Nzumbululo I Yaho Kha Yohane
2 “Ṅwalela muruṅwa+ wa tshivhidzo tsha Efesa+ uri: O faraho ṋaledzi dza sumbe tshanḓani tshawe tsha u ḽa, ane a tshimbila vhukati ha zwiṱomambone zwa sumbe zwa musuku u ri:+ 2 ‘Ndi a ḓivha zwe wa ita, zwe wa shuma na zwe wa konḓelela na uri a u ṱanganedzi vhavhi, u linga vhane vha ḓiita vhaapostola, vhe si vhaapostola,+ wa wana uri vha a zwifha. 3 Naho wo konḓelela zwithu zwinzhi u tshi itela dzina ḽanga,+ wo bvela phanḓa u tshi zwi ita u sa neti.+ 4 Naho zwo ralo, ndi u kaidzela uri a u tshee na lufuno lwe wa vha u nalwo u thomani.
5 “‘Humbula zwe wa xelelwa ngazwo, u rembuluwe+ u ite mishumo ye wa i ita u thomani. Wa sa rembuluwa,+ ndi ḓo u ḓela, nda bvisa tshiṱomambone+ tshau vhudzuloni hatsho. 6 Fhedzi zwi takadzaho ndi uri u vhenga zwine zwa itwa nga tshigwada tsha Nikolao,+ zwine na nṋe nda zwi vhenga. 7 A re na nḓevhe nga a pfe zwine muya mukhethwa wa vhudza zwivhidzo:+ Ane a kunda+ ndi ḓo tenda a tshi ḽa mutshelo wa muri wa vhutshilo,+ u re pharadisoni ya Mudzimu.’
8 “Ṅwalela muruṅwa wa tshivhidzo tsha Simirina uri: ‘Wa u Thoma na wa u Fhedza’+ we a fa, a dovha a tshila,+ u ri: 9 ‘Ndi ḓivha maṱungu au na vhushai hau, fhedzi wo pfuma.+ Ndi ḓivha na vhane vha u sema vha amba uri vha Vhayuda, ngeno vhe si Vhayuda. Vhenevho ndi sinagogo ya Saṱhane.+ 10 Hu si kale u ḓo tambudzwa, fhedzi u songo ofha.+ Diabolo u ḓo dzula a tshi isa vhaṅwe vhaṋu dzhele uri ni lingwe nga vhuḓalo, ni ḓo tambudzwa maḓuvha a fumi. Iwe u fhulufhedzee u swika u tshi fa, ndi hone ndi tshi ḓo u ṋea khare ya vhutshilo.+ 11 A re na nḓevhe nga a pfe+ zwine muya mukhethwa wa vhudza zwivhidzo: Ane a kunda,+ lufu lwa vhuvhili a lu nga mu iti tshithu.’+
12 “Ṅwalela muruṅwa wa tshivhidzo tsha Peregamo uri: A re na banga ḽilapfu ḽi re na vhuhali, ḽa mutshea-hoṱhe,+ u ri: 13 ‘Hune wa dzula hone ndi a hu ḓivha, ndi hune khuluṋoni ya Saṱhane ya vha hone; fhedzi u dzula u tshi fhulufhedzea kha nṋe,*+ a wo ngo hanedza uri u a ntenda+ na misini ya Antipa, ṱhanzi yanga i fhulufhedzeaho,+ we a vhulawa+ ni henefho hune Saṱhane a dzula hone.
14 “‘Naho zwo ralo, hu na zwiṅwe zwine nda ṱoḓa u u kaidzela zwone. Ndi ṱoḓa u u kaidzela uri u na vhane vha tevhedza pfunzo ya Bileamu,+ we a funza Balaka+ uri a kunge Vhaisiraele uri vha ite tshivhi, vha ḽe zwiṱhavhelo zwa midzimu ya zwifanyiso na uri vha ḓifare luvhi nga zwa vhudzekani.*+ 15 Na iwe u dovha wa vha na vhane vha tevhedza pfunzo ya tshigwada tsha Nikolao.+ 16 Ngauralo, rembuluwa. Wa sa rembuluwa ndi ḓo u ḓela nga u ṱavhanya, nda lwa navho nga banga ḽilapfu ḽi bvaho mulomoni wanga.+
17 “‘A re na nḓevhe nga a pfe zwine muya mukhethwa wa vhudza zwivhidzo:+ Ane a kunda+ ndi ḓo mu ṱusela mana yo dzumbiwaho,+ nda mu ṋea tombo ḽitshena, kha ḽeneḽo tombo hu ḓo vha ho ṅwaliwa dzina ḽiswa ḽi ḓivhiwaho fhedzi nga we a ḽi ṋewa.’
18 “Ṅwalela muruṅwa wa tshivhidzo tsha Thiathira+ uri: Murwa wa Mudzimu a re na maṱo a ngaho mulilo+ na milenzhe i ngaho koporo i penyaho, u ri:+ 19 ‘Ndi a ḓivha mishumo yau, lufuno lwau, lutendo lwau, nḓila ye wa shumela ngayo Mudzimu, zwe wa zwi konḓelela na uri mishumo yau i fhira ya u thomani.
20 “‘Naho zwo ralo, ndi u kaidzela uri u ṱanganedza mufumakadzi a ngaho Isabele,+ ane a ḓiita muporofita, a funzaho vhalanda vhanga na u vha xedza uri vha ḓifare luvhi nga zwa vhudzekani*+ na uri vha ḽe zwiṱhavhelo zwa midzimu ya zwifanyiso. 21 Ndo mu ṋea tshifhinga tsha u rembuluwa, fhedzi ha ṱoḓi u rembuluwa, uri a litshe u ḓifara luvhi nga zwa vhudzekani.* 22 Hu si kale ndi ḓo ita uri a lwale vhukuma, arali vhane vha ita nae vhupombwe vha sa rembuluwa, ndi ḓo ita uri vha welwe nga maṱungu mahulu. 23 Ndi ḓo vhulaya vhana vhawe nga dwadze, uri zwivhidzo zwoṱhe zwi ḓivhe uri ndi nṋe ane a ṱolisisa mihumbulo* na mbilu, noṱhe nda ni ṋea zwo ni teaho.+
24 “‘Naho zwo ralo, kha vhoṱhe vha re Thiathira vha sa tevhedzi yeneyi pfunzo, vha sa ḓivhi pfunzo dza mazwifhi dza Saṱhane,+ ndi ri: A thi ni hwesi muṅwe muhwalo. 25 Fhedzi iwe farelela kha zwine wa vha nazwo u swika ndi tshi ḓa.+ 26 Ane a kunda na u tevhedza mishumo yanga u swika vhufheloni, ndi ḓo ita uri a vhuse dzitshaka,+ 27 u ḓo lisa vhathu nga lubaḓa lwa tsimbi,+ a vha fhelisa vha nga midzio ya vumba yo kwasheaho, samusi na nṋe ndo ṋewa maanḓa nga Khotsi anga. 28 Ndi ḓo mu ṋea ṋaledzi ya nga matsheloni.+ 29 A re na nḓevhe nga a pfe zwine muya mukhethwa wa vhudza zwivhidzo.’