Evangeli Ya Marko

5 Vha wela seli ha lwanzhe vha swika dzinguni ḽa Gerasini.+ 2 Musi Yesu a tshi tou tsa tshikepeni, a ṱangana na munna a re na dimoni a tshi khou bva mavhiḓani. 3 Onoyo munna o vha a tshi dzula mavhiḓani, hu si na ane a nga kona u mu vhofha na nga ngeḓane. 4 O vha o no vhofhiwa lunzhi nga ngeḓane, fhedzi a tshi dzi ṱhukhula, hu si na ane a vha na maanḓa a u mu fara. 5 O vha a tshi ṱavha mukosi mavhiḓani na dzithavhani vhusiku na masiari, a tshi ḓikanḓa nga matombo. 6 Musi a tshi tou vhona Yesu a tshee kulenyana, a mu gidimela a swika a mu losha.+ 7 A ṱavha mukosi muhulu a ri: “Wo ḓela mini iwe Yesu, Murwa wa Mudzimu Wa-Ṱaḓulu-ṱaḓulu? Ndi a u anisa nga Mudzimu uri u songo ntambudza.”+ 8 Ngauri Yesu o vha a tshi khou amba naḽo a tshi ri: “Iwe dimoni, ibva kha hoyu munna.”+ 9 Yesu a ḽi vhudzisa a ri: “U pfi nnyi?” Ḽa fhindula ḽa ri: “Ndi pfi Mmbi ngauri ri vhanzhi.” 10 Eneo madimoni a humbela Yesu lunzhi uri a songo a pandela kha ḽeneḽo shango.+

11 Ho vha hu na nguluvhe+ dze dza vha dzi tshi khou ḽa henefho thavhani.+ 12 Madimoni a mu humbela a ri: “Ri rumele kha nguluvhe uri ri dzhene khadzo.” 13 Yesu a a tendela. Madimoni a bva a dzhena kha nguluvhe dzi ṱoḓaho u vha 2 000, dza gidimela luwani dza wela lwanzheni, dza fela henefho. 14 Vhalisa vhadzo vha shavha, vha ya muḓini na mivhunduni ya henefho vha amba zwoṱhe zwe zwa itea, vhathu vha ḓa vha vhona.+ 15 Vha ḓa kha Yesu, vha vhona munna we a vha e na mmbi ya madimoni o dzula henefho o ambara, a si tsha lwala, vha tshuwa. 16 Na vhe vha zwi vhona vha vha ṱalutshedza zwe zwa itea kha dzinguluvhe na kha munna we a vha e na madimoni. 17 Vha humbela Yesu uri a ṱuwe dzinguni ḽavho.+

18 Musi Yesu a tshi khou ṋamela tshikepe, uḽa munna we a vha e na madimoni a humbela u ṱuwa nae.+ 19 Fhedzi a si tende u ṱuwa nae, a amba nae a ri: “Iya kha mashaka au, u vha vhudze zwithu zwoṱhe zwe Yehova* a u itela zwone na nḓila ye a u khathutshela ngayo.” 20 Onoyo munna a ṱuwa a ya a ḓivhadza Dikapoli* zwoṱhe zwe Yesu a mu itela zwone, vhathu vhoṱhe vha mangala.

21 Musi Yesu o no dovha a wela seli ha lwanzhe nga tshikepe, vhathu vhanzhi vha mu kuvhanganela, ene e tsini na lwanzhe.+ 22 Muṅwe wa vhahulwane vha sinagogo, ane a pfi Yairo, a ḓa, musi a tshi vhona Yesu, a gwadama milenzheni yawe.+ 23 A mu humbela lunzhi-lunzhi a ri: “Ṅwananyana wanga u khou lwala nga maanḓa.* Ndi khou humbela uri u ḓe u mu vhee zwanḓa+ uri a fhole.” 24 Yesu a ṱuwa nae, gogo ḽa mu tevhela ḽi tshi khou mu kwanyeledza.

25 Ho vha hu na muṅwe mufumakadzi we a vha o no fhedza miṅwaha ya 12+ o farwa nga vhulwadze ha u shuluwa malofha.+ 26 O vha o no tambula zwihulu a tshi gidima na madokotela manzhi, o fhedza tshelede yawe yoṱhe a sa fholi, fhedzi vhulwadze hawe ha tou ṋaṋa. 27 Musi a tshi pfa nga zwe Yesu a zwi ita, a ḓa khae nga murahu a tshi tou vhanyuludza a kwama tshiambaro tshawe,+ 28 ngauri o vha a tshi dzula a tshi ri: “Arali nda tou kwama fhedzi zwiambaro zwawe, ndi ḓo fhola.”+ 29 Nga u ṱavhanya vhulwadze hawe ha fhola, a zwi pfa muvhilini wawe uri o fhola.

30 Nga u ṱavhanya Yesu a pfa uri maanḓa o bva khae,+ a rembuluwa a lavhelesa gogo a ri: “Ndi nnyi o kwamaho zwiambaro zwanga?”+ 31 Fhedzi vhafunziwa vhawe vha ri: “Ndi ngani u tshi ri, ‘Ndi nnyi o nkwamaho, ngeno u tshi khou zwi vhona uri gogo ḽi khou u kwanyeledza?’” 32 Fhedzi ene a sedza thungo dzoṱhe uri a vhone we a mu kwama. 33 Nga u ḓivha zwe zwa itea khae, onoyo mufumakadzi a ḓa o tshuwa a tshi khou tetemela, a gwadama phanḓa hawe a mu vhudza zwoṱhe. 34 Yesu a amba nae a ri: “Ṅwananga, lutendo lwau lwo u fhodza. Ṱuwa nga mulalo,+ u fhole.”+

35 Musi Yesu a tshi kha ḓi amba, ha swika vhaṅwe vhanna vha bvaho hayani ha muhulwane wa sinagogo, vha ri: “U songo tsha dina Mufunzi, ṅwananyana wau o lovha!”+ 36 Musi Yesu a tshi pfa zwe vha zwi amba, a amba na muhulwane wa sinagogo a ri: “U songo ofha, ivha na lutendo.”+ 37 A ṱuwa na Petro, Yakobo na Yohane, vhane vha vha murathu na mukomana. A si tende vhaṅwe vha tshi mu tevhela.+

38 Vha swika muḓini wa muhulwane wa sinagogo, Yesu a vhona vhathu vho vusa bonyongo vha tshi khou lila, vhaṅwe vha tshi khou ṱavha mukosi.+ 39 Musi a tshi tou dzhena, a amba navho a ri: “Ndi ngani no vusa bonyongo ḽingafha ni tshi khou lila? Ṅwana ho ngo fa, o eḓela.”+ 40 Musi vha tshi pfa zwenezwo vha mu sea na u mu goḓa. Fhedzi musi o no bvisela vhathu vhoṱhe nnḓa, a dzhia vhabebi vha uyo ṅwana na vhe a vha e navho, a dzhena he ṅwana a vha e hone. 41 Nga zwenezwo, a fara tshanḓa tsha onoyo ṅwana a ri: “Thalita kumi,” zwine zwa amba uri: “Ṅwananyana, vuwa!”+ 42 Nga u ṱavhanya ṅwananyana a vuwa a thoma u tshimbila. (O vha e na miṅwaha ya 12.) Vha takala vhukuma. 43 A vha vhudza lunzhi-lunzhi* uri vha songo vhudza muthu enea mafhungo,+ a amba uri vha ṋee onoyo ṅwananyana zwiḽiwa.