Vhurifhi Ha Vhuvhili Vhu Yaho Kha Vhakorinta

7 Vhafunwa, samusi ro fhulufhedziswa zwenezwi,+ kha ri ṱambe tshika dzoṱhe dza ṋama na dza muya,+ uri ri vhe vhakhethwa nga ho fhelelaho ri tshi ofha Mudzimu.

2 Ri ṱanganedzeni.+ A hu na we ra mu khakhela, a hu na we ra mu vhaisa, a hu na we ra mu fhura.+ 3 A thi khou amba zwenezwi uri ndi ni haṱule. Ngauri ndo zwi amba uri ri ni funa nga maanḓa hu sa londwi zwine zwa nga itea. 4 Ndi amba na inwi ndi sa dzumbi tshithu. Ndi zuwa zwihulu nga ha inwi. Ndo khuthadzwa zwihulu; ndo takala nga maanḓa kha vhuṱungu hashu hoṱhe.+

5 Musi ri tshi swika Makedonia,+ ro vha ro tsikeledzea, ro dzula ri tshi tambudzwa nga nḓila dzoṱhe, ri tshi pikiswa, ri tshi vhilaela. 6 Mudzimu ane a khuthadza vho tsikeledzeaho,+ o ri khuthadza nga u ḓa ha Tito; 7 hu si nga u ḓa hawe fhedzi, fhedzi na ngauri no mu khuthadza. O ri vhudza uri no nṱuvha, uri no ṱungufhala zwihulu na uri ni khou vhilaela nga ha nṋe, zwo ita uri ndi takale zwihulu.

8 Naho ndo ni ṱungufhadza nga vhurifhi hanga,+ a thi ḓisoli. Ndo vhuya nda ṱungufhala nge nda ni ṱungufhadza. Fhedzi ndi a zwi ḓivha uri ndo ni ṱungufhadza lwa tshifhinganyana. 9 Zwino ndo takala, hu si ngauri no vha no ṱungufhala, fhedzi ngauri u ṱungufhala haṋu ho ita uri ni rembuluwe. Ngauri no vha no ṱungufhala nga nḓila i takadzaho Mudzimu. Ndi ngazwo zwe ra ni vhudza zwone zwi songo ni vhaisa. 10 Ngauri ri a vhuyelwa arali ri tshi ṱungufhala nga nḓila i takadzaho Mudzimu, zwi itaho uri vhathu vha rembuluwe+ vha tshidzwe; ngeno u ṱungufhala u fana na vhathu vha shango zwi tshi isa lufuni. 11 U ṱungufhala haṋu nga nḓila i takadzaho Mudzimu zwo ita uri ni ḓiimisele u ita zwo lugaho. No sumbedza uri a ni na mulandu, no sinyuswa nga vhukhakhi he ha itwa, na ofha Mudzimu, ni tshi ṱoḓa u rembuluwa, na shumela Mudzimu nga mbilu yoṱhe na lugisa zwo khakheaho!+ No ita zwoṱhe nga nḓila yo teaho u itela u tandulula yeneyi thaidzo. 12 Ndi tshi ni ṅwalela ndo vha ndi sa khou itela we a khakha+ kana we a khakhelwa, fhedzi ndo ni ṅwalela uri ndi vhone arali ni tshi ḓo sumbedza Mudzimu uri ni ṱoḓa u ri thetshelesa. 13 Ndi ngazwo ro khuthadzwa.

Nga nnḓa ha u khuthadzwa hashu, ro dovha ra takadzwa zwihulu nga u vhona Tito o takala, ngauri no mu ṱuṱuwedza. 14 Arali ndo mu zuwela nga ha inwi, a tho ngo shoniswa nga zwe nda zwi amba; samusi zwithu zwoṱhe zwe ra ni vhudza zwi ngoho, na zwe ra zuwela Tito zwo vha zwi ngoho. 15 Zwiṅwe hafhu, nḓila ine a ni funa ngayo i a engedzea musi a tshi humbula nḓila ine na thetshelesa ngayo+ na nḓila ye na mu ṱanganedza ngayo ni tshi ofha na u tetemela. 16 Ndi a takala ngauri kha zwoṱhe zwine na zwi ita ni a nṱuṱuwedza.