Bugu Ya U Thoma Ya Dzikhosi

8 Nga tshenetsho tshifhinga, Salomo a kuvhanganya+ vhahulwane vha Isiraele, vharangaphanḓa vhoṱhe vha tshaka dzavho, vharangaphanḓa vha miṱa ya vhokhotsi vha Isiraele.+ Vha ḓa kha Khosi Salomo ngei Yerusalema uri vha hwale mbulungelo ya mulanga wa Yehova u bva Muḓini wa Davida+ une wa vha Tsioni.+ 2 Vhanna vhoṱhe vha Isiraele vha kuvhangana phanḓa ha Khosi Salomo nga ṅwedzi wa Ethanimi* vhuṱamboni* he ha itwa nga ṅwedzi wa vhusumbe.+ 3 Vhahulwane vhoṱhe vha Isiraele vha ḓa, vhotshifhe vha hwala Mbulungelo.+ 4 Vha ḓisa Mbulungelo ya Yehova, dennde ḽa muṱangano+ na thundu dzoṱhe khethwa dze dza vha dzi denndeni. Vhotshifhe na Vhalevi vha gonya nazwo. 5 Khosi Salomo na tshitshavha tshoṱhe tsha Isiraele, tsho vhidzwaho uri tshi ṱangane nae, tsho ima nae phanḓa ha Mbulungelo. Ha ṋekedzwa zwiṱhavhelo+ zwa nngu na kholomo nnzhi vhukuma lwe vha si kone u zwi vhala.

6 Vhotshifhe vha ḓisa mbulungelo ya mulanga wa Yehova vhudzuloni hayo,+ kamarani ya nga ngomu-ngomu, fhethu Hukhethwa-khethwa, fhasi ha phapha dza vhakerube.+

7 Phapha dza vhakerube dzo vha dzo ṱharamuwa nṱha ha Mbulungelo, lwe vhakerube vha tsira Mbulungelo na thanda dzayo.+ 8 Dzenedzo thanda+ dzo vha dzo lapfa lwe ṱhodzi dzadzo dza vha dzi tshi vhonala fhethu Hukhethwa, phanḓa ha kamara ya nga ngomu-ngomu, fhedzi dzi sa vhonali nga nnḓa. Dzi kha ḓi vha henefho na ṋamusi. 9 Nga ngomu ha Mbulungelo ho vha hu si na tshithu nga nnḓa ha mbaba+ mbili dza matombo dze Mushe a dzi vhea+ e ngei Horebe, musi Yehova a tshi vhofha mulanga+ na vhathu vha Isiraele vha tshi bva shangoni ḽa Egipita.+

10 Musi vhotshifhe vha tshi bva fhethu hukhethwa, gole+ ḽa ḓadza nnḓu ya Yehova.+ 11 Vhotshifhe vha si tsha kona u ita mishumo yavho nga nṱhani ha gole, ngauri vhugala ha Yehova ho vha ho ḓadza nnḓu ya Yehova.+ 12 Nga tshenetsho tshifhinga, Salomo a ri: “Yehova o amba uri u ḓo dzula swiswini ḽihulu.+ 13 Ndo fhedza u u fhaṱela nnḓu yavhuḓi, fhethu hune wa ḓo dzula hone lini na lini.”+

14 Khosi ya rembuluwa ya lavhelesa tshivhidzo tshoṱhe tsha Isiraele tsho imaho henefho, ya tshi fhaṱutshedza.+ 15 Ya ri: “Nga hu rendwe Yehova Mudzimu wa Isiraele, we a fhulufhedzisa khotsi anga Davida nga mulomo wawe, a ita nga tshanḓa tshawe zwe a amba a tshi ri: 16 ‘U bva nga ḓuvha ḽe nda bvisa vhathu vhanga vha Isiraele Egipita, a tho ngo nanga muḓi kha tshaka dzoṱhe dza Isiraele, une nda ḓo fhaṱa khawo nnḓu uri dzina ḽanga ḽi dzule henefho,+ fhedzi ndo nanga Davida uri a vhuse vhathu vhanga vha Isiraele.’ 17 Khotsi anga Davida o vha o tama u fhaṱela dzina ḽa Yehova Mudzimu wa Isiraele nnḓu.+ 18 Fhedzi Yehova a amba na khotsi anga Davida a ri: ‘Samusi lwo vha lu lutamo lwau uri u fhaṱele dzina ḽanga nnḓu, wo ita zwone u tshi tama u ita nga u ralo. 19 Naho zwo ralo, a u nga mphaṱeli nnḓu, fhedzi ndi murwa wau ane wa ḓo mu beba, ane a ḓo fhaṱela dzina ḽanga nnḓu.’+ 20 Yehova o ita zwe a fhulufhedzisa, ngauri ndo vha khosi vhudzuloni ha khotsi anga Davida, ndo dzula kha khuluṋoni ya Isiraele, sa zwe Yehova a fhulufhedzisa. Ndo fhaṱela na dzina ḽa Yehova Mudzimu wa Isiraele nnḓu,+ 21 nda ita uri hu vhe na fhethu ha u vhea Mbulungelo i re na mulanga+ we Yehova a u vhofha na vhomakhulukuku washu musi a tshi vha bvisa shangoni ḽa Egipita.”

