Kha Vhahevheru

11 Lutendo ndi vhuṱanzi ho khwaṱhaho ha uri zwithu zwe zwa fhulufhedziswa zwi ḓo itea,+ ndi u vha na vhuṱanzi ha uri zwithu zwi sa vhonali zwi hone. 2 Vhomakhulukuku washu vho takalelwa nga Mudzimu ngauri vho vha vhe na lwonolwo lutendo.

3 Nga lutendo ro vhona uri Mudzimu o dzudzanya zwithu zwa ṱaḓulu na zwa kha ḽifhasi,* zwine zwa amba uri o ita zwithu zwine ra kona u zwi vhona a tshi shumisa zwine ra si kone u zwi vhona.

4 Nga lutendo Abele o ṋekedza Mudzimu tshiṱhavhelo tshi fhiraho tsha Kaini,+ Mudzimu a mu dzhia sa o lugaho nga nṱhani ha lwonolwo lutendo, zwenezwo o zwi sumbedza nga u ṱanganedza tshifhiwa tshawe.+ Nga lutendo u kha ḓi amba naho o fa.+

5 Nga lutendo Henoxe+ o ṱuwiswa a si tsha vhona lufu, a si tsha waniwa ngauri Mudzimu o vha o mu ṱuwisa;+ fhedzi musi a sa athu u ṱuwiswa, o zwi ḓivha uri Mudzimu u a mu takalela. 6 Zwiṅwe hafhu, u nga si kone u takadza Mudzimu arali u si na lutendo, ngauri ane a sendela tsini nae u fanela u tenda uri u hone* na uri u lambedza vhane vha mu ṱoḓa zwi tshi bva mbiluni.+

7 Nga lutendo musi Noaxe+ o no ṋewa tsevho i bvaho kha Mudzimu ya zwithu zwi sa athu u vhonwa,+ o sumbedza uri u a ofha Mudzimu, a fhaṱa gungwa+ uri a tshidze muṱa wawe; nga lwonolwo lutendo a sumbedza uri ḽeneḽo shango ḽi fanela u fheliswa,+ o dzhiiwa sa o lugaho nga nṱhani ha u vha na lutendo.

8 Nga lutendo Abrahamu+ o thetshelesa musi a tshi vhidzwa, a pfulutshela fhethu he Mudzimu a mu fhulufhedzisa uri u ḓo mu ṋea hone; a pfuluwa naho a sa ḓivhi hune a khou ya hone.+ 9 Nga lutendo o dzula sa mutsinda kha shango ḽe a fhulufhedziswa ḽone,+ a dzula madenndeni+ na Isaka na Yakobo, vhe navho Mudzimu a vha fhulufhedzisa u vha ṋea ḽeneḽo shango.+ 10 Ngauri o vha o lindela muḓi u re na mutheo wo khwaṱhaho, une muoli na mufhaṱi wawo a vha Mudzimu.+

11 Nga lutendo Sara o kona u beba* ṅwana* naho o vha o no kegula,*+ samusi o tenda uri We a mu fhulufhedzisa u a fhulufhedzea. 12 Ndi ngazwo Abrahamu we a vha o no kalaha+ o kona u beba vhana+ vho andaho sa ṋaledzi dza ṱaḓulu, vha sa vhalei vhunga muṱavha u re khunzi-khunzini ya lwanzhe.+

13 Vhoṱhe vho fhulufhedzea u swika vha tshi fa, naho vha songo vhona zwe zwa fhulufhedziswa zwi tshi itea;+ fhedzi vho zwi vhona zwi tshee kule,+ vha zwi ṱanganedza, vha amba uri vha vhatsinda na vhadzulapo vha tshifhinganyana kha ḽeneḽo shango. 14 Ngauri vhane vha amba nga yeneyo nḓila vha sumbedza uri vha khou ṱoḓa nga maanḓa henefho fhethu hune ha ḓo vha haya havho. 15 Arali vha dzule vha tshi humbula nga ha fhethu he vha pfuluwa hone,+ vho vha vha tshi ḓo vha vho wana nḓila ya u humela murahu. 16 Fhedzi vho vha vha tshi khou ṱoḓa fhethu ha khwine, hune ha vha ṱaḓulu. Ndi ngazwo Mudzimu a songo shona u vha Mudzimu wavho+ ngauri o vha lugiselela muḓi.+

17 Nga lutendo musi Abrahamu a tshi lingwa,+ zwo nga o ṋekedza Isaka uri a vhe tshiṱhavhelo; we a ṱanganedza zwe a fhulufhedziswa o takala, o lingedza u ṋekedza murwa wawe muthihi fhedzi* sa tshiṱhavhelo,+ 18 naho o vhudzwa uri: “Vhana* vhau vha ḓo bva kha Isaka.”+ 19 Fhedzi o vha a tshi zwi ḓivha uri Mudzimu u ḓo mu vusa vhafuni, a dovha a mu wana uri zwenezwo zwi fanyisele zwiṅwe zwithu.+

