Kha Vhaefesa
4 Nṋe Paulo, ndo farelwaho+ Murena, ndi ni humbela uri ni tshile u tendelana+ na zwe na vhidzelwa zwone, 2 nga u dzula ni tshi ḓiṱukufhadza+ na u vuḓa, u sa fhela mbilu+ na u konḓelelana nga lufuno,+ 3 na u lwela nga mbilu yoṱhe uri ni dzule ni na vhuthihi he na vhu ṋewa nga muya mukhethwa une wa ita uri ni vhe na mulalo.+ 4 Samusi fhulufhelo+ ḽe na vhidzelwa ḽone ḽi ḽithihi, na muvhili ndi muthihi,+ na muya mukhethwa ndi muthihi;+ 5 Murena muthihi, lutendo luthihi+ na ndovhedzo nthihi; 6 Mudzimu muthihi ane a vha Khotsi a vhathu vhoṱhe, ane a vha nṱha ha vhathu vhoṱhe na ane a shuma kha vhoṱhe.
7 Mudzimu o sumbedza roṱhe vhuthu hawe vhuhulu. Zwenezwo zwo vhonala nga nḓila ye Kristo a ri kovhela ngayo tshifhiwa.+ 8 Luṅwalo lu ri: “Musi a tshi gonya nṱha, o vhofholola vho fariwaho, a ruma vhenevho vhanna uri vha vhe zwifhiwa.”+ 9 Maipfi ane a ri “a tshi gonya” a amba mini? A amba uri o thoma a tsela kha ḽifhasi. 10 Onoyo o tsaho ndi ene o gonyaho+ ṱaḓulu,+ uri a khunyeledze zwithu zwoṱhe.
11 O ruma vhaṅwe uri vha vhe vhaapostola,+ vhaṅwe vha vhe vhaporofita,+ vhaṅwe vha vhe vhaevangeli,*+ vhaṅwe vha lise, vhaṅwe vha funze,+ 12 u itela u thusa* vhakhethwa u tshimbila nga nḓila yo teaho, uri vha shumele vhaṅwe, vha fhaṱe muvhili wa Kristo.+ 13 Vha ḓo ri thusa uri ri vhe na vhuthihi kha zwoṱhe zwine ra zwi tenda na u vha na nḓivho yo teaho nga ha Murwa wa Mudzimu, ra vha muthu o vhibvaho,+ ane a fana na Kristo nga nḓila dzoṱhe. 14 Ri si tsha vha vhana, ngauri ane a tevhela pfunzo dza mazwifhi+ dza vhathu vhane vha fhura vhaṅwe, vha tshi shumisa maano a vhukwila, onoyo u nga tshikepe lwanzheni tshine tsha vhudzulwa nga muya, magabelo a tshi tshi isa ngeno na ngei. 15 Fhedzi ri fanela u amba ngoho na u vha na lufuno, ri kone u vha vho vhibvaho kha zwoṱhe, ri tshile u tendelana na Kristo ane a vha ṱhoho.+ 16 Nga nṱhani hawe, miraḓo yoṱhe ya muvhili+ yo itwa tshithu tshithihi na uri i shumisane zwavhuḓi; miraḓo yoṱhe i a thusana, uri i ṋee muvhili zwine wa shaya. Musi miraḓo yoṱhe i tshi shuma zwavhuḓi, zwi ita uri muvhili u aluwe na u khwaṱhiswa nga lufuno.+
17 Ndi ngazwo ndi tshi ni ṱuṱuwedza phanḓa ha Murena na u ni vhudza uri ni songo tsha tshimbila u fana na vha dzitshaka,+ vhane vha tshila u tendelana na mihumbulo yavho i sa vhuyedzi.+ 18 Vha swiswini,* a vha nga wani vhutshilo he Mudzimu a ri fhulufhedzisa hone, ngauri a vha ṱoḓi u ḓivha Mudzimu, mbilu dzavho dzo rindila. 19 A vha tsha shona, vha ita tshivhi vha sa shoni,*+ nga u dzula vha tshi ita vhuyaḓa hoṱhe vha sa fushei.
20 Fhedzi no funzwa uri Kristo ho ngo tou ralo nahone ni a zwi ḓivha, 21 Yesu o funza ngoho, ni a zwi ḓivha zwenezwo, arali no mu pfa na u funzwa ngae. 22 No funzwa uri ni bvule vhumuthu ha kale,+ vhune ha tendelana na nḓila ye na vha ni tshi ḓifara ngayo kale, vhune ha tshikafhadzwa nga nyemulo dza vhufhura.+ 23 Fhedzi ni dzule ni tshi itwa vhaswa kha nḓila ine na humbula ngayo,+ 24 ni ambare vhumuthu vhuswa+ he Mudzimu a vhu ita u tendelana na zwine a zwi funa, nga u luga na u fhulufhedzea.
25 Samusi no litsha vhufhura, noṱhe ni ambe ngoho na muhura waṋu,+ ngauri ri miraḓo ya muvhili muthihi.+ 26 Sinyuwani, fhedzi ni songo ita tshivhi;+ ḓuvha ḽi songo kovhela ni tshee no sinyuwa;+ 27 ni songo ṋea Diabolo vhudzulo.+ 28 Ane a tswa a songo tsha tswa; nṱhani hazwo nga a shume nga maanḓa, a ite mishumo yavhuḓi nga zwanḓa zwawe,+ uri a vhe na zwine a kovhela ane a shaya.+ 29 Ni songo amba zwo sinaho,+ fhedzi ni ambe zwithu zwavhuḓi zwine zwa fhaṱa nga hune zwa ṱoḓea ngaho, uri zwi vhuyedze vho thetshelesaho.+ 30 Zwiṅwe hafhu, ni songo ṱungufhadza* muya mukhethwa wa Mudzimu,+ we na swaiwa+ ngawo u itela ḓuvha ḽa u vhofhololwa nga tshirengululi.+
31 Litshani vhuhali,+ u sinyuwa, mbiti, u zhamba, maṱamba+ na vhuvhi hoṱhe.+ 32 Fhedzi ni sumbedzane vhuthu, ni pfelane vhuṱungu,+ ni hangwelane zwi tshi bva mbiluni samusi na Mudzimu o ni hangwela zwi tshi bva mbiluni nga Kristo.+