Yoshua
9 Musi mahosi oṱhe e a vha e thungo ya vhukovhela ha Yorodane+ a tshi pfa zwe zwa itea, ane a vha dzinguni ḽa dzithavhani, ngei Shefela, u tsa na khunzi-khunzi yoṱhe ya Lwanzhe Luhulu,*+ na phanḓa ha Libanoni, Vhahethe, Vhaamori, Vhakanana, Vhapheresi, Vhahevi na Vhayebusi+ 2 a langana uri a lwe na Yoshua na Vhaisiraele.+
3 Vhadzulapo vha ḽa Gibeoni+ na vhone vha pfa zwe Yoshua a zwi ita ngei Yeriko+ na ngei Ai.+ 4 Ngauralo, vha ita zwithu nga vhuṱali, vha dzhenisa zwiḽiwa zwavho kha masaga o ṱahalaho vha hwesa donngi dzavho, khathihi na zwikumbu zwa mukumba* zwe zwa vha zwo ṱahala zwa balea, zwa rungiwa; 5 vho ambara thovho* dzo ṱahalaho dzo namiwaho na zwiambaro zwo ṱahalaho. Vhurotho havho hoṱhe ha mbuvha ho vha ho oma vhu matshakatshaka. 6 Vha ya ha Yoshua madenndeni ngei Giligala+ vha amba nae na vhanna vha Isiraele vha ri: “Ri bva shangoni ḽa kule. Zwino vhofha mulanga na riṋe.” 7 Fhedzi vhanna vha Isiraele vha amba na Vhahevi+ vha ri: “Khamusi ni dzula tsini na riṋe. Ri nga vhofha hani mulanga na inwi?”+ 8 Vha amba na Yoshua vha ri: “Ri vhashumeli* vhau.”
Ngauralo, Yoshua a amba navho a ri: “Ni vhonnyi, ni bva ngafhi?” 9 Vha mu fhindula vha ri: “Vhashumeli vhau vha bva shangoni ḽa kule-kule+ nga nṱhani ha uri vho pfa nga ha dzina ḽa Yehova Mudzimu wau, ro pfa nga ha bvumo ḽawe na zwoṱhe zwe a ita ngei Egipita+ 10 na nga ha zwoṱhe zwe a ita mahosi mavhili a Vhaamori vha re seli* ha Mulambo wa Yorodane, ane a vha Sihoni+ khosi ya Hesiboni na Ogo khosi+ ya Bashani, we a vha e ngei Asitarote. 11 Nga zwenezwo, vhahulwane vhashu na vhadzulapo vha shangoni ḽa hashu vho ri vhudza uri: ‘Dzhiani zwiḽiwa zwa mbuvha ni ye ni ṱangane navho. Ni vha vhudze uri: “Ri ḓo vha vhashumeli vhaṋu;+ zwino vhofhani mulanga na riṋe.”’+ 12 Nga ḓuvha ḽe ra takuwa ngaḽo nḓuni dzashu ri tshi ḓa fhano hovhu vhurotho ho vha vhu tshi kha ḓi fhisa. Na iwe u khou vhu vhona uri ho no oma, ndi matshakatshaka.+ 13 Na hezwi zwikumbu zwa mukumba* zwo vha zwi zwiswa musi ri tshi zwi shela waini, fhedzi zwino zwo balea.+ Zwiambaro zwashu na thovho* dzashu zwo ṱahala nga nṱhani ha lwendo lulapfu.”
14 Vhanna vha Isiraele vha dzhia* iṅwe ya mbuvha dzavho, fhedzi vha si vhudzise Yehova.+ 15 Yoshua a ita mulalo navho,+ a vhofha mulanga navho wa uri ha nga vha vhulayi, vharangaphanḓa vha tshitshavha vha vha anela.+
16 Nga murahu ha maḓuvha mararu musi vho no vhofha mulanga navho, vha pfa uri vha dzula henefho tsini, shangoni ḽavho. 17 Vhaisiraele vha ya miḓini yavho musi ho no fhela maḓuvha mararu; miḓi yavho yo vha i Gibeoni,+ Kefira, Beerothe na Kiriate-yearimi.+ 18 Fhedzi Vhaisiraele vha si lwe navho, ngauri vharangaphanḓa vha tshitshavha vho vha vho vha anela nga Yehova+ Mudzimu wa Isiraele. Tshitshavha tshoṱhe tsha thoma u gungulela vharangaphanḓa. 19 Vharangaphanḓa vhoṱhe vha fhindula tshitshavha tshoṱhe vha ri: “Samusi ro vha anela nga Yehova Mudzimu wa Isiraele a ro ngo tendelwa u vha huvhadza. 20 Ri ḓo ita hezwi: A ri nga vha vhulayi, uri Mudzimu a si ri sinyutshele nga nṱhani ha muano we ra vha anela wone.”+ 21 Vharangaphanḓa vha dovha vha ri: “Ni songo vha vhulaya, fhedzi vha ḓo reḓela tshitshavha tshoṱhe khuni na u tshi kela maḓi.” Ndi zwe vharangaphanḓa vha vha vhudza zwone.
22 Yoshua a vha vhidza a amba navho a ri: “Ndi ngani no ri fhura na ri: ‘Ri bva shangoni ḽa kule-kule,’ ngeno ni tshi dzula henefha na riṋe?+ 23 U bva zwino no semwa,+ ni ḓo dzula ni vhalanda vha u reḓa khuni na u kelela maḓi nḓuni ya Mudzimu wanga.” 24 Vha fhindula Yoshua vha ri: “Ro ita zwenezwi ngauri ro vhudzwa uri Yehova Mudzimu wau o vha o laya Mushe mushumeli wawe uri a ni ṋee shango ḽoṱhe, a vhulaye vhadzulapo vhaḽo vhoṱhe.+ Ro vha ri tshi khou ofha uri ni ḓo ri vhulaya,+ ndi ngazwo ro ita zwenezwi.+ 25 Zwino ri zwanḓani zwau. Ri ite zwiṅwe na zwiṅwe zwine wa vhona zwo luga, zwo tea.” 26 A vha ita zwo lugaho na zwo teaho; a vha tshidza zwanḓani zwa Vhaisiraele, vha si vha vhulaye. 27 Fhedzi nga ḽeneḽo ḓuvha, Yoshua a vha ita vha u reḓa khuni na vha u ka maḓi a tshitshavha+ na a aḽeṱare ya Yehova fhethu hune a ḓo hu nanga,+ zwi tshee zwo ralo u swika na ṋamusi.+