Evangeli Ya Luka

11 Ḽiṅwe ḓuvha musi Yesu o no fhedza u rabela, muṅwe wa vhafunziwa vhawe a ri: “Murena, ri funze u rabela samusi Yohane o funza vhafunziwa vhawe.”

2 Ene a ri: “Musi ni tshi rabela ni ri: ‘Khotsi, dzina ḽau nga ḽi vhe ḽikhethwa.*+ Muvhuso wau u ḓe.+ 3 U ri ṋee zwiḽiwa* zwine ra zwi shaya ḓuvha ḽiṅwe na ḽiṅwe.+ 4 U ri hangwele zwivhi zwashu+ samusi na riṋe ri tshi hangwela vho ri khakhelaho,+ u si ri ise milingoni.’”+

5 A amba navho a ri: “Kha ri ri muṅwe waṋu u na khonani, a ya khayo vhukati ha vhusiku a ri, ‘Khonani yanga, nkhadzime ḽofo tharu, 6 ngauri khonani yanga yo ḓa u nndalela, a thi na tshine nda nga mu ṋea tshone.’ 7 Fhedzi uḽa muṅwe a fhindula e nga ngomu nḓuni a ri: ‘Litsha u ndina. Vothi ḽo no valwa, nṋe na vhana vhanga ro no eḓela. Ndi nga si kone u vuwa nda u ṋea zwine wa khou zwi ṱoḓa.’ 8 Ndi a ni vhudza ndi ri, u ḓo vuwa a mu ṋea zwine a zwi ṱoḓa, hu si ngauri ndi khonani yawe, fhedzi ngauri o mu humbela lunzhi-lunzhi.+ 9 Nga zwenezwo ndi ri, dzulani ni tshi humbela,+ ni ḓo ṋewa; dzulani ni tshi ṱoḓa, ni ḓo wana; dzulani ni tshi khokhonya, ni ḓo vulelwa.+ 10 Ngauri ane a humbela u ḓo ṋewa,+ ane a ṱoḓa u ḓo wana, na ane a khokhonya u ḓo vulelwa. 11 Ndi ufhio khotsi ane musi murwa wawe a tshi mu humbela khovhe a mu ṋea ṋowa?+ 12 Kana o humbela kumba, a mu ṋea phame? 13 Arali inwi ni re vhavhi ni tshi kona u ṋea vhana vhaṋu zwifhiwa zwavhuḓi, naa Khotsi wa ṱaḓulu a nga kundelwa u ṋea muya mukhethwa vhane vha mu humbela? Ngangoho u ḓo vha ṋea.”+

14 Nga murahu, a pandela dimoni ḽi itaho uri muthu a si kone u amba.+ Musi ḽeneḽo dimoni ḽo no bva, onoyo muthu a kona u amba, vhathu vha mangala.+ 15 Fhedzi vhaṅwe vha ri: “U pandela madimoni nga maanḓa a Belesebubu,* muvhusi wa madimoni.”+ 16 Musi vhaṅwe vha tshi ṱoḓa u mu linga, vha mu humbela uri a vha itele vhuṱolo+ vhu bvaho ṱaḓulu. 17 Nge Yesu a vha a tshi ḓivha zwine vha khou zwi humbula,+ a amba navho a ri: “Muvhuso wo fhandekanaho u a wa, na nnḓu yo fhandekanaho i a wa. 18 Arali Saṱhane o fhandekana, naa muvhuso wawe u nga ima? Inwi ni ri ndi pandela madimoni nga maanḓa a Belesebubu. 19 Arali ndi tshi pandela madimoni nga maanḓa a Belesebubu, vhana vhaṋu vha a pandela nga maanḓa a nnyi? Ndi ngazwo vhana vhaṋu vha tshi ḓo ni haṱula. 20 Fhedzi arali ndi tshi pandela madimoni nga maanḓa a Mudzimu,*+ zwi amba uri Muvhuso wa Mudzimu wo swika ni si zwi ṱhogomele.+ 21 Musi munna wa maanḓa o ḓiṱamaho a tshi linda nnḓu yawe, thundu yawe i dzula yo tsireledzea. 22 Fhedzi arali muṅwe a re na maanḓa a fhiraho awe a lwa nae a mu kunda, onoyo munna u mu dzhiela zwiṱhavhane zwawe zwoṱhe zwe a vha a tshi zwi fhulufhela, a ṋea vhaṅwe thundu dze a mu dzhiela. 23 Ane a si ime na nṋe u lwa na nṋe, ane a si kuvhanganye na nṋe u a balanganya.+

24 “Musi dimoni ḽi tshi bva kha muthu, ḽi fhira nga sogani ḽi tshi ṱoḓa fhethu ha u awela, fhedzi ḽi si hu wane. Ḽa ri, ‘Ndi ḓo humela nḓuni yanga ye nda bva khayo.’+ 25 Musi ḽi tshi swika, ḽi wana yo kunakiswa na u khavhiswa. 26 Nga zwenezwo, ḽa ya ḽa kunga maṅwe madimoni a sumbe ane a ḽi fhira nga vhuvhi, musi ḽo no vhuya nao, a dzula henefho nḓuni. Zwiimo zwa onoyo muthu zwa ṋaṋa u fhira zwa u thoma.”

