Nzumbululo I Yaho Kha Yohane
1 Heyi ndi nzumbululo ye Yesu Kristo a dzumbululelwa nga Mudzimu,+ uri a sumbedze vhalanda vhawe+ zwine zwa ḓo itea hu si kale. Yesu Kristo o rumela muruṅwa wawe kha mulanda wawe Yohane+ uri a mu sumbedze zwine zwa ḓo itea* tshifhingani tshi ḓaho. 2 Yohane o ṱanziela nga ha ipfi ḽe a ṋewa nga Mudzimu na vhuṱanzi he Yesu Kristo a vhu ṋea na u ṱanziela nga ha zwoṱhe zwe a zwi vhona. 3 Hu takala ane a vhalela nṱha na vhane vha pfa maipfi a honovhu vhuporofita, na vhane vha tevhedza zwo ṅwaliwaho khaho;+ ngauri tshifhinga tsho vhewaho tshi tsini.
4 Nṋe Yohane ndi ṅwalela zwivhidzo zwa sumbe+ zwi re vunduni ḽa Asia, ndi ri:
Ngavhe ni tshi vha na vhuthu vhuhulu na mulalo zwi bvaho “kha Mudzimu we a vha e hone, a re hone na ane a khou ḓa”+ na kha mimuya ya sumbe+ i re phanḓa ha khuluṋoni yawe, 5 na zwi bvaho kha Yesu Kristo, “Ṱhanzi i Fhulufhedzeaho,”+ “ene tanzhe ḽa vho vuswaho vhafuni,”+ na “Muvhusi wa mahosi a ḽifhasi.”+
Ene we a ri funa,+ a ri vhofholola zwivhini zwashu nga malofha awe,+ 6 a ita uri ri vhe mahosi+ na vhotshifhe+ vha Mudzimu wawe a re Khotsi awe. Ngavhe a tshi vha na vhugala na maanḓa lini na lini. Amen.
7 U khou ḓa e kha makole,+ vhoṱhe vha ḓo mu vhona, na vhe vha mu ṱhavha nga pfumo; tshaka dzoṱhe dza ḽifhasi dzi ḓo lila nga nṱhani hawe.+ Amen.
8 Yehova* Mudzimu u ri: “Ndi nṋe Alfa na Omega,*+ we a vha e hone, a re hone na ane a khou ḓa. Ndi nṋe Ramaanḓaoṱhe.”+
9 Nṋe Yohane, wahaṋu, ane a khou konḓelela+ na inwi maṱungu+ na ane a ḓo vhusa na inwi+ ngauri ndi na vhuthihi na Yesu,+ ndo vha ndi tshiṱangadzimeni tsha Patimo nge nda amba nga ha Mudzimu na u amba ngoho nga ha Yesu. 10 Muya mukhethwa wo ita uri ndi vhone zwine zwa ḓo itea nga ḓuvha ḽa Murena, nda pfa ipfi ḽihulu murahu hanga ḽi ngaho phalaphala, 11 ḽi tshi ri: “U ṅwale zwine wa zwi vhona kha mupombo, u zwi rumele zwivhidzoni zwa sumbe: Efesa,+ Simirina,+ Peregamo,+ Thiathira,+ Saradesi,+ Filadelefia+ na Laodikea.”+
12 Nda rembuluwa uri ndi vhone ane a khou amba na nṋe, ndo no rembuluwa, nda vhona zwiṱomambone zwa sumbe zwa musuku,+ 13 nda vhona we a vha a tshi nga murwa muthu+ o ima vhukati hazwo, o ambara tshiambaro tshi swikaho milenzheni, khanani o vhofha labi ḽa muvhala wa musuku. 14 Zwiṅwe hafhu, mavhudzi awe o vha o tshena sa wuḽu tshena na mahaḓa, maṱo awe a tshi nga mulilo,+ 15 milenzhe yawe i tshi nga koporo+ i penyaho ṋanḓoni, ipfi ḽawe ḽi tshi nga muungo wa maḓi manzhi. 16 O vha o fara ṋaledzi dza sumbe tshanḓani tshawe tsha u ḽa,+ mulomoni wawe hu tshi khou bva banga ḽilapfu ḽa mutshea-hoṱhe,+ tshifhaṱuwo tshawe tshi tshi nga ḓuvha ḽi penyaho vhukuma.+ 17 Musi ndi tshi mu vhona, nda wela milenzheni yawe nda nga ndo fa.
A vhea tshanḓa tshawe tsha u ḽa kha nṋe, a ri: “U songo ofha. Ndi nṋe wa u Thoma+ na wa u Fhedza,+ 18 na a tshilaho,+ ndo vha ndo fa,+ fhedzi zwino ndi khou tshila lini na lini,+ ndi na khii dza lufu na dza Vhiḓa.*+ 19 Zwino ṅwala zwe wa zwi vhona, zwine zwa khou itea na zwine zwa ḓo itea. 20 Ṋaledzi dza sumbe dze wa dzi vhona tshanḓani tshanga tsha u ḽa na zwiṱomambone zwa sumbe zwa musuku ndi tshiphiri tshikhethwa. Ṋaledzi dza sumbe dzi imela vharuṅwa vha zwivhidzo zwa sumbe, zwiṱomambone zwa sumbe zwi imela zwivhidzo zwa sumbe.+