Dotoronomio
30 “Musi zwenezwi zwithu zwoṱhe zwe nda amba zwi tshi itea kha iwe, phaṱhutshedzo na samba zwe nda zwi vhea phanḓa hau,+ wa zwi humbula+ u vhukati ha tshaka dzoṱhe dzine Yehova Mudzimu wau a ḓo u balanganyela khadzo,+ 2 wa vhuyelela kha Yehova Mudzimu+ wau wa thetshelesa zwine a zwi amba u tendelana na zwoṱhe zwine nda khou u laya ṋamusi, iwe na vhana vhau, nga mbilu yau yoṱhe na nga zwoṱhe zwine wa vha zwone,+ 3 Yehova Mudzimu waṋu u ḓo ni vhuisa mathubwa au,+ a u khathutshela+ a dovha a u kuvhanganya wa bva kha vhathu vhoṱhe vhe Yehova Mudzimu wau a vha o u balanganyela khavho.+ 4 Naho arali vhathu vhau vha nga balanganywa u swika magumoni a ḽifhasi, henefho Yehova Mudzimu wau u ḓo u kuvhanganya a u vhuisa.+ 5 Yehova Mudzimu wau u ḓo u isa shangoni ḽe vhokhotsi au vha vha vha tshi dzula khaḽo, iwe u ḓo dzula khaḽo; ene u ḓo ita uri u bvelele u ande u fhira vhokhotsi au.+ 6 Yehova Mudzimu wau u ḓo kunakisa* mbilu yau khathihi na ya vhana vhau+ uri u fune Yehova Mudzimu wau nga mbilu yau yoṱhe na nga zwoṱhe zwine wa vha zwone uri u tshile.+ 7 Yehova Mudzimu wau u ḓo ḓisela enea masamba maswina au ane a u vhenga na u u tovhola.+
8 “Iwe u ḓo rembuluwa wa thetshelesa Yehova wa tevhedza ndaela dzawe dzoṱhe dzine nda khou u ṋea dzone ṋamusi. 9 Yehova Mudzimu wau u ḓo ita uri u bvelele vhukuma kha mushumo woṱhe wa zwanḓa zwau,+ u ḓo andisa vhana vhau, zwifuwo zwau na zwibveledzwa zwau zwa masimuni, ngauri Yehova u ḓo dovha a takalela u ita uri u bvelele samusi o takalela vhomakhulukuku wau.+ 10 Ngauri iwe u ḓo thetshelesa Yehova Mudzimu wau wa tevhedza ndaela dzawe na maitele o ṅwaliwaho buguni heyi ya Mulayo, iwe u ḓo vhuyelela ha Yehova Mudzimu wau nga mbilu yau yoṱhe na nga zwoṱhe zwine wa vha zwone.+
11 “Ngauri wonoyu mulayo une nda khou u ṋea wone ṋamusi a u konḓi lune wa nga kundelwa u u pfesesa kana wa kundelwa u u tevhedza.+ 12 A u ṱaḓulu lune wa ḓo ri, ‘Ndi nnyi ane a ḓo gonya ṱaḓulu a ri dzhiela wone, uri ri u pfe na u u tevhedza?’+ 13 A u ho seli ha lwanzhe lune wa ḓo ri: ‘Ndi nnyi ane a ḓo wela seli ha lwanzhe a ri dzhiela wone, uri ri u pfe na u u tevhedza?’ 14 Ngauri wonoyu mulaedza u tsini hau, u mulomoni wau na mbiluni+ yau uri u u tevhedze.+
15 “Ṋamusi ndi vhea phanḓa hau vhutshilo na zwivhuya, lufu na vhuvhi.+ 16 Arali wa thetshelesa ndaela dza Yehova Mudzimu wau dzine nda khou u ṋea dzone ṋamusi, wa funa Yehova Mudzimu wau,+ wa tshimbila nḓilani dzawe, wa tevhedza ndaela dzawe, maitele awe na mahaṱulele awe, u ḓo lalama+ wa anda, Yehova Mudzimu wau u ḓo u fhaṱutshedza shangoni ḽine ḽa ḓo vha ḽau.+
17 “Fhedzi arali mbilu yau ya ntshandukela+ u si nthetshelese, wa ungeledzwa wa gwadamela miṅwe midzimu wa i shumela,+ 18 ndi a u vhudza ṋamusi uri u ḓo fheliswa.+ A u nga lalami kha shango ḽine wa khou wela Yorodane uri ḽi vhe ḽau. 19 Ṋamusi ndi dzhia ḽiṱaḓulu na ḽifhasi uri zwi vhe ṱhanzi dzau uri ndo vhea vhutshilo na lufu phanḓa hau, phaṱhutshedzo na samba;+ u tea u nanga vhutshilo uri u tshile,+ iwe na vhaḓuhulu vhau,+ 20 nga u funa Yehova Mudzimu wau,+ nga u thetshelesa zwine a zwi amba, nga u mu nambatela+ ngauri ndi ene vhutshilo hau, u ḓo ita uri u lalame kha shango ḽe Yehova a anela u ḽi ṋea vhomakhulukuku wau, Abrahamu, Isaka na Yakobo.”+