Kha Vhahevheru

6 Samusi ro no guda pfunzo dza mutheo+ dza Kristo, kha ri bvele phanḓa ri tshi vha vho vhibvaho,+ ri songo dovha ra adza mutheo wa pfunzo dzi ngaho u rembuluwa kha mishumo i sa vhuyedzi, u tenda Mudzimu, 2 pfunzo ya ndovhedzo, ya u vhea zwanḓa,+ ya u vuswa ha vhafu+ na ya u haṱulwa lwa tshoṱhe. 3 Ri ḓo bvela phanḓa ri tshi vha vho vhibvaho ri tshi thuswa nga Mudzimu.

4 Ngauri a zwi konadzei u rembulusa vhe vha vhuya vha vhonetshelwa,+ vho thetshelaho tshifhiwa tshi bvaho ṱaḓulu na vho wanaho muya mukhethwa, 5 vho thetshelaho ipfi ḽavhuḓi ḽa Mudzimu na phaṱhutshedzo* dza shango* ḽi ḓaho, 6 ngauri vho litsha pfunzo dza ngoho.+ A zwi konadzei u vha thusa ngauri vho dovha vha ombela Murwa wa Mudzimu kha danda na u mu nyadzisa nga vhathu.+ 7 Ngauri Mudzimu u fhaṱutshedza mavu nga u nisa mvula tshifhinga tshoṱhe, a medza zwimela zwine zwa vhuyedza vhane vha lima. 8 Arali mavu a medza mipfa na tsheṋe, ha takalelwi, a tsini na u semiwa, a ḓo fheleledza o fhiswa.

9 Naho ri tshi khou amba nga u rali, ri fhulufhela uri inwi vhafunwa ni khwine kha vho ṱutshelaho lutendo ngauri ni khou ita zwine zwa ḓo ita uri ni tshidzwe. 10 Mudzimu o luga, ha nga hangwi mushumo waṋu na lufuno lwe na lu sumbedza ni tshi itela dzina ḽawe,+ ngauri no shumela vhakhethwa na zwino ni kha ḓi vha shumela. 11 Fhedzi ri tama uri ni shume nga maanḓa u fana na musi ni tshi thoma u tenda, uri ni vhe na fhulufhelo ḽo khwaṱhaho+ u swika vhufheloni,+ 12 uri ni si vhe vhabva,+ ni edzise vhe vha wana zwe vha fhulufhedziswa nge vha vha na lutendo, vha si fhele mbilu.

13 Musi Mudzimu a tshi fhulufhedzisa Abrahamu, o ana nga ene muṋe ngauri a hu na ane a mu fhira,+ 14 a ri: “Ndi ḓo u fhaṱutshedza, nda andisa vhana vhau.”+ 15 Abrahamu o wana zwe a fhulufhedziswa ngauri ho ngo fhela mbilu. 16 Ngauri muthu u ana nga ane a mu fhira, zwa fhelisa khani ngauri zwi khwaṱhisedza zwe a ana.+ 17 Na Mudzimu o vha a tshi ṱoḓa u sumbedza vhe a vha fhulufhedzisa ifa+ uri ha shanduli zwine a ṱoḓa u zwi ita, o zwi khwaṱhisedza nga u ana. 18 Zwenezwi zwithu zwivhili zwe Mudzimu a zwi ita* a zwi shanduki. Mudzimu ha zwifhi;+ zwi khwaṱhisa riṋe vhe ra shavhela vhushavheloni hawe uri ri farelele ro khwaṱha kha fhulufhelo ḽi re phanḓa hashu. 19 Zwine ra zwi fhulufhela+ ndi thikho ya vhutshilo hashu, zwi ḓo itea, zwo khwaṱhisedzwa, zwi ita uri ri kone u dzhena fhethu ho thivhiwaho nga khetheni,+ 20 he Yesu+ a dzhena phanḓa hashu uri a ri vulele na u ri lugiselela nḓila, a vha tshifhe muhulu wa lini na lini nga maitele a Melkizedeke.+