Genesi

34 Huno Dina ṅwananyana wa Lea, we a mu bebela Yakobo,+ o vha a tshi dzulela u bva a tshi ya u ṱwa* na vhananyana vha ḽeneḽo shango.+ 2 Musi Shikeme murwa wa Hemoro wa Muhevi,+ murangaphanḓa wa ḽeneḽo shango, a tshi mu vhona, a mu fara a mu tzhipa. 3 A vha na dzangalelo ḽihulwane kha Dina, ṅwananyana wa Yakobo, a funa onoyo ṅwana, a mu ambisa.* 4 Mafheleloni Shikeme a amba na Hemoro+ khotsi awe a ri: “Mmalele uyu musidzana uri a vhe mufumakadzi wanga.”

5 Musi Yakobo a tshi pfa uri Shikeme o tshikafhadza Dina ṅwananyana wawe, vharwa vhawe vho vha vhe na masambi awe ngei pfuloni. Yakobo a si ambe tshithu u swika vha tshi vhuya. 6 Nga murahu Hemoro khotsi a Shikeme a ya a amba na Yakobo. 7 Fhedzi vharwa vha Yakobo vha zwi pfa, vha vhuya pfuloni na zwenezwo. Vho vha vho vhaisala na u sinyuwa zwihulu ngauri Shikeme o shonisa Isiraele nga u lala na ṅwananyana wa Yakobo,+ zwithu zwi songo fanelaho u itwa.+

8 Hemoro a amba navho a ri: “Shikeme murwa wanga u na dzangalelo kha ṅwananyana waṋu. Ndi khou humbela uri ni mu ṋee ene uri a vhe mufumakadzi wawe, 9 ri malelane. Ri ṋeeni vhananyana vhaṋu, inwi ni vhinge vhananyana vhashu.+ 10 Ni nga dzula na riṋe, ni nga dzhia tshipiḓa naho tshi tshifhio tsha ḽeneḽi shango. Dzulani ni ite zwa vhubindudzi khaḽo.” 11 Ngauralo, Shikeme a amba na Yakobo na khaladzi dza Dina a ri: “Ngavhe ni tshi nga ntakalela, ndi ḓo ni ṋea zwiṅwe na zwiṅwe zwine na zwi ṱoḓa. 12 Ni nga mbvisisa tshelede nnzhi ya lumalo na tshifhiwa.+ Ndo ḓiimisela u ni ṋea tshiṅwe na tshiṅwe tshine na ḓo tshi ṱoḓa kha nṋe. Nṋeeni zwaṋu ṅwana waṋu uri a vhe mufumakadzi wanga.”

13 Vharwa vha Yakobo vha fhura Shikeme na Hemoro khotsi awe ngauri Shikeme o vha o tshikafhadza Dina khaladzi avho. 14 Vharwa vha Yakobo vha amba navho vha ri: “Zwi nga si konadzee uri ri ite zwithu zwo raloho, ra ṋea khaladzi ashu shuvhuru,+ ngauri zwenezwo zwi ḓo ri shonisa. 15 Ri nga ni tendela fhedzi arali na nga riṋe na fumbisa vhanna vhahaṋu vhoṱhe.+ 16 Ndi hone ni tshi ḓo vhinga vhananyana vhashu, riṋe ra vhinga vhananyana vhaṋu, ri ḓo dzula na inwi ra vha vhathihi. 17 Fhedzi arali na sa ri thetshelesa na fumba, ri ḓo dzhia ṅwananyana washu ra ṱuwa.”

18 Zwe vha zwi amba zwa takadza Hemoro+ na Shikeme murwa wa Hemoro.+ 19 Onoyo muṱhannga a ṱavhanya a ita zwe vha mu humbela zwone,+ ngauri o vha a tshi takalela ṅwananyana wa Yakobo, o vha e muhulisei muṱani woṱhe wa khotsi awe.

20 Ndi hone Hemoro na Shikeme murwa wawe vha tshi ya khoroni ya muḓi vha amba na vhanna vha wonoyo muḓi+ vha ri: 21 “Havha vhanna vha ṱoḓa u vha na mulalo na riṋe. Vha tendeleni vha dzule kha ḽino shango vha ite zwa vhubindudzi khaḽo ngauri shango ndi ḽihulu lune ḽa nga vha eḓana. Ri ḓo vhinga vhananyana vhavho na vhone vha ḓo vhinga vhananyana vhashu.+ 22 Fhedzi vhenevho vhanna vha ḓo tenda u dzula na riṋe na u vha vhathihi na riṋe arali munna muṅwe na muṅwe vhukati hashu a fumba samusi na vhone vho fumba.+ 23 Nga zwenezwo, naa thundu yavho, lupfumo lwavho na zwifuwo zwavho zwoṱhe a zwi nga ḓo vha zwashu? Ngauralo, kha ri vha tendele vha tshi dzula na riṋe.” 24 Vhanna vhoṱhe vha bvaho nga khoro ya muḓi wawe vha thetshelesa Hemoro na Shikeme murwa wawe, vhanna vhoṱhe vha fumbiswa, vhoṱhe vha bvaho khoroni ya muḓi.

25 Nga ḓuvha ḽa vhuraru musi vha tshi kha ḓi pfa vhuṱungu, Simioni na Levi vharwa vhavhili vha Yakobo, khaladzi dza Dina,+ vha dzhia mabanga vha ya kha vhathu vha wonoyo muḓi vha songo zwi lavhelela, vha vhulaya vhanna vhoṱhe.+ 26 Vha vhulaya Hemoro na Shikeme murwa wawe nga banga vha dzhia khaladzi avho Dina nḓuni ya Shikeme, vha ṱuwa. 27 Vhaṅwe vharwa vha Yakobo vha ḓa henefho kha vhanna vho vhulawaho vha dzhia thundu dza wonoyo muḓi ngauri vho tshikafhadza khaladzi avho.+ 28 Vha dzhia nngu dzavho, kholomo dzavho, donngi dzavho na tshiṅwe na tshiṅwe tshe tsha vha tshi muḓini na masimuni. 29 Vha dovha vha dzhia na thundu dzoṱhe, vha thuba vhana vhoṱhe na vhafumakadzi, vha dzhia na zwoṱhe zwi re nḓuni.

30 Nga zwenezwo, Yakobo a amba na Simioni na Levi+ a ri: “No nḓisela khakhathi khulu nga u nnduṱanya na vhadzulapo vha ḽino shango, Vhakanana na Vhapheresi. Riṋe a ri vhanzhi, vha ḓo kuvhangana vha ri vutshela, nda vhulawa na muṱa wanga.” 31 Vha fhindula vha ri: “Naa ri nga tenda khaladzi ashu a tshi farwa sa murengisi wa muvhili?”