Bugu Ya U Thoma Ya Koronika

29 Khosi Davida a amba na tshivhidzo tshoṱhe a ri: “Murwa wanga Salomo, we a nangiwa+ nga Mudzimu, u tshee muṱuku, ha na tshenzhelo,*+ mushumo ndi muhulu, ngauri a si thembele* ya muthu, fhedzi ndi ya Yehova Mudzimu.+ 2 Ndo shuma nga maanḓa u itela u lugiselela nnḓu ya Mudzimu wanga, ndo ḓisa musuku wa u ita zwishumiswa zwa musuku, siḽiva ya u ita zwishumiswa zwa siḽiva na koporo ya u ita zwishumiswa zwa koporo, tsimbi ya u ita zwishumiswa zwa tsimbi,+ matanda+ a u ita zwishumiswa zwa mabulannga, matombo a onikisi, matombo a u khavhisa, matombo a mivhala-vhala, mifuda yoṱhe ya matombo a mutengo muhulu na matombo manzhi a alabasita. 3 Zwiṅwe hafhu, nga nṱhani ha uri ndi funa nnḓu ya Mudzimu wanga,+ hu dovha ha vha na lupfumo+ lwanga lwa musuku na lwa siḽiva lune nda khou lu bvisela nnḓu ya Mudzimu wanga, u engedza kha zwoṱhe zwe nda zwi lugiselela nnḓu khethwa, 4 u katela na talente* dza 3 000 dza musuku u bvaho Ofiri+ na talente dza 7 000 dza siḽiva yo kunakiswaho ya u ḓodza mbondo dza dzinnḓu, 5 musuku wa u ita zwishumiswa zwa musuku na siḽiva ya u ita zwishumiswa zwa siḽiva, na mushumo woṱhe une wa ḓo itwa nga vhanna vha re na vhutsila. Zwino ndi vhonnyi vhane vha ḓo ṋea Yehova tshifhiwa nga u ḓifunela ṋamusi?”+

6 Ngauralo, vhakololo vha miṱa ya vhokhotsi, vhakololo vha tshaka dza Isiraele, vhane vha ranga phanḓa vha zwigidi na vha maḓana+ na vharangaphanḓa vha mishumo ya khosi+ vha bvisa zwifhiwa nga u ḓifunela. 7 Vha bvisela mushumo wa nnḓu ya Mudzimu wa ngoho talente dza musuku dza 5 000, dariki* dza 10 000, talente dza siḽiva dza 10 000, talente dza koporo 18 000 na talente dza tsimbi dza 100 000. 8 Muṅwe na muṅwe we a vha e na matombo a mutengo muhulu a a bvisa a vha a mbulungelo ya nḓuni ya Yehova, ine ya ṱhogomelwa nga Yehiele+ wa Mugerisoni.+ 9 Vhathu vho takalela u bvisa zwenezwo zwifhiwa zwa u ḓifunela, ngauri vho bvisela Yehova zwifhiwa zwa u ḓifunela nga mbilu yoṱhe,+ Khosi Davida na ene a takala nga ma⁠anḓa.

10 Nga murahu Davida a renda Yehova phanḓa ha tshivhidzo tshoṱhe a ri: “Nga hu rendwe Iwe Yehova Mudzimu wa Isiraele khotsi ashu, u ya nga hu sa fheli.* 11 Iwe Yehova, vhuhulu,+ maanḓa,+ lunako, vhuḓi na vhugala*+ ndi zwau, ngauri zwoṱhe zwi re ṱaḓulu na kha ḽifhasi ndi zwau.+ Iwe Yehova,+ muvhuso ndi wau. Ndi iwe ane wa ḓihulisa samusi u tshi vhusa zwithu zwoṱhe. 12 Lupfumo na vhugala zwi bva kha iwe,+ iwe u vhusa tshiṅwe na tshiṅwe,+ nungo+ na maanḓa+ zwi zwanḓani zwau, tshanḓa tshau tshi a kona u ita zwihulu+ na u ṋea vhoṱhe nungo.+ 13 Iwe Mudzimu washu, ri a u livhuwa na u renda dzina ḽau ḽavhuḓi.

