Vhurifhi Ha U Thoma Vhu Yaho Kha Vhakorinta
3 Vhahashu, ndo amba na inwi sa vhane vha livhiswa nga shango, sa vhane vha kha ḓi vha vhana+ kha Kristo, hu si sa vhane vha livhiswa nga muya wa Mudzimu.+ 2 Ndo ni ṋea mafhi uri ni nwe, hu si zwiḽiwa zwo dziaho, ngauri no vha ni sa athu u vha na maanḓa. Na zwino a ni athu u vha na maanḓa,+ 3 ni kha ḓi vha vhathu vha ṋama.+ Samusi ni tshi kha ḓi vha na vivho, ni tshi lwa nga tshaṋu, naa a ni vhathu vha ṋama+ vhane vha tshimbila sa vhathu vha shango? 4 Ngauri musi muṅwe a tshi ri, “Nṋe ndi wa Paulo,” muṅwe a ri, “Nṋe ndi wa Apolo,”+ naa a ni fani na vhathu vha shango?
5 Apolo ndi nnyi? Paulo ndi nnyi? Ri vhalanda+ vhane vha ita mushumo we Murena a ri ṋea wone, wa u ni thusa uri ni vhe vhatendi. 6 Nṋe ndo ṱavha,+ Apolo a sheledza,+ fhedzi Mudzimu ndi ene a itaho uri zwi hule, 7 o ṱavhaho na o sheledzaho a vha tshithu, fhedzi ane a khoḓwa ndi Mudzimu a itaho uri zwi hule.+ 8 A ṱavhaho na a sheledzaho vha ita mushumo u fanaho,* fhedzi vha ḓo wana malamba u ya nga zwe vha zwi shuma.+ 9 Ri vhashumisani na Mudzimu. Inwi ni tsimu ya Mudzimu ine ya khou limiwa, ni tshifhaṱo tsha Mudzimu.+
10 Ndo adza mutheo+ sa mufhaṱi makone, ngauri Mudzimu o ntsumbedza vhuthu vhuhulu. Fhedzi muṅwe u khou fhaṱa kha wonoyu mutheo. Muṅwe na muṅwe a dzule a tshi sedza nḓila ine a khou fhaṱa ngayo. 11 Ngauri a hu na ane a nga adza muṅwe mutheo nga nnḓa ha wo adzwaho, une wa vha Yesu Kristo.+ 12 Arali na fhaṱa kha wonoyo mutheo nga musuku, siḽiva, matombo a mutengo muhulu, thanda, hatsi kana maṱanga, 13 mushumo waṋu u ḓo vhonala musi ḓuvha ḽa u lingwa ḽi tshi swika, nga ḽeneḽo ḓuvha mulilo+ u ḓo dzumbulula mushumo waṋu. 14 Arali zwe muthu a fhaṱa zwa sa swa, u ḓo wana malamba; 15 arali zwa swa, u ḓo vha o xelelwa, fhedzi ene u ḓo tshidzwa; zwa nga o tou tshidzwa muliloni.
16 Naa a ni zwi ḓivhi uri ni thembele ya Mudzimu,+ na uri muya wa Mudzimu u kha inwi?+ 17 Mudzimu u ḓo fhelisa ane a tshinya thembele yawe; ngauri thembele ya Mudzimu ndi khethwa, inwi ni yeneyo thembele.+
18 Ni songo ḓifhura: Ane a humbula uri o ṱalifha kha ḽino shango,* nga a vhe tsilu, uri a ṱalifhe. 19 Ngauri vhuṱali ha ḽino shango ndi vhutsilu kha Mudzimu; ndi ngazwo ho ṅwaliwa u pfi: “U fasha vhaṱali vhe kha vhukwila havho.”+ 20 Ho dovha ha ṅwaliwa u pfi: “Yehova* u a ḓivha uri zwine vhaṱali vha zwi elekanya ndi mahandana.”+ 21 Ni songo zuwa nga zwine vhathu vha zwi ita; ngauri zwithu zwoṱhe ndi zwaṋu, 22 hu Paulo, Apolo, Kefa,*+ shango, vhutshilo, lufu, zwithu zwi re hone zwino kana zwi ḓaho, zwoṱhe ndi zwaṋu; 23 inwi ni vha Kristo;+ Kristo ndi wa Mudzimu.