Vhurifhi Ha U Thoma Vhu Yaho Kha Vhakorinta

13 Arali ndi tshi amba nga nyambo dza vhathu na dza vharuṅwa, fhedzi ndi si na lufuno, ndi nga ḓilogo kana ngoma i lilaho. 2 Arali ndi na tshifhiwa tsha u porofita, ndi tshi pfesesa zwiphiri zwikhethwa zwoṱhe, ndi na nḓivho yoṱhe+ na lutendo lwo khwaṱhaho lune lwa nga sudzulusa thavha, fhedzi ndi si na lufuno, a thi tshithu.+ 3 Arali nda thusa vhaṅwe nga zwithu zwanga zwoṱhe,+ nda kumedzela muvhili wanga sa tshiṱhavhelo uri ndi zuwe, fhedzi ndi si na lufuno,+ a thi vhuyelwi nga tshithu.

4 Lufuno+ a lu fheli mbilu,+ lu na vhuthu.+ Lufuno a lu na vivho,+ a lu zuwi, a lu ḓikukumusi,+ 5 a lu ḓifari nga nḓila i si yavhuḓi,*+ a lu ḓiṱoḓeli zwalwo,+ a lu sinyuwi.+ A lu vhaleli vhukhakhi.+ 6 A lu takaleli zwi songo lugaho,+ lu takalela ngoho. 7 Lu fukedza zwoṱhe,+ lwa tenda zwoṱhe,+ lwa fhulufhela zwoṱhe,+ lwa konḓelela zwoṱhe.+

8 Lufuno lu nga si vhuye lwa fhela. Fhedzi zwifhiwa zwa u porofita zwi ḓo fheliswa; ndimi dzi ḓo fheliswa; na nḓivho i ḓo fheliswa. 9 Ngauri ri na nḓivho ṱhukhu,+ ri porofita nga nḓila i songo fhelelaho, 10 hu tshi swika zwo fhelelaho, zwi songo fhelelaho zwi ḓo fheliswa. 11 Musi ndi tshi kha ḓi vha ṅwana, ndo vha ndi tshi amba sa ṅwana, ndi tshi humbula sa ṅwana, ndi tshi elekanya sa ṅwana; zwino ndo no vha munna, ndo laṱa zwiito zwa ṅwana. 12 Zwa zwino zwi tou nga ri khou vhona nga tshivhoni tshi sa vhonadzi zwavhuḓi, fhedzi nga murahu ri ḓo kona u vhona zwavhuḓi. Zwino ndi na nḓivho i songo fhelelaho, fhedzi nga murahu ndi ḓo vha na nḓivho yo fhelelaho, samusi Mudzimu a tshi nḓivha zwavhuḓi. 13 Naho zwo ralo, zwi sa fheli ndi: lutendo, fhulufhelo na lufuno. Fhedzi tshihulwane kha zwenezwi zwiraru ndi lufuno.+