22 Salomo a ima phanḓa ha aḽeṱare ya Yehova phanḓa ha tshivhidzo tshoṱhe tsha Isiraele, a imisela zwanḓa zwawe ṱaḓulu,+ 23 a ri: “Iwe Yehova Mudzimu wa Isiraele, a hu na muṅwe Mudzimu ane a nga iwe+ ngei ṱaḓulu kana kha ḽifhasi, ane a khwaṱhisa mulanga na u sumbedza lufuno lu sa shanduki+ kha vhashumeli vhawe vhane vha tshimbila phanḓa hawe nga mbilu dzavho dzoṱhe.+ 24 Wo ita zwe wa fhulufhedzisa mushumeli wau Davida khotsi anga. Wo fhulufhedzisa nga mulomo wau nahone ṋamusi wo ita nga tshanḓa tshau zwe wa fhulufhedzisa.+ 25 Iwe Yehova Mudzimu wa Isiraele, wo ita zwe wa fhulufhedzisa khotsi anga Davida mushumeli wau musi u tshi ri: ‘Hu ḓo dzula hu na munna wa lushaka lwau kha khuluṋoni ya Isiraele, arali vharwa vhau vha thetshelesa vha tshimbila phanḓa hanga sa zwe wa ita.’+ 26 Zwino Mudzimu wa Isiraele, ndi humbela uri zwe wa fhulufhedzisa khotsi anga Davida mushumeli wau, zwi itee.

27 “Naa Mudzimu a nga dzula kha ḽifhasi?+ Huufha u sa fheleli kha maṱaḓulu a ḽiṱaḓulu,+ u ḓo fhelela hani kha ino nnḓu ye nda fhaṱa!+ 28 Iwe Yehova Mudzimu wanga, thetshelesa thabelo ya mushumeli wau na zwine a zwi humbela, u thetshelese tshililo tsha u ṱoḓa thuso na thabelo ine mushumeli wau a i rabela phanḓa hau ṋamusi. 29 Ngavhe maṱo au a tshi lavhelesa yeneyi nnḓu vhusiku na masiari, fhethu he wa hu amba wa ri: ‘Dzina ḽanga ḽi ḓo dzula henefha,’+ uri u thetshelese musi mushumeli wau a tshi rabela o lavhelesa henefha fhethu.+ 30 U thetshelese musi mushumeli wau na vhathu vhau vha Isiraele vha tshi humbela u khathutshelwa vho lavhelesa henefha fhethu; ngavhe u tshi vha pfa u hune wa dzula hone ngei ṱaḓulu;+ u vha pfe, u vha hangwele.+

31 “Musi muthu a tshi pomokwa uri o khakhela muṅwe muthu, o khakhelwaho a nga mu anisa. Arali o khakhaho a ḓa phanḓa ha aḽeṱare yau kha yeneyi nnḓu nga nṱhani ha zwe a ana,+ 32 u pfe u ngei ṱaḓulu, u dzhie vhukando, u haṱule vhashumeli vhau nga u vhona muthu muvhi mulandu, u mu hwese mulandu nṱha ha ṱhoho yawe, muvhuya u si mu vhone mulandu, u mu lambedze u ya nga zwivhuya zwawe.+

33 “Musi vhathu vhau vha Isiraele vha tshi kundwa nga swina nge vha u khakhela,+ vha vhuyelela kha iwe vha hulisa dzina ḽau,+ vha rabela vha humbela u khathutshelwa kha yeneyi nnḓu,+ 34 u vha pfe u ṱaḓulu, u hangwele vhathu vhau vha Isiraele zwivhi zwavho, u vha humisele kha shango ḽe wa ḽi ṋea vhomakhulukuku wavho.+

35 “Musi ḽiṱaḓulu ḽo valea hu si na mvula nge vha u khakhela,+ vha rabela vho sedza henefha fhethu,+ vha hulisa dzina ḽau, vha rembuluwa kha zwivhi zwavho nge wa vha ṱukufhadza,+ 36 ngavhe u tshi vha pfa u ṱaḓulu, wa hangwela vhashumeli vhau zwivhi zwavho, vhathu vhau vha Isiraele, ngauri ndi hone u tshi ḓo vha funza+ nḓila yavhuḓi ine vha fanela u tshimbila ngayo; wa nisa mvula shangoni+ ḽau ḽe wa ṋea vhathu vhau sa ifa.

