Evangeli Ya Yohane
19 Pilato a vhudza maswole uri a dzhie Yesu a mu rwe.+ 2 Maswole a luka khare ya mipfa a mu ambadza kha ṱhoho, a mu ambadza na tshiambaro tsha phephulu,+ 3 a ḓa khae a ri: “Ri a vusa, iwe Khosi ya Vhayuda!” A mu rwa khofheni.+ 4 Pilato a bvela nnḓa a ri: “Ndi khou mu ḓisa kha inwi, a thi mu vhoni mulandu.”+ 5 Yesu a bvela nnḓa o ambara khare ya mipfa na tshiambaro tsha phephulu. Pilato a amba navho a ri: “Vhonani uyu munna.” 6 Musi vhahulwane vha vhotshifhe na vhaḓinḓa vha tshi mu vhona, vha ṱavha mukosi vha ri: “Kha ombelwe kha danda! Kha ombelwe kha danda!”*+ Pilato a amba navho a ri: “Inwi mu dzhieni ni mu vhulaye,* ngauri nṋe a thi mu vhoni mulandu.”+ 7 Vhayuda vha ri: “Ri na mulayo une wa ri u fanela u fa,+ ngauri o ḓiita murwa wa Mudzimu.”+
8 Musi Pilato a tshi pfa zwe vha vha vha tshi khou zwi amba, a ofha zwihulu, 9 a dovha a dzhena nḓuni a amba na Yesu a ri: “U bva ngafhi?” Fhedzi Yesu a si mu fhindule.+ 10 Pilato a ri: “Naa a u mphinduli? Naa a u zwi ḓivhi uri ndi na maanḓa a u u vhofholola kana a u u vhulaya?”* 11 Yesu a ri: “Wo vha u tshi ḓo vha u si na maanḓa kha nṋe arali u vhe u songo tou a ṋewa a tshi bva ṱaḓulu. Ndi ngazwo na o nkumedzelaho kha iwe e na tshivhi tshihulu.”
12 Pilato a tshi pfa zwenezwo a lingedza u wana nḓila dza u mu vhofholola. Fhedzi Vhayuda vha ṱavha mukosi vha ri: “Arali wa vhofholola uyu munna, zwi amba uri a u khonani ya Kesare. Ane a ḓiita khosi u lwa na Kesare.”+ 13 Musi Pilato o no pfa zwine vha khou zwi amba, a bvisela Yesu nnḓa, a dzula hune ha sengiselwa hone Muṱani wa Matombo, hune nga Tshihevheru ha pfi Gabatha. 14 Ḽo vha ḽi ḓuvha ḽa u Lugiselela+ Paseka; hu awara i ṱoḓaho u vha ya vhurathi.* A amba na Vhayuda a ri: “Khosi yaṋu kheyi!” 15 Vha ṱavha mukosi vha ri: “Kha vhulawe! Kha vhulawe! Kha ombelwe kha danda!”* Pilato a ri: “Ndi vhulaye khosi yaṋu?” Vhahulwane vha vhotshifhe vha ri: “Khosi yashu ndi Kesare e eṱhe.” 16 A vha kumedzela Yesu uri vha mu ombele kha danda.+
Vha dzhia Yesu vha ṱuwa nae. 17 Yesu a hwala danda,* a ya fhethu hune ha pfi Dethele,+ hune nga Tshihevheru ha pfi Golgotha.+ 18 Vha ombela Yesu kha danda+ vhukati ha vhaṅwe vhanna vhavhili.+ 19 Pilato a ṅwala na luṅwalo a lu ombela kha danda.* Ho vha ho ṅwaliwa uri: “Yesu wa Nazaretha Khosi ya Vhayuda.”+ 20 Vhayuda vhanzhi vho vhala lwonolwo luṅwalo, ngauri he Yesu a vha o ombelwa hone ho vha hu tsini na muḓi. Lwonolwo luṅwalo lwo vha lwo ṅwaliwa nga Tshihevheru, Tshilatini na Tshigerika. 21 Vhahulwane vha vhotshifhe vha Vhayuda vha amba na Pilato vha ri: “U songo ṅwala uri ‘Khosi ya Vhayuda,’ fhedzi ṅwala uri ene o ri, ‘Nṋe ndi Khosi ya Vhayuda.’” 22 Pilato a ri: “Zwe nda ṅwala ndo ṅwala.”
