Vhurifhi Ha Vhuvhili Vhu Yaho Kha Vhakorinta
11 Naho ndi tshi nga tsilu, ni nkonḓelele. Ngoho ndi ya uri ni khou nkonḓelela. 2 Ndo ni fhulufhedzisa uri ni ḓo vhingwa nga Kristo, nda ni isa khae ni musidzana.*+ Ngauri ndi na ndavha na inwi u fana na Mudzimu. 3 Fhedzi ndi a vhilaela, uri samusi ṋowa yo fhura Eva nga u mu zwifhela,+ na inwi ni nga tshinywa mihumbulo ni si tsha tevhela Kristo nga mbilu yoṱhe na u vha vho kunaho ni tshi itela ene.+ 4 Ngauri ane a ḓa a tshi huwelela nga ha muṅwe Yesu we ri si mu huwelele, kana a huwelela maṅwe mafhungo maḓifha hu si e na a ṱanganedza kana a ni livhisa nga muṅwe muya hu si we na u ṱanganedza,+ ni a mu tendela. 5 A hu na tshine tsha sumbedza uri ndi muṱuku kha vhaapostola vhaṋu vhane vha ḓiita vhavhuḓi.+ 6 Naho ndi si na vhukoni ha u amba,+ ndi na nḓivho; ro ni sumbedza zwenezwi kha zwithu zwoṱhe.
7 Kani ndo ita tshivhi nge nda takalela u ni ḓivhadza mafhungo maḓifha nga mahala na u ḓiṱukufhadza uri ni huliswe?+ 8 Ndi nga ndo fhura zwiṅwe zwivhidzo ngauri zwo nthusa ndi tshi khou shumela inwi.+ 9 Musi ndi na inwi ndo vha ndi na zwine nda zwi shaya, fhedzi a tho ngo vha muhwalo kha inwi, nṱhani hazwo vhahashu vha bvaho Makedonia vho nthusa nga zwine nda zwi shaya.+ Ndo lingedza nga nḓila dzoṱhe uri ndi si vhe muhwalo kha inwi, ndi ḓo dzula ndi tshi ita nga u ralo.+ 10 Samusi ndi tshi tevhela Kristo, a hu na tshine tsha ḓo nthivhela u zuwa+ nga ha zwenezwi madzinguni oṱhe a Axaya. 11 Ndi ngani ndi songo vha muhwalo? Kani ndi ngauri a thi ni funi? Mudzimu u a zwi ḓivha uri ndi a ni funa.
12 Hu na vhane vha zuwa vha ri vha vhaapostola u fana na riṋe. Ndi ngazwo ndi sa ḓo litsha zwine nda zwi ita+ uri vha si vhe na zwine vha zuwa ngazwo. 13 Ngauri vhathu vho raloho ndi vhaapostola vha mazwifhi, ndi vhafhuri, vha ḓiita vhaapostola vha Kristo.+ 14 A thi mangali ngauri na Saṱhane u dzula a tshi ḓiita muruṅwa wa tshedza.+ 15 Ndi ngazwo zwi sa ri mangadzi uri vhashumeli vhawe vha ita u nga vha khou ita zwo lugaho. Fhedzi zwine zwa ḓo itea khavho mafheleloni zwi ḓo ya nga mishumo yavho.+
16 Ndi dovha nda ri: Ni songo humbula u nga ndi tsilu. Arali ni tshi vhona u nga ndi tsilu, nṱanganedzeni uri na nṋe ndi zuwenyana. 17 A thi tsha amba sa ane a tevhela tsumbo ya Murena, fhedzi ndi amba sa tsilu, sa ane a ḓifhulufhela na u zuwa. 18 Samusi vhanzhi vha tshi khou zuwa nga zwithu zwa ḽino shango, na nṋe ndi ḓo zuwa. 19 Samusi ni tshi amba uri no “ṱalifha,” ndi ngani ni tshi konḓelela matsilu? 20 Ndi ralo ngauri ni konḓelela ane a ni ita phuli, ane a ni fhura, ane a ni dzhiela zwine na vha nazwo, ane a ḓihudza na ane a ni rwa tshifhaṱuwo.
21 Zwi a ri shonisa u amba nga hazwo, ngauri vhaṅwe vhaṋu vha vhona u nga a ri koni u shumisa maanḓa ashu nga nḓila yo teaho.
Fhedzi arali vhaṅwe vha tshi zuwa vha sa shoni, na nṋe ndi ḓo zuwa ndi sa shoni, naho vhaṅwe vha tshi ḓo ndzhia sa tsilu. 22 Naa ndi Vhahevheru? Na nṋe ndi Muhevheru.+ Naa ndi Vhaisiraele? Na nṋe ndi Muisiraele. Naa ndi vhana* vha Abrahamu? Na nṋe ndi ṅwana wawe.+ 23 Naa ndi vhashumeli vha Kristo? Ndi fhindula sa ane a penga, ndi a vha fhira vhoṱhe: Ndo ita mushumo munzhi,+ ndo valelwa dzhele lunzhi,+ ndo rwiwa lunzhi, ndo ṱoḓou fa lunzhi.+ 24 Ndo rwiwa ṱhamu dza 39 nga Vhayuda luṱanu lwoṱhe,+ 25 ndo rwiwa luraru nga ṱhamu,+ ndo kanḓiwa nga matombo luthihi,+ ndo kwashetshelwa nga tshikepe luraru,+ ndo fhedza vhusiku na masiari ndi lwanzheni; 26 ndo vha ndi tshi dzula ndi lwendoni, ndi khomboni milamboni, kha mavemu, kha vhathu vha lushaka lwa hashu,+ kha dziṅwe tshaka,+ miḓini,+ sogani, lwanzheni na kha vhahashu vha mazwifhi, 27 ndo shuma nga maanḓa zwi tshi konḓa, ndi tshi fhedza vhusiku vhunzhi ndi sa eḓeli,+ ndi na nḓala na ḓora,+ zwifhinga zwinzhi ndi si na zwiḽiwa,+ ndi phephoni, ndi si na zwiambaro.*
28 Nga nnḓa ha zwenezwo zwithu, ndi vhilaela ḓuvha ḽiṅwe na ḽiṅwe nga ha zwivhidzo zwoṱhe.+ 29 Ndi pfela vhuṱungu vho kuleaho nungo, ndi a sinyuwa musi muṅwe o khukhuliswa.
30 Arali nda zuwa, ndi ḓo zuwa nga zwithu zwine zwa sumbedza uri a thi na nungo. 31 Mudzimu ane a vha Khotsi a Murena Yesu, Ene o fanelwaho nga u rendwa lini na lini, u a zwi ḓivha uri a thi khou zwifha. 32 Muvhusi o vhewaho nga Khosi Areta o vha o linda muḓi wa Damaseko uri a mpfare, 33 fhedzi nda tsitswa nga fasiṱere ḽi re luvhondoni lwa wonoyo muḓi,+ ndi nga ngomu ha manngi, nda shavha.