37 “Arali ha vha na nḓala shangoni+ kana malwadze, mufhiso muhulu, muunda,+ guma* ḽa nzie kana nzie dzi sa furi kana arali maswina avho a vha vutshela miḓini kana ha vha na iṅwe ṱhamu kana ḽiṅwe dwadze,+ 38 thabelo naho i ifhio, khumbelo naho i ifhio ya u khathutshelwa+ ine ya itwa nga muthu muthihi kana nga vhathu vhau vhoṱhe vha Isiraele (ngauri muṅwe na muṅwe u a ḓivha thaidzo dzi re mbiluni yawe)+ musi vha tshi imisela zwanḓa zwavho nṱha zwo livhana na yeneyi nnḓu, 39 ngavhe u tshi vha pfa u ṱaḓulu, hune wa dzula hone,+ ngavhe u tshi vha hangwela,+ wa dzhia vhukando; wa lambedza muṅwe na muṅwe zwo mu fanelaho u ya nga nḓila dzawe,+ ngauri u a ḓivha mbilu yawe (ngauri ndi iwe u woṱhe ane a ḓivha mbilu ya muthu muṅwe na muṅwe),+ 40 uri vha u ofhe tshifhinga tshoṱhe musi vha tshi khou dzula shangoni ḽe wa ḽi ṋea vhomakhulukuku washu.

41 “Arali mutsinda ane a si vhe muṅwe wa vhathu vhau vha Isiraele, we a bva shangoni ḽa kule a tshi itiswa nga dzina* ḽau,+ 42 (ngauri vha ḓo pfa nga ha dzina+ ḽau ḽihulu na tshanḓa tshau tsha maanḓa), a ḓa a rabela o lavhelesa yeneyi nnḓu, 43 ngavhe u tshi mu thetshelesa u ṱaḓulu, hune wa dzula hone,+ u ite zwoṱhe zwine mutsinda a u humbela, uri vhathu vhoṱhe vha kha ḽifhasi vha ḓivhe dzina ḽau vha u ofhe,+ sa zwine vhathu vhau vha Isiraele vha zwi ita, vha ḓivhe uri dzina ḽau ḽi vhidzwa kha yeneyi nnḓu ye nda i fhaṱa.

44 “Arali vhathu vhau vha ya u lwa na swina ḽavho nga nḓila ye wa vha ruma ngayo,+ vha rabela+ Yehova vho lavhelesa thungo ya muḓi we wa u nanga,+ vho lavhelesa nnḓu ye nda i fhaṱela dzina ḽau,+ 45 u pfe thabelo dzavho u ngeo ṱaḓulu vha tshi humbela u khathutshelwa, u vha haṱulele.

46 “Arali vha u khakhela (ngauri a hu na a sa khakhi),+ wa vha sinyutshela, wa vha kumedzela swina ḽavho, vhathubi vhavho vha vha isa vhuthubwani shangoni ḽa kule kana ḽa tsini;+ 47 vha rembuluwa musi vhe vhuthubwani,+ vha vhuyelela kha iwe,+ vha humbela u khathutshelwa musi vhe shangoni ḽa vhe vha vha thuba,+ vha ri: ‘Ro khakha, ro tshinya; ro ita tshivhi,’+ 48 vha vhuyelela kha iwe nga mbilu dzavho dzoṱhe+ na nga zwoṱhe zwine vha vha zwone musi vhe shangoni ḽa maswina avho e a vha thuba, vha u rabela vho lavhelesa thungo ya shango ḽavho ḽe wa ḽi ṋea vhomakhulukuku wavho na muḓi we wa u nanga na nnḓu ye nda i fhaṱela dzina ḽau,+ 49 u pfe thabelo dzavho u ngeo ṱaḓulu, hune wa dzula hone,+ vha tshi humbela u khathutshelwa, u vha haṱulele 50 u hangwele vhathu vhau vho u khakhelaho, u vha hangwele vhutshinyi hoṱhe he vha u itela hone. U ite uri vhathubi vhavho vha vha pfele vhuṱungu, vha ḓo vha pfela vhuṱungu+ 51 (ngauri ndi vhathu vhau na ifa ḽau,+ vhe wa vha bvisa Egipita,+ ngomu ṋanḓoni ya hune ha ṋokiswa tsimbi).+ 52 Ngavhe u tshi thetshelesa mushumeli wau na vhathu vhau vha Isiraele musi vha tshi humbela u khathutshelwa,+ u thetshelese tshifhinga tshoṱhe musi vha tshi u rabela.*+ 53 Ngauri wo vha nanga sa ifa ḽau vhukati ha vhathu vhoṱhe vha re kha ḽifhasi,+ samusi wo zwi amba u tshi shumisa Mushe mushumeli wau musi u tshi bvisa vhomakhulukuku washu Egipita, Iwe Yehova Murena Muvhusahoṱhe.”

