Genesi

46 Isiraele a dzhia zwoṱhe zwe a vha e nazwo a ṱuwa. Musi a tshi swika Beresaba,+ a ṋekedza Mudzimu wa khotsi awe Isaka zwiṱhavhelo.+ 2 Nga zwenezwo, Mudzimu a amba na Isiraele kha bono vhusiku a ri: “Yakobo, Yakobo!” Ene a fhindula a ri: “Ndi fhano!” 3 A bvela phanḓa a ri: “Ndi nṋe Mudzimu wa ngoho, Mudzimu wa khotsi au.+ U songo ofha u tsela Egipita, nga⁠uri ndi ḓo u ita uri u vhe lushaka luhulu henengei.+ 4 Nṋe ndi ḓo ṱuwa na iwe Egipita, ndi ḓo dovha nda u vhuisa u henengei;+ musi u tshi fa Yosefa u ḓo u vala maṱo.”*+

5 Nga murahu ha zwenezwo, Yakobo a ṱuwa Beresaba, vharwa vha Isiraele vha endedza Yakobo khotsi avho, vhana vhavho na vhafumakadzi vhavho nga gariki dze Farao a dzi rumela uri dzi endedze Yakobo. 6 Vha dzhia masambi avho na thundu dzavho dze vha vha vho dzi kuvhanganya shangoni ḽa Kanana. Mafheleloni Yakobo na muṱa wawe vha swika Egipita. 7 O ya Egipita na vharwa na vhananyana vhawe na vhaḓuhulu vhawe vhoṱhe, vhana vhawe vhoṱhe.

8 Haya ndi madzina a vharwa vha Isiraele vhe a ya navho Egipita,+ Yakobo na vharwa vhawe: Tanzhe ḽa Yakobo o vha e Rubeni.+

9 Vharwa vha Rubeni vho vha vhe Hanoxe, Palu, Hetsironi na Karami.+

10 Vharwa vha Simioni+ vho vha vhe Yemuele, Yamini, Ohada, Yakini, Tsohara na Shaulo+ murwa wa mufumakadzi wa Mukanana.

11 Vharwa vha Levi+ vho vha vhe Gerisoni, Kehati na Merari.+

12 Vharwa vha Yuda+ vho vha vhe Ere, Onana, Shela,+ Perese+ na Zera.+ Naho zwo ralo, Ere na Onana vho fela shangoni ḽa Kanana.+

Vharwa vha Perese vho vha vhe Hetsironi na Hamulu.+

13 Vharwa vha Isashari vho vha vhe Thola, Puva, Iyobo na Shimironi.+

14 Vharwa vha Sebuloni+ vho vha vhe Serede, Eloni na Yahalele.+

15 Vhenevho ndi vharwa vha Lea, vhe a vha bebela Yakobo ngei Phadani-aramu, a mu bebela na Dina ṅwananyana wawe.+ Vharwa vhawe vhoṱhe na vhananyana vhawe vhoṱhe vho vha vhe 33.

16 Vharwa vha Gada+ vho vha vhe Tsifoni, Hagi, Shuni, Etsiboni, Eri, Arodi na Areli.+

17 Vharwa vha Ashere+ vho vha vhe Imina, Ishiva, Ishivi na Beria, khaladzi avho o vha e Sera.

Vharwa vha Beria vho vha vhe Hebere na Malikiele.+

18 Vhenevho ndi vharwa vha Silipa,+ we Labani a mu ṋea ṅwananyana wawe Lea. O bebela Yakobo vhenevha vhana: vho vha vhe 16.

19 Vharwa vha Rahele mufumakadzi wa Yakobo, vho vha vhe Yosefa+ na Benyamini.+

20 Yosefa e ngei shangoni ḽa Egipita o bebelwa Manase+ na Efuraimi+ nga Asinatha+ ṅwananyana wa tshifhe Potifera wa Oni.

21 Vharwa vha Benyamini+ vho vha vhe Bela, Bekere, Ashibele, Gera,+ Naemani, Ehi, Rosi, Mupimi, Hupimi+ na Arede.+

22 Vhenevho ndi vharwa vha Rahele vhe a vha bebela Yakobo: vho fhelela vho vha vhe 14.

23 Murwa* wa Dani+ ndi Hushimi.+

24 Vharwa vha Nafutali+ vho vha vhe Yagesele, Guni, Yezere na Shilemu.+

25 Vhenevho ndi vharwa vha Biliha, we Labani a mu ṋea ṅwananyana wawe Rahele. Nga murahu ha tshifhinga o bebela Yakobo vhenevha vhana: vho fhelela vho vha vhe sumbe.

26 Vhathu vhoṱhe vhe vha pfulutshela Egipita na Yakobo, hu sa vhalwi vhafumakadzi vha vharwa vhawe, vho vha vhe 66.+ 27 Yosefa o bebelwa vharwa vhavhili ngei Egipita. Vhoṱhe vha nnḓu ya Yakobo vhe vha ḓa Egipita vho vha vhe 70.+

28 Yakobo a ruma Yuda+ uri a mu range phanḓa uri a vhudze Yosefa uri u khou ya Gosheni. Musi vha tshi swika shangoni ḽa Gosheni,+ 29 Yosefa a laedza uri hu lugiswe gariki yawe, a ya a ṱangana na khotsi awe Isiraele kha ḽa Gosheni. Musi a tshi tou ṱangana nae a mu kuvhatedza a lila tshifhinga tshilapfu. 30 Mafheleloni Isiraele a amba na Yosefa a ri: “Zwino ndi nga fa; ndo u vhona, ndi vho zwi ḓivha uri u kha ḓi tshila.”

31 Ngauralo, Yosefa a amba na vhakomana vhawe na muṱa woṱhe wa khotsi awe a ri: “Nnditsheni ndi ye kha Farao+ ndi vhige uri: ‘Vhakomana vhanga na muṱa woṱhe wa khotsi anga vhe vha vha vhe shangoni ḽa Kanana vho ḓa ngeno kha nṋe.+ 32 Vhenevha vhanna ndi vhalisa+ vha u fuwa zwifuwo;+ vho ḓa na nngu dzavho na kholomo dzavho na zwoṱhe zwine vha vha nazwo.’+ 33 Musi Farao a tshi ni vhidza a ni vhudzisa uri: ‘Ni shuma mushumo-ḓe?’ 34 ni fanela u ri: ‘Riṋe vhashumeli vhau ro vha vhafuwi vha zwifuwo u bva ri tshee vhaswa u swika zwino, u fana na vhomakhulukuku washu,’+ uri ni kone u dzula shangoni ḽa Gosheni,+ ngauri Vhaegipita vha nengiswa nga vhalisa vhoṱhe vha nngu.”+