14 “Zwino nṋe ndi tou vha mini na vhathu vhanga vha tou vha mini lune ra vha vhuimoni ha u bvisa zwenezwi zwifhiwa zwoṱhe nga u ḓifunela? Ngauri tshiṅwe na tshiṅwe tshi bva ha iwe, ro u ṋea zwine zwa bva tshanḓani tshau. 15 Ngauri ri vhatsinda phanḓa hau, u fana na vhomakhulukuku washu vhoṱhe.+ Ngauri maḓuvha ashu fhano kha ḽifhasi a fana na murunzi,+ a hu na fhulufhelo. 16 Iwe Yehova Mudzimu washu, lupfumo holwu lwoṱhe lwe ra lu lugiselela u itela u fhaṱela dzina ḽau ḽikhethwa nnḓu lu bva zwanḓani zwau, zwoṱhe ndi zwau. 17 Iwe Mudzimu wanga, ndi a zwi ḓivha zwavhuḓi uri u ṱolisisa mbilu+ na uri u takalela u fhulufhedzea.*+ Nga u luga* ha mbilu yanga, ndo ṋekedza hezwi zwithu zwoṱhe nga u ḓifunela, ndo takala nga ma⁠anḓa u vhona vhathu vhau vha re hone fhano vha tshi u bvisela zwifhiwa nga u ḓifunela. 18 Iwe Yehova, Mudzimu wa Abrahamu, Isaka na Isiraele vhomakhulukuku washu, thusa avha vhathu uri vha dzule vha tshi ṋea nga u ḓifunela na u u shumela nga mbilu dzavho dzoṱhe.+ 19 U ṋee Salomo murwa wanga mbilu yo fhelelaho,*+ uri a tevhedze ndaela dzau,+ khumbudzo dzau, maitele au, a ite zwenezwi zwoṱhe, a fhaṱe thembele* ye nda ita ndugiselelo dzayo.”+

20 Davida a amba na tshivhidzo a ri: “Zwino rendani Yehova Mudzimu waṋu.” Vhathu vha tshivhidzo tshoṱhe vha renda Yehova Mudzimu wa vhomakhulukuku wavho, vha khotha vha luvha Yehova na khosi. 21 Vha bvela phanḓa vha tshi ṋekedza Yehova zwiṱhavhelo, vha ṋekedza Yehova zwifhiwa zwa u fhiswa+ nga ḓuvha ḽi tevhelaho, vha ṋekedza mbohwana dza 1 000, thutha dza 1 000, ngwana dza nduna dza 1 000 na zwifhiwa zwavho zwa u nwiwa;+ vha ṋekedza zwiṱhavhelo zwinzhi vha tshi itela Vhaisiraele vhoṱhe.+ 22 Vha bvela phanḓa vha tshi ḽa na u nwa phanḓa ha Yehova nga ḽeneḽo ḓuvha vho takala nga maanḓa,+ vha ḓivhadza lwa vhuvhili uri Salomo murwa wa Davida ndi khosi, vha mu ḓodza phanḓa ha Yehova uri a vhe murangaphanḓa,+ vha dovha vha ḓodza na Tsadoko uri a vhe tshifhe.+ 23 Salomo a dzula kha khuluṋoni+ ya Yehova vhudzuloni ha khotsi awe Davida, zwa mu tshimbilela zwavhuḓi, Vhaisiraele vhoṱhe vho vha vha tshi mu thetshelesa. 24 Vhakololo vhoṱhe,+ vhahali+ na vhaṅwe vharwa vhoṱhe vha Khosi Davida+ vha ḓiṱukufhadza kha Khosi Salomo. 25 Yehova a hulisa Salomo zwihulu phanḓa ha Vhaisiraele vhoṱhe, a mu ṋea vhugala vhuhulu he ha vha vhu sa athu u ṋewa khosi naho i ifhio ye ya vhusa Isiraele nga phanḓa hawe.+

26 Davida murwa wa Isai o vhusa ḽoṱhe ḽa Isiraele, 27 o vhusa Isiraele miṅwaha ya 40. O vhusa miṅwaha ya 7+ e Heburoni, a vhusa ya 33 e Yerusalema.+ 28 O fa o no lalama,+ o fushea nga vhutshilo, lupfumo na vhugala; murwa wawe Salomo a vha khosi vhudzuloni hawe.+ 29 Mafhungo a Khosi Davida, u bva mathomoni u swika magumoni, o ṅwaliwa kha mafhungo a Samuele wa muvhoni, muporofita Nathani+ na Gada+ wa muvhoni, 30 khathihi na vhuhosi hoṱhe, maanḓa awe na zwiitea zwa tshifhingani tshawe na tsha Vhaisiraele na mivhuso yoṱhe ya mashango.