Kha Vhahevheru
10 Mulayo u nga murunzi+ wa zwivhuya zwine zwa khou ḓa,+ fhedzi wonoyu murunzi a si zwone zwivhuya. Mulayo* na zwenezwo zwiṱhavhelo zwine zwa dzula zwi tshi ṋekedzwa ṅwaha muṅwe na muṅwe zwi nga si kone u ita uri vhane vha gwadamela Mudzimu vha vhe vho fhelelaho.+ 2 Arali zwi vhe zwo ralo, naa ho vha hu sa ḓo litshwa u ṋekedzwa zwiṱhavhelo? Vhane vha ḓisa zwiṱhavhelo* vho vha vha si tsha ḓo ḓivhona mulandu wa zwivhi ngauri vho kunakiswa luthihi nahone lwa tshoṱhe. 3 Zwo fhambanaho na zwenezwo, zwenezwi zwiṱhavhelo zwi vha humbudza ṅwaha muṅwe na muṅwe uri vha na zwivhi,+ 4 ngauri a zwi konadzei uri malofha a mboho na a mbudzi a fhelise zwivhi.
5 Musi a tshi ḓa shangoni, o ri: “‘A wo ngo ṱoḓa tshiṱhavhelo na tshifhiwa, fhedzi wo nndugiselela muvhili. 6 A wo ngo takalela zwifhiwa zwa u fhiswa na zwa u pfumelela tshivhi.’+ 7 Nda ri: ‘Iwe Mudzimu, ndo ḓa u ita zwine wa zwi funa (ho ṅwaliwa nga ha nṋe kha mupombo*).’”+ 8 Musi o no amba uri: “A wo ngo ṱoḓa kana u takalela zwifhiwa na zwiṱhavhelo na zwifhiwa zwa u fhiswa na zwa u pfumelela tshivhi.” Zwenezwo ndi zwiṱhavhelo zwine zwa ṋekedzwa u ya nga Mulayo. 9 O dovha a ri: “Ndo ḓa u ita zwine wa zwi funa.”+ O fhelisa ndugiselelo ya kale uri a kone u thoma ntswa. 10 U ya nga ‘zwine Mudzimu a zwi funa,’+ ro itwa vhakhethwa nge ha ṋekedzwa muvhili wa Yesu Kristo luthihi nahone lwa tshoṱhe.+
11 Zwiṅwe hafhu, tshifhe muṅwe na muṅwe o vha a tshi ima ḓuvha ḽiṅwe na ḽiṅwe uri a ite mushumo mukhethwa+ na u ṋekedza lunzhi zwiṱhavhelo zwi fanaho,+ zwe zwa vha zwi sa koni u fhelisa tshoṱhe zwivhi.+ 12 Fhedzi Kristo o ṋekedza tshiṱhavhelo luthihi lwa tshoṱhe a tshi itela zwivhi, a dzula thungo ya tshanḓa tsha u ḽa tsha Mudzimu,+ 13 u bva zwenezwo a lindela u swika Mudzimu a tshi ita uri a kande maswina awe.*+ 14 Musi a tshi ṋekedza tshiṱhavhelo luthihi, o ita uri vhane vha itwa vhakhethwa vha vhe vho fhelelaho+ lwa tshoṱhe. 15 Zwiṅwe hafhu, muya mukhethwa u a ri khwaṱhisedza uri: 16 “‘Wonoyu ndi mulanga une nda ḓo u vhofha navho nga murahu ha eneo maḓuvha,’ u ralo Yehova.* ‘Ndi ḓo vhea milayo yanga mbiluni dzavho, nda i ṅwala mihumbuloni yavho.’”+ 17 Wa dovha wa ri: “A thi tsha ḓo humbula zwivhi zwavho na u sa thetshelesa havho.”+ 18 Arali zwenezwi zwivhi zwo hangwelwa, a hu tsha ṱoḓea uri hu ṋekedzwe tshifhiwa tsha u pfumelela tshivhi.
