Genesi

32 Musi Yakobo a tshi khou ṱuwa, a ṱangana na vharuṅwa vha Mudzimu. 2 Nga u ṱavhanya musi Yakobo a tshi vha vhona a ri: “Haya ndi madennde a Mudzimu!” Ngauralo, a ri fhethu afho hu pfi Mahanaimi.*

3 Yakobo a ruma vhaḓinḓa uri vha mu range phanḓa vha ye ha Esau mukomana wawe shangoni ḽa Seiri,+ ḽi re Edomo,+ 4 a vha laya a ri: “Ni vhudze Esau muṋe wanga ni ri: ‘Yakobo mushumeli wau o ri: “Ndo dzula* na Labani tshifhinga tshilapfu u swika zwino.+ 5 Ndo no vha na mboho, donngi, nngu, vhashumeli vha vhanna na vha vhafumakadzi,+ ndi khou rumela wonoyu mulaedza u itela u ḓivhadza muṋe wanga uri u ntakalele.”’”

6 Nga murahu ha tshifhinga, vhaḓinḓa vha humela ha Yakobo, vha ri: “Ro swika ha mukomana wau Esau, zwino u nḓilani ya u ḓa u u ṱanganedza, u khou ḓa na vhanna vha 400.”+ 7 Yakobo a ofha zwihulu a thoma u vhilaela.+ A fhandekanya vhathu vhe a vha e navho, khathihi na nngu, kholomo na gamela, zwa vha zwigwada zwivhili. 8 Nga zwenezwo a ri: “Arali Esau a vutshela tshigwada tshithihi, tshiṅwe tshi ḓo kona u ponyoka.”

9 Nga murahu ha zwenezwo, Yakobo a ri: “Iwe Yehova Mudzimu wa khotsi anga Abrahamu na Mudzimu wa khotsi anga Isaka, iwe we wa mmbudza wa ri: ‘Humela shangoni ḽa hau na kha mashaka au, ndi ḓo ita uri zwi u tshimbilele zwavhuḓi,’+ 10 a tho ngo tewa nga lufuno lwau lu sa shanduki na u fhulufhedzea hoṱhe he wa sumbedza mushumeli wau,+ ngauri ndo pfuka hoyu Mulambo wa Yorodane ndo fara lubaḓa fhedzi, zwino ro no vha zwigwada zwivhili.+ 11 Ndi rabela uri u ntshidze+ zwanḓani zwa mukomana wanga Esau, ngauri ndi a mu ofha uri a nga ḓa a mvutshela,+ khathihi na vhomme na vhana vhavho. 12 Wo ri: ‘Ndi ḓo ita uri zwi u tshimbilele zwavhuḓi, ndi ḓo ita uri vhana* vhau vha ande sa muṱavha wa lwanzhe, u sa vhalei nga u anda.’”+

13 A eḓela henefho. A dzhia dziṅwe dza thundu dzawe u itela u dzi ṋea Esau mukomana wawe:+ 14 a mu ṋea mbudzi dza tsadzi dza 200 na zwibokoṱo zwa 20, nngu dza tsadzi dza 200 na thutha dza 20, 15 gamela dza 30 na vhana vhadzo, kholomo dza 40 na mboho dza 10, donngi dza tsadzi dza 20 na donngi dza mboho dza 10.+

16 A ṋea vhashumeli vhawe masambi a tshi tou tevhekana, a amba navho a ri: “Welani ni nthange phanḓa, ni sie tshikhala vhukati ha masambi.” 17 A dovha a laya mushumeli wawe wa u thoma a ri: “Arali wa ṱangana na Esau mukomana wanga, a u vhudzisa uri: ‘U mushumeli wa nnyi, u khou ya ngafhi, sambi ḽine wa khou ḽi khada ndi ḽa nnyi?’ 18 U fhindule u ri: ‘Ndi zwa mushumeli wau Yakobo. Ndi tshifhiwa tsho rumelwaho muṋe wanga, Esau,+ ene u murahu hashu.’” 19 A dovha a laya wa vhuvhili na wa vhuraru na vhoṱhe vha khadaho masambi a ri: “Ni vhudze Esau zwenezwi musi ni tshi ṱangana nae. 20 Ni ambe ni ri: ‘Mushumeli wau Yakobo u murahu hashu.’” Ngauri o vha o ḓivhudza uri: ‘Arali nda dzikisa mbiti dzawe nga u rumela zwifhiwa uri zwi nthange phanḓa,+ musi ndi tshi mu vhona nga murahu khamusi a nga nṱanganedza nga vhulenda.’ 21 Zwifhiwa zwa mu ranga phanḓa, fhedzi ene a eḓela henefho madenndeni.

22 Nga murahu nga honoho vhusiku a vuwa a dzhia vhafumakadzi vhawe vhavhili+ na vhashumeli vhawe vhavhili+ vha vhafumakadzi na vharwa vhawe vhaṱuku vha 11 vha pfuka nga muratho wa Yaboko.+ 23 Ngauralo, a vha pfukisa mulambwana,* a pfukisa na zwoṱhe zwe a vha e nazwo.

24 Mafheleloni Yakobo a sala e eṱhe. A thoma u lwa tsimbe na muṅwe munna u swika ḽi tshi tsha.+ 25 Musi onoyo munna a tshi vhona uri ho ngo kunda Yakobo, a kwama Yakobo kha khundu; khundu dzawe dza fhirea musi a tshi khou lwa tsimbe nae.+ 26 Nga murahu onoyo munna a ri: “Nnditshe ndi ṱuwe, ngauri ḓuvha ḽo no tsha.” A mu fhindula a ri: “A thi nga u tendeli u tshi ṱuwa u sa athu u mphaṱhutshedza.”+ 27 A mu vhudzisa a ri: “U pfi nnyi?” A ri: “Yakobo.” 28 Nga murahu ha zwenezwo a ri: “Dzina ḽau a u tsha ḓo pfi Yakobo, fhedzi u ḓo pfi Isiraele,*+ ngauri wo lwa na Mudzimu+ na vhathu wa kunda.” 29 Yakobo a ri: “Ndi khou humbela uri u mmbudze dzina ḽau.” Ene a ri: “Ndi ngani u tshi mmbudzisa dzina ḽanga?”+ Nga zwenezwo, a mu fhaṱutshedza henefho. 30 Yakobo a ri henefho fhethu hu pfi Peniele*+ ngauri o ri: “Ndo vhona Mudzimu ro livhana tshifhaṱuwo fhedzi nda tshila.”+

31 Ḓuvha ḽa ṱavha musi a tshi tou fhira Penuele,* fhedzi o vha a tshi khou ṱudza ngauri o vha o fhirea khundu.+ 32 Ndi ngazwo u swika na ṋamusi vharwa vha Isiraele vha sa ḽi musipha u re kha khundu, nge Yakobo a farwa khundu tsini na wonoyo musipha.