Yesaya
66 Yehova u ri:
“Ḽiṱaḓulu ndi khuluṋoni yanga, ḽifhasi ndi fhethu hune nda kanda hone.+
2 “Hezwi zwithu zwoṱhe zwo itwa nga nṋe,
Ndi ngazwo zwoṱhe zwo vha hone,” u ralo Yehova.+
“Naho zwo ralo, ndi ḓo sedza ane
A ḓiṱukufhadza na wa muya wo kwashekanaho ane a ofha zwine nda amba.+
3 Ane a ṱhavha mboho u nga ane a vhulaya muthu.+
Ane a ita tshiṱhavhelo tsha nngu u nga ane a somba mukulo wa mmbwa.+
Ane a ṋekedza tshifhiwa u nga ane a ṋekedza malofha a nguluvhe!+
Ane a ṋekedza zwioro zwitshena+ zwa tshihumbudzo u nga ane a fhaṱutshedza nga maipfi a madambi.*+
Vho nanga nḓila dzavho,
Vha takadzwa nga zwine zwa nengisa.
4 Ndi ḓo wana nḓila dza u vha pfisa vhuṱungu,+
Ndi ḓo vha ḓisela zwithu zwine vha zwi ofha.
Ngauri musi ndi tshi vhidzelela, a hu na we a aravha;
Musi ndi tshi amba, a hu na we a thetshelesa.+
Vho bvela phanḓa vha tshi ita zwi sa ntakadzi,
Vha nanga u ita zwine zwa ntsinyusa.”+
5 Ipfani zwine Yehova a amba, inwi vha ofhaho zwine a amba:
“Vhahaṋu vhane vha ni vhenga na u ni pandela nga nṱhani ha dzina ḽanga, vho ri, ‘Yehova nga a ṋewe vhugala!’+
Fhedzi U ḓo bvelela a ni ḓisela dakalo,
Ndi vhone vhane vha ḓo shoniswa.”+
6 Hu na bonyongo muḓini, mubvumo u bvaho thembeleni!
Ndi mubvumo wa Yehova wa u lifhedza maswina awe nga zwo a fanelaho.
7 O beba tshifhinga tshawe tshi sa athu u swika.+
O beba mutukana a sa athu u pfa vhuṱungu ha u beba.
8 Ndi nnyi we a vhuya a pfa zwenezwi?
Ndi nnyi we a vhona zwenezwi zwithu?
Naa shango ḽi nga bebwa nga ḓuvha ḽithihi?
Kana naa lushaka lwoṱhe lu nga bebwa nga khathihi?
Naho zwo ralo, musi Tsioni u tshi tou pfa vhuṱungu ha u beba, wa beba vharwa vhawo.
9 “Naa ndi nga u swikisa kha tshifhinga tsha u beba, nda ita uri u si tsha beba?” u ralo Yehova.
“Naa ndi nga ita uri u bebe nda fhedza nda vala mbumbelo?” u ralo Mudzimu waṋu.
10 Takalani na Yerusalema ni pembele nawo,+ inwi noṱhe vhane na u funa.+
Takalani zwihulu nawo, inwi noṱhe vhane na khou u lilela,
11 Ngauri ni ḓo mama na fushea nga ḓamu ḽawo ḽa u kwengweledza,
Ni ḓo nwa na ḓiphiṋa na takalela muḓalo wa vhugala hawo.
12 Ngauri Yehova u ri:
Ni ḓo mama na bebiwa muṱanani,
Na dzudzwa kha magona.
13 Sa mme a tshi fhumudza murwa wawe,
Ndi ḓo dzula ndi tshi ni fhumudza;+
Ni ḓo fhumudzwa nga nṱhani ha Yerusalema.+
14 Ni ḓo vhona zwenezwi, mbilu dzaṋu dza takala,
Marambo aṋu a ḓo titima sa hatsi vhuswa.
15 “Ngauri Yehova u ḓo ḓa vhunga mulilo,+
Na gariki dzawe dzi tshi nga ḓumbu,+
Uri a lifhedze o sinyuwa,
Uri a kaidze nga khavhu dza mulilo.+
16 Ngauri Yehova u ḓo haṱula nga mulilo,
U ḓo haṱula ṋama yoṱhe* nga banga ḽawe;
Vho vhulawaho nga Yehova vha ḓo vha vhanzhi.
17 “Vhane vha ḓiita vhakhethwa na u ḓikunakisa uri vha dzhene masimuni*+ vha tshi tevhela a re vhukati, vhane vha ḽa ṋama ya nguluvhe+ na zwithu zwi re na tshika na mbevha,+ vha ḓo fheliswa vhoṱhe,” u ralo Yehova. 18 “Samusi ndi tshi ḓivha mishumo na mihumbulo yavho, ndi khou ḓa u kuvhanganya vhathu vha tshaka dzoṱhe na vha nyambo dzoṱhe, vha ḓo ḓa vha vhona vhugala hanga.”
19 “Ndi ḓo vhea tshiga vhukati havho, nda rumela vhaṅwe vho ponyokaho kha tshaka dza ngei Tharasisi,+ Puli na Ludi,+ vhane vha pfula nga vhura, nda vha rumela ngei Thubali, ngei Yavani+ na ngei zwiṱangadzimeni zwa kule, vhane a vha athu u pfa mafhungo nga ha nṋe kana u vhona vhugala hanga; vha ḓo ḓivhadza vhugala hanga vhukati ha dzitshaka.+ 20 Vha ḓo ḓisa vhahaṋu vha bvaho kha tshaka dzoṱhe+ sa tshifhiwa tshi yaho kha Yehova, vhe kha bere, gariki, gariki dzo valeaho, meila, gamela dza luvhilo, vha tshi gonya Yerusalema thavhani yanga khethwa,” u ralo Yehova, “u fana na musi vhathu vha Isiraele vha tshi ḓisa tshifhiwa nḓuni ya Yehova tshi kha mudzio wo kunaho.”
21 “Ndi ḓo dzhia vhaṅwe uri vha vhe vhotshifhe na Vhalevi,” u ralo Yehova.
22 “Vhunga ndi tshi khou sika ḽiṱaḓulu ḽiswa na ḽifhasi ḽiswa+ zwine zwa ḓo dzula zwi hone phanḓa hanga,” u ralo Yehova, “na vhana* vhaṋu na dzina ḽaṋu zwi ḓo dzula zwi hone.”+