19 Vhahashu, samusi ri na tshivhindi tsha* u dzhena fhethu hukhethwa+ nga malofha a Yesu, 20 o ri vulela nḓila ntswa i yaho vhutshiloni nga u pfuka khetheni ḽo thivhaho, ḽeneḽo khetheni+ ndi muvhili wawe. 21 Samusi ri na tshifhe muhulu wa nnḓu ya Mudzimu,+ 22 kha ri sendele tsini na Mudzimu nga mbilu yoṱhe, ri na lutendo lwo khwaṱhaho, mbilu dzashu dzo kunakiswa* uri dzi si vhe na luvalo luvhi+ na mivhili yashu yo ṱanzwiwa nga maḓi o kunaho.+ 23 Kha ri bvele phanḓa ri tshi ḓivhadza zwe ra zwi fhulufhela ri sa timatimi,+ ngauri we a fhulufhedzisa u a fhulufhedzea. 24 Kha ri ḓivhane khwine* uri ri kone u funana nga ho engedzeaho na u ita mishumo mivhuya,+ 25 ri songo litsha u kuvhangana nga tshashu,+ samusi vhaṅwe vha tshi ita nga u ralo, fhedzi ri ṱuṱuwedzane,+ zwihuluhulu samusi ni tshi vhona uri ḓuvha ḽi khou sendela.+
26 A hu tshee na tshiṅwe tshiṱhavhelo tsha zwivhi zwashu arali ri tshi dzula ri tshi ita tshivhi nga khole,+ ri na nḓivho yo teaho ya ngoho,+ 27 fhedzi ri ḓo lindela khaṱhulo i ofhisaho na mbiti dzi dugaho dzine dza ḓo fhelisa vhane vha pikisa.+ 28 Ane a nyadza Mulayo wa Mushe o vha tshi vhulawa a sa pfelwi vhuṱungu, arali hu na ṱhanzi mbili kana tharu.+ 29 Ni humbula uri hu ḓo pfiswa vhuṱungu lungafhani we a kandekanya Murwa wa Mudzimu, a nyadza malofha a mulanga+ e a ita uri a vhe mukhethwa na u sema muya we Mudzimu a u shumisa u sumbedza vhuthu vhuhulu?+ 30 Ngauri ri a ḓivha uri Mudzimu o ri: “Ndifhedzo ndi yanga; ndi ḓo lifhedza.” Ha dovha ha ṅwaliwa u pfi: “Yehova* u ḓo haṱula vhathu vhawe.”+ 31 Zwi a ofhisa u wela zwanḓani zwa Mudzimu a tshilaho.
32 Ni songo hangwa uri musi no no vhonetshelwa,+ no konḓelela zwithu zwinzhi naho ni tshi khou tambula. 33 Nga zwiṅwe zwifhinga no semiwa phanḓa ha vhathu na u pfiswa vhuṱungu, nga zwiṅwe zwifhinga na tikedza vho sedzanaho na yeneyo milingo. 34 Ngauri no pfela vhuṱungu vha re dzhele, na takala ni tshi dzhielwa thundu,+ ni tshi ḓivha uri ni na thundu dza khwine dzine dza ḓo dzula dzi hone.+
35 Ni songo litsha u amba nga tshivhindi, ngauri ni ḓo lambedzwa zwihulu.+ 36 Ngauri ni tea u konḓelela,+ uri musi no no ita zwine Mudzimu a zwi funa, ni wane zwe a fhulufhedzisa. 37 Ngauri ho sala “tshifhinga tshiṱuku,”+ na uri “ane a khou ḓa a swike, ha nga lengi.”+ 38 “Muvhuya u ḓo tshila ngauri u na lutendo,+ fhedzi a thi nga mu takaleli arali a humela murahu.”+ 39 Riṋe a ri vha u humela murahu ra fheliswa,+ fhedzi ri na lutendo, lune lwa ḓo ita uri ri tshile.