Yoshua
1 Musi Mushe mushumeli wa Yehova o no fa, Yehova a amba na Yoshua*+ murwa wa Nunu, muḓinḓa+ wa Mushe a ri: 2 “Mushe mushumeli wanga o fa;+ zwino ḓilugiselele u wela Yorodane, iwe na havha vhathu vhoṱhe, u dzhene shangoni ḽine nda khou ṋea vhathu vha Isiraele.+ 3 Fhethu huṅwe na huṅwe hune wa ḓo hu kanda ndi ḓo u ṋea hone, sa zwe nda fhulufhedzisa Mushe.+ 4 Shango ḽau ḽi ḓo bva sogani u swika Libanoni na mulamboni muhulu une wa vha Yufuratha, shango ḽoṱhe ḽa Vhahethe,+ u swika Lwanzheni Luhulu* thungo ya vhukovhela.+ 5 A hu na ane a ḓo u kunda vhutshiloni hau hoṱhe.+ Ndi ḓo vha na iwe samusi ndo vha na Mushe.+ Ndi nga si u laṱe kana u u ṱutshela.”+ 6 Ivha na tshivhindi na maanḓa,+ ngauri ndi iwe ane wa ḓo ita uri havha vhathu vha wane ifa ḽa shango ḽe nda anela vhomakhulukuku wavho uri ndi ḓo vha ṋea ḽone.+
7 “Ivha na tshivhindi na maanḓa, u tevhedze nga vhuronwane milayo yoṱhe ye Mushe mushumeli wanga a u laya. U songo pambutshela kha tsha u ḽa kana kha tsha monde,+ uri zwoṱhe zwine wa ḓo zwi ita u zwi ite nga vhuṱali.+ 8 U songo litsha u amba nga heyi bugu ya Mulayo,+ u tea u i vhalela fhasi* masiari na vhusiku, uri u tevhedze nga vhuronwane zwoṱhe zwo ṅwaliwaho khayo;+ ndi hone nḓila yau i tshi ḓo bvelela, wa ita zwithu nga vhuṱali.+ 9 Ndi khou u laya uri u vhe na tshivhindi na maanḓa. U songo tetemela kana wa ofha, ngauri Yehova Mudzimu wau u na iwe huṅwe na huṅwe hune wa ya.”+
10 Ngauralo, Yoshua a laya vhaḓinḓa a ri: 11 “Tshimbilani ni ye madenndeni, ni laye vhathu ni ri: ‘Lugisani mbuvha, ngauri nga murahu ha maḓuvha mararu ni ḓo wela Yorodane na ya na dzhia shango ḽine Yehova Mudzimu waṋu a khou ni ṋea ḽone uri ḽi vhe ḽaṋu.’”+
12 Yoshua a amba na Vharubeni, Vhagada na hafu ya lushaka lwa Manase a ri: 13 “Ni humbule zwe Mushe mushumeli wa Yehova a ni laya a tshi ri:+ ‘Yehova Mudzimu waṋu u khou ni awedza, o ni ṋea heḽi shango. 14 Vhafumakadzi vhaṋu, vhana vhaṋu na zwifuwo zwaṋu zwi ḓo dzula shangoni ḽe Mushe a ni ṋea ḽone thungo* ino ya Yorodane;+ fhedzi vhahali vhaṋu vhoṱhe+ vha fanela u wela phanḓa ha vhahaṋu vho ḓilugiselela u lwa.+ U tea u vha thusa 15 u swika Yehova a tshi awedza vhahau, samusi na iwe o u awedza, vha dzhia shango ḽe Yehova Mudzimu wau a vha ṋea ḽone. Nga murahu ha zwenezwo, u humele shangoni ḽe wa ṋewa uri u dzule khaḽo, shango ḽe Mushe mushumeli wa Yehova a u ṋea ḽone vhubvaḓuvha ha Yorodane.’”+
16 Vha fhindula Yoshua vha ri: “Ri ḓo ita zwoṱhe zwe wa ri laya, ri ḓo ya huṅwe na huṅwe hune wa ḓo ri ruma hone.+ 17 Samusi ro thetshelesa Mushe kha zwoṱhe, na iwe ri ḓo u thetshelesa. Ngavhe Yehova Mudzimu wau a tshi vha na iwe samusi o vha na Mushe.+ 18 Ane a hanedza zwine wa amba, a si thetshelese ndaela dzau, u ḓo vhulawa.+ Tenda iwe wa vha na tshivhindi na maanḓa.”+