27 Musi a tshi kha ḓi amba zwenezwo zwithu, muṅwe mufumakadzi we a vha e vhukati ha vhathu a vhidzelela a ri: “Hu takala mufumakadzi we a u beba na we a u mamisa!”+ 28 Fhedzi Yesu a ri: “Hu takala vhane vha pfa ipfi ḽa Mudzimu, vha tevhedza zwine ḽa amba!”+

29 Musi vhathu vha tshi khou kuvhangana, a ri: “Hoyu murafho muvhi u ṱoḓa u itelwa vhuṱolo. Fhedzi a hu na vhuṱolo vhune wonoyu murafho wa ḓo vhu vhona nga nnḓa ha vhuṱolo he ha itea kha Yona.+ 30 Samusi zwe zwa itea kha Yona zwo vha vhuṱolo kha Vhaninive,+ na zwine zwa ḓo itea kha Murwa muthu zwi ḓo vha vhuṱolo kha wonoyu murafho. 31 Nga ḓuvha ḽa khaṱhulo, khosi ya mufumakadzi i bvaho tshipembe+ i ḓo vuswa na wonoyu murafho, ya u vhona mulandu ngauri yo tshimbila i tshi bva magumoni a ḽifhasi i tshi ḓa u thetshelesa vhuṱali ha Salomo. Fhedzi a fhiraho Salomo u fhano.+ 32 Nga ḓuvha ḽa khaṱhulo, vhathu vha Ninive vha ḓo vuswa na wonoyu murafho, vha u vhona mulandu ngauri vho rembuluwa musi Yona a tshi huwelela.+ Fhedzi a fhiraho Yona u fhano. 33 A hu na ane a nga funga luvhone a lu dzumba kana a lu vhea fhasi ha manngi,+ fhedzi u lu vhea khagala, uri lu vhonetshele vhane vha dzhena. 34 Ḽiṱo ndi tshedza tsha muvhili. Arali ḽiṱo ḽaṋu ḽi tshi vhona zwavhuḓi, na muvhili waṋu woṱhe u ḓo vha na tshedza. Fhedzi arali ḽiṱo ḽaṋu ḽi ḽivhi,* na muvhili waṋu u ḓo vha na swiswi.+ 35 Ni ṱhogomele uri tshedza tshi re kha inwi tshi sa vhe swiswi. 36 Arali muvhili waṋu woṱhe u na tshedza, u ḓo penya woṱhe u fana na luvhone lu tshi vhonetshela.”

37 Musi Yesu a tshi fhedza u amba zwenezwo, Mufarisei a mu humbela uri a ḓe a ḽe nae. A ya nḓuni yawe uri a ḽe nae. 38 Mufarisei a mangala musi a tshi vhona Yesu a tshi ḽa a songo ṱamba* zwanḓa.+ 39 Murena a amba nae a ri: “Inwi Vhafarisei ni nga tshinwelo na ndilo zwo ṱanzwiwaho nga nnḓa, ngeno ngomu no ḓala tseḓa* na vhuvhi.+ 40 Inwi matsilu! O sikaho zwine ra vha zwone nga nnḓa o dovha a sika na zwine ra vha zwone nga ngomu. 41 Musi ni tshi ṋea vhashai zwifhiwa zwi tshi bva mbiluni, ndi hone ni tshi ḓo dzula no kuna. 42 Fhedzi khombo kha inwi Vhafarisei, ngauri ni bvisa tshafumi kha minthi na kha luṋonya na kha miṅwe miroho,+ fhedzi na nyadza mulayo une wa ri ni tea u funa Mudzimu na u haṱula nga nḓila yo teaho. Zwo vha zwo tea uri ni bvise tshafumi kha zwenezwo zwithu, fhedzi ni songo fanela u nyadza mafhungo a ndeme a Mulayo.+ 43 Khombo kha inwi Vhafarisei, ngauri ni funa u dzula zwiduloni zwa phanḓa sinagogoni na u lumeliswa mimakete!+ 44 Khombo kha inwi, ngauri ni fana na mavhiḓa a sa vhonali zwavhuḓi,+ ane vhathu vha tshimbila nṱha hao vha sa zwi ḓivhi!”

45 Muṅwe muḓivhi wa Mulayo a ri: “Mufunzi, u khou ri sema u tshi amba nga u ralo.” 46 Yesu a ri: “Khombo na kha inwi vhaḓivhi vha Mulayo, ngauri ni hwesa vhathu mihwalo i lemelaho, ngeno inwi ni sa funi na u i kwama nga munwe zwawo.+

47 “Khombo kha inwi, ngauri ni vusulusa mavhiḓa a vhaporofita vhe vha vhulawa nga vhomakhulukuku waṋu!+ 48 Ni a ḓivha zwe vhomakhulukuku waṋu vha zwi ita, ni tendelana navho ngauri ni vusulusa mavhiḓa a vhaporofita vhe vha vhulawa nga vhomakhulukuku waṋu.+ 49 Ndi ngazwo Mudzimu o shumisa vhuṱali hawe a ri: ‘Ndi ḓo vha rumela vhaporofita na vhaapostola, vha vha tovhola na u vhulaya vhaṅwe vhavho, 50 uri malofha oṱhe a vhaporofita e a shululwa u bva tshee shango ḽa sikwa a vhilwe kha wonoyu murafho,+ 51 u bva kha malofha a Abele+ u swika kha a Sakaria, we a vhulawa vhukati ha aḽeṱare na thembele.’+ Ngoho ndi a ni vhudza uri, zwi ḓo vhilwa kha wonoyu murafho.

52 “Khombo kha inwi vhaḓivhi vha Mulayo, ngauri no ita uri vhathu vha si ḓivhe nga ha Mudzimu. Ni thivhela vhane vha ṱoḓa u dzhena Muvhusoni wa Mudzimu, ngauri inwi a ni dzheni.”+

53 Musi a tshi khou ṱuwa henefho, vhamaṅwalo na Vhafarisei vha mu kuvhanganela na u mu vhudzisa mbudziso nnzhi-nnzhi, 54 uri vha mu fashe nga zwine a zwi amba.+