Dotoronomio

10 “Nga tshenetsho tshifhinga Yehova a amba na nṋe a ri: ‘Ḓivhaḓele mbaba mbili dza matombo dzine dza nga dziḽa dza u thoma,+ u gonye u ḓe kha nṋe ngeno thavhani, u tea u ḓiitela mbulungelo* ya thanda. 2 Ndi ḓo ṅwala kha dzenedzo mbaba mafhungo e a vha e kha dziḽa dza u thoma, dze wa dzi kwasha, u fanela u dzi vhea nga ngomu ha mbulungelo.’ 3 Ngauralo, nda ita mbulungelo nga thanda dza muunga, nda vhaḓa mbaba mbili dza matombo dzi fanaho na dza u thoma nda gonya thavhani ndo fara dzenedzo mbaba mbili.+ 4 A ṅwala kha dzenedzo mbaba mafhungo ane a fana na a u thoma,+ Milayo ya Fumi,*+ ye Yehova a ni vhudza yone ngei thavhani e vhukati ha mulilo+ nga ḓuvha ḽe na vha no kuvhangana;+ nga murahu Yehova a nṋea dzone. 5 Nda rembuluwa nda tsa thavhani+ nda vhea mbaba nga ngomu ha mbulungelo ye nda vha ndo i ita, hune dza vha hone sa zwe Yehova a nndaedza.

6 “Vhaisiraele vha takuwa Beerothe Bene-yakani vha ya Mosera. Aroni a fela henefho a vhulungwa,+ murwa wawe Eliasara a thoma u shuma sa tshifhe vhudzuloni hawe.+ 7 Vha tshi takuwa henefho vha ya Gudugoda, u bva Gudugoda vha ya Yotobatha,+ shango ḽa milambwana.*

8 “Nga tshenetsho tshifhinga Yehova a nanga lushaka lwa Levi+ uri lu hwale mbulungelo ya mulanga wa Yehova,+ lu ime phanḓa ha Yehova uri lu mu shumele, na u fhaṱutshedza vhathu dzinani ḽawe,+ samusi zwo ralo u swika na ṋamusi. 9 Ndi ngazwo Levi a si na mukovhe kana ifa kha vhahawe. Yehova ndi ene ifa ḽawe, sa zwe Yehova Mudzimu wau a mu vhudza zwone.+ 10 Nṋe nda dzula thavhani sa zwe nda zwi ita u thomani, lwa maḓuvha a 40 na vhusiku hao,+ Yehova a dovha a nthetshelesa nga tshenetsho tshifhinga.+ Yehova o vha a sa ṱoḓi u ni fhelisa. 11 Yehova a amba na nṋe a ri: ‘Takuwa u ye u range phanḓa vhathu u vha lugiselele u pfuluwa, uri vha dzhene vha dzhie shango ḽe nda ana uri ndi ḓo ḽi ṋea vhomakhulukuku wavho.’+

12 “Iwe Isiraele, ndi mini zwine Yehova Mudzimu wau a khou u humbela zwone?+ Yehova Mudzimu wau u khou u humbela uri u mu ofhe,+ u tevhedze zwoṱhe zwine a u humbela,+ u mu fune, u shumele Yehova Mudzimu wau nga mbilu yau yoṱhe na nga zwoṱhe zwine wa vha zwone,+ 13 na u tevhedza ndaela na maitele a Yehova zwine nda khou u laya zwone ṋamusi uri u vhuyelwe?+ 14 Yehova Mudzimu ndi muṋe wa maṱaḓulu na zwoṱhe zwi re khao, na ḽifhasi na zwoṱhe zwi re khaḽo.+ 15 Yehova o takalela vhomakhulukuku waṋu fhedzi, a vha funa, a nanga inwi, vhana vhavho+ kha vhathu vhoṱhe, samusi zwo ralo u swika na ṋamusi. 16 Ni kunakise mbilu dzaṋu+ ni litshe u vha na swili.+ 17 Ngauri Yehova Mudzimu waṋu ndi Mudzimu a fhiraho miṅwe midzimu yoṱhe+ na Murena a fhiraho maṅwe marena oṱhe, Mudzimu muhulu wa maanḓa, a mangadzaho, a sa ṱaluli muthu+ na a sa ṱanganedzi tshanḓanguvhoni. 18 Ndi ene a haṱulelaho ṅwana a si na khotsi* na tshilikadzi,+ ane a funa mutsinda,+ a mu ṋea zwiḽiwa na zwiambaro. 19 Na inwi ni fune mutsinda, ngauri no vha ni vhatsinda shangoni ḽa Egipita.+

20 “Ni ofhe Yehova Mudzimu waṋu, ni shumele ene,+ ni mu nambatele, ni ane nga dzina ḽawe. 21 Ni rende ene.+ Ndi ene Mudzimu waṋu, we a ni itela zwenezwi zwithu zwoṱhe zwihulu na zwi mangadzaho, zwe na zwi vhona.+ 22 Vhomakhulukuku waṋu vho tsela Egipita vhe 70,+ zwino Yehova Mudzimu waṋu o ni ita uri ni vhe vhanzhi u fana na ṋaledzi dza ṱaḓulu.+