Kha Tito

2 Bvela phanḓa u tshi amba zwine zwa tendelana na pfunzo ya ngoho.*+ 2 Vhanna vhahulwane vha ite zwithu nga u linganyisela, vha dzhiele zwithu nṱha, vha vhe vho tshaho muhumbuloni, vha vhe na lutendo lwo khwaṱhaho, vha vhe na lufuno na u konḓelela. 3 Na vhafumakadzi vhahulwane vha ḓifare nga nḓila i ṱhonifheaho, vha songo tshinya vhaṅwe dzina, vha songo nwesa waini, vha funze zwivhuya, 4 vha eletshedze* vhafumakadzi vhaṱuku uri vha fune vhanna vhavho na u funa vhana vhavho, 5 vha vhe vho tshaho muhumbuloni, vho kunaho, vha ṱhogomele miḓi yavho, vha vhe na vhuthu, vha ḓiṱukufhadze kha vhanna vhavho,+ uri ipfi ḽa Mudzimu ḽi si ambiwe luvhi.

6 Na iwe u dzule u tshi ṱuṱuwedza vhanna vhaṱuku uri vha vhe na muhumbulo wo tshaho.+ 7 U vhe tsumbo ya u ita mishumo mivhuya kha zwoṱhe. U funze zwo kunaho, u sa dzhieli zwithu fhasi,+ 8 u ambe ngoho* ine ya sa ḓo sasaladzwa,+ uri vhane vha hanedza vha shone, vha si vhe na tshiitisi tsha u ri amba luvhi.+ 9 Vhalanda kha vha ḓiṱukufhadze kha vhaṋe vhavho kha zwoṱhe,+ vha lingedze u vha takadza, vha songo vha na tshiambela, 10 vha songo vha tswela,+ fhedzi vha fhulufhedzee kha zwoṱhe, uri vha rendise nga nḓila dzoṱhe pfunzo ya Mudzimu, Mutshidzi washu.+

11 Ngauri vhuthu vhuhulu ha Mudzimu ho vhonala, vhu ita uri vhathu vhoṱhe vha tshidzwe.+ 12 Vhu ri gudisa uri ri iledze zwoṱhe zwine zwa lwisana na zwine Mudzimu a zwi funa na nyemulo dza shango,+ uri ri vhe na muhumbulo wo tshaho na u vha vho lugaho na u ḓikumedzela kha Mudzimu kha ḽino shango,*+ 13 musi ro lindela fhulufhelo ḽavhuḓi+ na u vhonala ha vhugala ha Mudzimu muhulu na ha Kristo Yesu, Mutshidzi washu, 14 we a ḓikumedzela+ a tshi itela u ri vhofholola*+ kha vhutshinyi hoṱhe na uri a kunakise vhathu vhawe vho khetheaho, vha fhisetshelaho mishumo mivhuya.+

15 Bvela phanḓa u tshi funza zwenezwi zwithu na u ṱuṱuwedza na u kaidza nga maanḓa oṱhe.+ U songo tenda u nyadziwa.