54 Musi Salomo a tshi fhedza u rabela Yehova na u humbela u khathutshelwa, a takuwa phanḓa ha aḽeṱare ya Yehova, he a vha o gwadama hone o imisela zwanḓa zwawe ṱaḓulu.+ 55 A takuwa a fhaṱutshedza tshivhidzo tshoṱhe tsha Isiraele a amba nga ipfi ḽihulu a ri: 56 “Rendani Yehova, we a ṋea vhathu vhawe vha Isiraele mulalo samusi o vha fhulufhedzisa.+ A hu na na tshithihi tshe tshi si itee kha zwithu zwoṱhe zwe a fhulufhedzisa a tshi shumisa Mushe mushumeli wawe.+ 57 Yehova Mudzimu washu nga a vhe na riṋe samusi o vha e na vhomakhulukuku washu.+ A songo ri laṱa kana u ri ṱutshela.+ 58 Ngavhe a tshi rembulusela mbilu dzashu khae,+ uri ri tshimbile nḓilani dzawe dzoṱhe ri vhulunge ndaela dzawe, maitele awe na khaṱhulo dzawe, zwe a laya vhomakhulukuku washu uri vha zwi tevhedze. 59 Ngavhe enea maipfi anga e nda humbela Yehova uri a ri khathutshele, a tshi nga humbulwa nga Yehova Mudzimu washu vhusiku na masiari, a haṱulele vhashumeli vhawe na vhathu vhawe vha Isiraele ḓuvha ḽiṅwe na ḽiṅwe arali zwi tshi ṱoḓea, 60 uri vhathu vhoṱhe vha re kha ḽifhasi vha ḓivhe uri Yehova ndi Mudzimu wa ngoho.+ A hu na muṅwe!+ 61 U tea u shumela Yehova Mudzimu wau nga mbilu yau yoṱhe+ nga u thetshelesa maitele awe na u tevhedza ndaela dzawe u fana na ṋamusi.”

62 Khosi na Vhaisiraele vhoṱhe vha ṋekedza zwiṱhavhelo zwinzhi phanḓa ha Yehova.+ 63 Salomo a ṋekedza Yehova zwiṱhavhelo zwa u pfumedzana:+ A ṋekedza kholomo dza 22 000 na nngu dza 120 000. Khosi na Vhaisiraele vhoṱhe vha ṋekedza Yehova yeneyo nnḓu.+ 64 Nga ḽeneḽo ḓuvha khosi ya ita uri muṱa wa vhukati u re phanḓa ha nnḓu ya Yehova u vhe mukhethwa, ngauri yo vha i tshi fanela u ṋekedza zwiṱhavhelo zwa u fhiswa, zwifhiwa zwa thoro na zwipiḓa zwa mapfura a zwiṱhavhelo zwa u pfumedzana henefho, ngauri aḽeṱare+ ya koporo ine ya vha phanḓa ha Yehova yo vha i ṱhukhu vhukuma lwe zwiṱhavhelo zwa u fhiswa, zwifhiwa zwa thoro na zwipiḓa zwa mapfura+ a zwiṱhavhelo zwa u pfumedzana zwa vha zwi sa fheleli khayo. 65 Nga tshenetsho tshifhinga, Salomo a ita vhuṱambo+ na Vhaisiraele vhoṱhe, vha re tshivhidzo tshihulu tsha Lebo-hamathi* u swika Muedzini wa Egipita,+ phanḓa ha Yehova Mudzimu washu maḓuvha a 7 na maṅwe maḓuvha a 7, a vha maḓuvha a 14. 66 Nga ḓuvha ḽi tevhelaho a litsha vhathu vha ṱuwa, vha fhaṱutshedza khosi, vha ya mahayani avho vho takalela zwivhuya zwoṱhe+ zwe Yehova a zwi sumbedza Davida mushumeli wawe na vhathu vhawe vha Isiraele.