Vhurifhi Ha U Thoma Vhu Yaho Kha Vhakorinta
16 Zwi tshi ḓa kha u kuvhanganyela vhakhethwa+ tshelede, ni tevhele vhulivhisi he nda ṋea zwivhidzo zwa Galata. 2 Nga ḓuvha ḽa u thoma ḽa vhege, muṅwe na muṅwe waṋu a vhetshele tshelede thungo u ya nga hune a kona, uri ni si kuvhanganye tshelede musi ndi tshi ḓa. 3 Musi ndi tshi ḓa, ndi ḓo ruma vhanna vhe na ṅwala kha vhurifhi+ uri vha a fhulufhedzea, uri vha ise tshelede ye na i bvisa zwi tshi bva mbiluni ngei Yerusalema. 4 Naho zwo ralo, arali zwo tea uri na nṋe ndi ye henengei, ndi ḓo ṱuwa navho.
5 Fhedzi ndi ḓo ḓa kha inwi ndi tshi bva Makedonia,+ ngauri ndi ḓo fhira ngaho; 6 khamusi ndi ḓo dzula kana nda fhedza vhuria ndi na inwi, uri ni mphelekedze hune nda ḓo vha ndi tshi khou ya hone. 7 Arali Yehova* a tshi zwi funa, ndi ṱoḓa u fhedza tshifhinga tshilapfu ndi na inwi,+ nṱhani ha u tou fhira ndi tshi ni vhona. 8 Fhedzi ndi ḓo dzula Efesa+ u swika nga Vhuṱambo ha Pentekoste, 9 ngauri ndo vulelwa tshibuli tshihulu* tsha u ita mushumo wa Murena,+ fhedzi hu na vhapikisi vhanzhi.
10 Musi Timotheo+ a tshi swika, ni ite vhungoho ha uri a si ofhe tshithu musi e na inwi, ngauri u khou ita mushumo wa Yehova,*+ u fana na nṋe. 11 Hu songo vha na ane a mu nyadza. Ni mu fhelekedze, uri a kone u swika kha nṋe, ngauri nṋe na vhahashu ro mu lindela.
12 Ndo ṱuṱuwedza wahashu Apolo+ uri a ḓe kha inwi na vhahashu. O vha a songo ḓiimisela u ḓa zwino, fhedzi u ḓo ḓa musi a tshi wana tshifhinga.
13 Dzulani no fhaṱuwa,+ imani no khwaṱha lutendoni,+ ni vhe na tshivhindi,*+ ni vhe na maanḓa.+ 14 Zwoṱhe zwine na ita ni zwi ite nga lufuno.+
15 Ndi a ni ṱuṱuwedza vhahashu: Ni a zwi ḓivha uri muṱa wa ha Stefanasi ndi wone wa u thoma u vha vhatendi ngei Axaya na u ḓikumedzela u shumela vhakhethwa. 16 Ngavhe ni tshi ḓiṱukufhadza kha vhathu vho raloho na kha vhoṱhe vhane vha shumisana na riṋe na vhane vha shuma nga maanḓa.+ 17 Fhedzi ndi a takala uri Stefanasi,+ Fortunato na Axaiko vha fhano, ngauri vho nthusa nga maanḓa musi ni siho. 18 Ni dzhiele nṱha vhathu vho raloho, ngauri vho ri ṱuṱuwedza.*
19 Vha zwivhidzoni zwa Asia vha a ni lumelisa. Akwila na Prisika* na tshivhidzo tshine tsha kuvhangana nḓuni+ yavho vha a ni lumelisa Murenani zwi tshi bva mbiluni. 20 Vhahashu vhoṱhe vha a ni lumelisa. Ni lumelisane nga khisi.*
21 Nṋe Paulo, ndi khou ni lumelisa.*
22 Ane a sa fune Murena, nga a semiwe. Murena washu, iḓa! 23 Ngavhe Murena Yesu a tshi ni sumbedza vhuthu vhuhulu. 24 Ndi ni funa noṱhe, ngauri ni vhafunziwa vha Kristo Yesu.