23 Musi maswole o no ombela Yesu kha danda, a dzhia zwiambaro zwawe a zwi ita zwipiḓa zwiṋa, swole ḽiṅwe na ḽiṅwe ḽa dzhia mukovhe waḽo. Fhedzi tshiambaro tshine tsha ambarwa nga ngomu tsho vha tshi songo ṱumiwa, tsho vha tsho tou lukiwa tshoṱhe. 24 Maswole a ri: “Ri songo tshi kherula, fhedzi kha ri ite madeṅwa uri ri vhone uri tshi ḓo vha tsha nnyi.”+ Zwa ita uri hu itee zwo ṅwaliwaho kha luṅwalo lune lwa ri: “Vha kovhekana zwiambaro zwanga, tshiambaro tshanga vha tshi itela madeṅwa.”+ Ndi zwone zwe maswole a zwi ita.
25 Tsini na danda* ḽe Yesu a ombelwa khaḽo ho vha ho ima mme awe,+ murathu wa mme awe; Maria mufumakadzi wa Klopasi na Maria Magdalena.+ 26 Musi Yesu a tshi vhona mme awe na mufunziwa we a vha a tshi mu funa+ vho ima nga henefho tsini, a amba na mme awe a ri: “Murwa wau khoyu!” 27 A amba na onoyo mufunziwa a ri: “Mme au khoyu!” U bva nga ḽeneḽo ḓuvha onoyo mufunziwa a ṱuwa na mme a Yesu hayani hawe.
28 Musi Yesu a tshi vhona uri zwithu zwoṱhe zwo khunyelela, a ri: “Ndi na ḓora,”+ uri hu itee zwo ṅwaliwaho kha luṅwalo. 29 Ho vha hu na mvuvhelo ye ya vha i na waini i dungaho. Vha dzhia tshipontshi vha tshi mbwandamedza khayo, vha tshi ṱoma kha luṱanga lwa muhisopo* vha tshi vhea mulomoni wawe.+ 30 Musi Yesu o no thetshela yeneyo waini, a ri: “Zwo itea!”+ a kwatamisa ṱhoho a fa.+
31 Samusi ḽo vha ḽi ḓuvha ḽa u Lugiselela+ Savhatha (ngauri ḓuvha ḽi tevhelaho ḽo vha ḽi Savhatha yo khetheaho),+ zwitumbu zwo vha zwi songo fanela u sala kha madanda+ nga Savhatha, ndi ngazwo Vhayuda vho humbela Pilato uri hu vunḓiwe zwenezwo zwitumbu milenzhe na uri zwi tsitsiwe. 32 Maswole a ḓa a vunḓa milenzhe ya vhanna vhavhili vho ombelwaho tsini na Yesu. 33 Musi maswole a tshi swika kha Yesu a wana o no fa, a si vunḓe milenzhe yawe. 34 Fhedzi ḽiṅwe ḽa eneo maswole ḽa mu ṱhavha kha lurumbu nga pfumo,+ ha bva malofha na maḓi. 35 We a zwi vhona ndi ene we a ṋea vhuṱanzi, vhuṱanzi hawe ndi ha ngoho, onoyo u a ḓivha uri zwine a zwi amba ndi ngoho, uri na inwi ni zwi tende.+ 36 Zwo ita uri hu itee zwo ṅwaliwaho kha luṅwalo lune lwa ri: “Ha nga vunḓiwi marambo.”+ 37 Luṅwe luṅwalo lu ri: “Vha ḓo lavhelesa we vha mu ṱhavha.”+
38 Nga murahu ha zwenezwi, Yosefa a bvaho Arimathia a humbela uri a dzhie tshitumbu tsha Yesu kha Pilato. Onoyo Yosefa o vha e mufunziwa wa Yesu wa tshiphirini ngauri o vha a tshi ofha Vhayuda.+ Pilato a mu tendela, a ya a tshi dzhia.+ 39 Nikodemo+ we a vhuya a ya kha Yesu vhusiku, o ḓa o fara zwiputo zwa mira na zwikhopha, zwi ṱoḓaho u vha khilogramu dza 30.*+ 40 Vha dzhia tshitumbu tsha Yesu vha tshi pomba nga malabi a ḽinene a re na yeneyo mishonga,+ u ya nga nḓila ine Vhayuda vha vhulunga ngayo tshitumbu. 41 Fhethu he a vhulayelwa hone ho vha hu na tsimu, yeneyo tsimu yo vha i na vhiḓa ḽiswa,+ ḽe ha vha hu sa athu u vhulungwa muthu khaḽo. 42 Ngauri ḽo vha ḽi ḓuvha ḽa Vhayuda ḽa u Lugiselela+ Savhatha, vha vhulunga Yesu henefho ngauri vhiḓa ḽo vha ḽi nga henefho tsini.