20 Nga lutendo Isaka o fhaṱutshedza Yakobo+ na Esau+ nga ha zwe zwa vha zwi tshi ḓo ḓa.

21 Nga lutendo musi Yakobo e tsini na u fa,+ o fhaṱutshedza vharwa vha Yosefa,+ a rabela o gogoḓela lubaḓa lwawe.+

22 Nga lutendo musi Yosefa e tsini na u fa, o amba nga ha u pfuluwa ha Vhaisiraele, a vha laya zwine vha fanela u ita nga marambo* awe.+

23 Nga lutendo Mushe o dzumbiwa miṅwedzi miraru nga vhabebi vhawe a kha ḓi bva u bebwa,+ ngauri vho vhona uri o naka,+ vha si ofhe zwe khosi ya amba.+ 24 Nga lutendo musi Mushe o no aluwa,+ o hana u vhidzwa murwa wa ṅwananyana wa Farao,+ 25 a nanga u tambudzwa na vhathu vha Mudzimu nṱhani ha u ḓiphiṋa nga zwivhi lwa tshifhinganyana, 26 ngauri o vhona u nyadziwa ha Kristo zwi zwa ndeme u fhira lupfumo lwa Egipita; ngauri o vha o lavhelela u ṋewa malamba. 27 Nga lutendo o pfuluwa Egipita,+ a sa ofhi mbiti dza khosi,+ ngauri o dzula a tshi konḓelela a sa fheli mbilu a tshi nga u khou vhona Ane a si vhonale.+ 28 Nga lutendo o pembelela Paseka na u shasha malofha kha miṋango, uri mutshinyadzi a si huvhadze* matanzhe avho.+

29 Nga lutendo vho pfuka Lwanzhe Lutswuku zwa tou nga vha khou kanda ho omaho,+ fhedzi Vhaegipita vho kumbiwa musi vha tshi lingedza u pfuka.+

30 Nga lutendo mbondo dza Yeriko dzo wa musi dzo moniwa maḓuvha a sumbe.+ 31 Nga lutendo Rahaba we a vha a tshi rengisa muvhili, ho ngo fheliswa na vha sa thetshelesi ngauri o ṱanganedza ṱholi nga mulalo.+

32 Ndi zwifhio zwiṅwe zwine nda nga zwi amba? Ngauri tshifhinga a tshi tsha ntendela ndi tshi amba nga ha Gidioni,+ Baraka,+ Simisoni,+ Yefeta,+ Davida,+ Samuele+ na vhaṅwe vhaporofita. 33 Nga lutendo vho kunda mivhuso,+ vha ita zwo lugaho, vha wana zwe vha fhulufhedziswa,+ vha thivha milomo ya ndau,+ 34 a vho ngo fhiswa nga mulilo,+ vho ponyoka vha tshi ṱoḓa u vhulawa nga banga,+ vha ṋewa nungo musi vha tshi shaya nungo,+ vha vha na tshivhindi nndwani,+ vha pandamedza maswole e a vha a tshi khou lwa navho.+ 35 Vhafumakadzi vho ṱanganedza vhafunwa vhavho vhe vha vha vho fa.+ Vha fhulufhedzeaho vho tambudzwa fhedzi a vho ngo litsha u fhulufhedzea kha Mudzimu, uri vha kone u vhofhololwa. Vho ita zwenezwi uri vha kone u vuswa nga nḓila yo khetheaho. 36 Vhaṅwe vho lingwa na u goḓiwa na u rwiwa, zwa tou ṋaṋa musi vha tshi vhofhiwa nga ngeḓane+ na u valelwa dzhele.+ 37 Vho kanḓwa nga matombo,+ vho lingwa, vho sahiwa nga vhukati, vho vhulawa nga banga,+ vha tshimbila vho ambara mikumba ya nngu na ya mbudzi+ musi vha tshi shaya, vhe maṱunguni,+ vha tshi farwa luvhi;+ 38 vhenevho vhavhuya vho vha vha songo fanelwa nga u vha kha ḽeneḽo shango. Vho mona-mona sogani na thavhani, vha dzumbama+ mabakoni na milindini.

39 Vhenevho vhoṱhe a vho ngo wana zwe vha fhulufhedziswa naho vha tshi ḓivha uri vha takalelwa nga Mudzimu ngauri vha na lutendo, 40 ngauri Mudzimu o vha tshi ṱoḓa u ri ṋea zwa khwine.+ O vha a tshi ṱoḓa uri vha itwe vho fhelelaho na riṋe.