Nzumbululo I Yaho Kha Yohane
21 Nda vhona ḽiṱaḓulu ḽiswa na ḽifhasi ḽiswa;+ ngauri ḽiṱaḓulu ḽa kale na ḽifhasi ḽa kale zwo lovha+ na lwanzhe+ a lu tsheeho. 2 Nda vhona muḓi mukhethwa, muḓi Muswa wa Yerusalema, u tshi tsa u tshi bva ṱaḓulu kha Mudzimu,+ wo lugiselelwa sa muselwa o nakiselwaho munna wawe.+ 3 Nda pfa ipfi ḽihulu ḽi bvaho kha khuluṋoni ḽi tshi ri: “Dennde ḽa Mudzimu ḽi vhukati ha vhathu, u ḓo dzula navho, vha vha vhathu vhawe. Mudzimu a vha navho.+ 4 U ḓo phumula miṱodzi yoṱhe maṱoni avho,+ lufu a lu tsha ḓo vha hone,+ u ṱungufhala, u lila na vhuṱungu a zwi tsha ḓo vha hone.+ Zwithu zwa kale zwo fhela.”
5 O dzulaho kha khuluṋoni+ a ri: “Zwoṱhe ndi zwi ita zwiswa.”+ A dovha a ri: “Ṅwala, ngauri haya maipfi ndi ngoho, ni nga a fhulufhela.” 6 A amba na nṋe a ri: “Zwo itea! Ndi nṋe Alfa na Omega,* mathomo na magumo.+ A re na ḓora ndi ḓo mu ṋea maḓi a vhutshilo a bvaho tshisimani nga mahala.+ 7 Ane a kunda u ḓo wana* zwenezwo. Ndi ḓo vha Mudzimu wawe, a vha murwa wanga. 8 Fhedzi magoswi, vha si na lutendo,+ vha nengisaho nga tshika dzavho, vhavhulayi,+ vhane vha ḓifara luvhi nga zwa vhudzekani,*+ vhane vha ita zwa vhungome, vhane vha gwadamela midzimu ya zwifanyiso na vhane vha zwifha,+ vha ḓo poswa dzivhani ḽi dugaho mulilo na tsevhela.+ Zwenezwi zwi amba lufu lwa vhuvhili.”+
9 Ha ḓa muṅwe wa vharuṅwa vha sumbe vhe vha vha vho fara zwigoḓelo zwa sumbe, zwo ḓalaho ṱhamu dza sumbe dza u fhedzisela,+ a amba na nṋe a ri: “Iḓa, ndi u sumbedze muselwa ane a ḓo vha mufumakadzi wa Ngwana.”+ 10 A nkhwala a nnyisa thavhani ndapfu a tshi shumisa muya mukhethwa, a ntsumbedza muḓi mukhethwa wa Yerusalema u tshi tsa u tshi bva ṱaḓulu kha Mudzimu+ 11 u na vhugala ha Mudzimu.+ U tshi penya sa tombo ḽa mutengo muhulu, sa tombo ḽa yasipere ḽi penyaho vhukuma.+ 12 Wo vha u na luvhondo luhulu na khoro dza 12, henefho khoroni hu na vharuṅwa vha 12, ho ṅwaliwa madzina a tshaka dza 12 dza vharwa vha Isiraele. 13 Vhubvaḓuvha ho vha hu na khoro tharu, devhula hu na khoro tharu, tshipembe hu na khoro tharu, na vhukovhela hu na khoro tharu.+ 14 Mutheo wa luvhondo lwa wonoyo muḓi wo vha u na matombo a 12, kha eneo matombo hu na madzina a vhaapostola vha Ngwana vha 12.+
15 We a vha a tshi khou amba na nṋe o vha o fara luṱanga lwa musuku lwa u kala, uri a kale muḓi na khoro dzawo na mbondo dzawo.+ 16 Wonoyo muḓi wo vha u tshi lingana thungo dzoṱhe, vhulapfu hawo vhu tshi eḓana na vhuphara hawo. A kala wonoyo muḓi nga luṱanga, a wana vhulapfu na vhuphara hawo na u ya nṱha zwi stadia dza 12 000;* ngauri zwoṱhe zwi a lingana. 17 A kala na luvhondo lwawo, lwa vha khubithi dza 144,* muruṅwa o kala nga nḓila ine vhathu vha kala ngayo. 18 Luvhondo lwo fhaṱwa nga matombo a yasipere,+ muḓi wo fhaṱwa nga musuku vhukuma u ngaho ngilasi i vhonadzaho. 19 Mitheo ya luvhondo lwa muḓi yo vha yo khavhiswa nga matombo a mutengo muhulu a mifuda yoṱhe: mutheo wa u thoma wo vha u wa yasipere, wa vhuvhili u wa safire, wa vhuraru u wa khalisidoni, wa vhuṋa u wa emeralidi, 20 wa vhuṱanu u wa saradonekisi, wa vhurathi u wa sadiasi, wa vhusumbe u wa khirisoḽaithi, wa vhumalo u wa berili, wa vhuṱahe u wa thophasi, wa vhufumi u wa khirisporasi, wa vhu 11 u wa haisenthe, wa vhu 12 u wa amethisi. 21 Zwiṅwe hafhu, khoro dza 12 dzo vha dzo itwa nga vhulungu ha 12; khoro iṅwe na iṅwe yo vha yo itwa nga vhulungu vhuthihi. Nḓila khulu ya muḓi yo vha yo itwa nga musuku vhukuma u ngaho ngilasi i vhonadzaho.
22 A tho ngo vhona thembele kha wonoyo muḓi ngauri thembele yawo ndi Yehova* Mudzimu Ramaanḓaoṱhe+ na Ngwana. 23 Wonoyo muḓi a u ṱoḓi u vhonetshelwa nga ḓuvha kana ṅwedzi ngauri u vhonetshelwa nga vhugala ha Mudzimu,+ luvhone lwawo lwo vha lu Ngwana.+ 24 Tshaka dzi ḓo tshimbila tshedzani tshawo,+ mahosi a ḽifhasi a ḓo ḓisa vhugala hao khawo. 25 Khoro dzawo dzi ḓo dzula dzo vulea ḓuvha ḽoṱhe ngauri a ḽi nga kovheli.+ 26 Vhugala na khuliso zwa dzitshaka zwi ḓo ḓiswa kha wonoyo muḓi.+ 27 Fhedzi zwi re na tshika na ane a ita zwi nengisaho na zwa vhufhura, ha nga dzheni khawo;+ hu ḓo dzhena fhedzi vho ṅwaliwaho kha mupombo wa vhutshilo wa Ngwana.+