaṱuwa.+ Swina ḽaṋu Diabolo u mona-mona sa ndau i vhombaho, a tshi ṱoḓa ane a nga mu mila.+ 9 Fhedzi ilwani nae,+ no khwaṱha lutendoni, ni tshi ḓivha uri vhahaṋu vhoṱhe vha khou tambula u fana na inwi shangoni ḽoṱhe.+ 10 Musi no no tambula lwa tshifhinganyana, Mudzimu wa vhuthu vhuhulu hoṱhe, we a ni vhidzela vhugalani hawe vhu sa fheli+ samusi ni na vhuthihi na Kristo, u ḓo ni gudisa nga ho fhelelaho, u ḓo ni khwaṱhisa,+ a ita uri ni dzule ni tshi fhulufhedzea,+ a ita uri ni ime no khwaṱha. 11 Maanḓa ndi awe lini na lini. Amen.

12 Silvano*+ ane nda mu dzhia sa wahashu a fhulufhedzeaho, o nthusa u ni ṅwalela honovhu vhurifhi vhupfufhi, uri ndi ni ṱuṱuwedze na u ni khwaṱhisedza uri vhuthu vhuhulu ha Mudzimu ndi ha ngoho. Imani no khwaṱha khaho. 13 Marko+ murwa wanga na mufumakadzi* a re Babele, o nangiwaho u fana na inwi, vha a ni lumelisa. 14 Sumbedzani uri ni a funana nga u lumelisana nga khisi.*

Ngavhe inwi noṱhe ni re na vhuthihi na Kristo ni tshi vha na mulalo.