Vhurifhi Ha U Thoma Vhu Yaho Kha Timotheo

1 Nṋe Paulo, muapostola wa Kristo Yesu we a nangwa nga Mudzimu ane a vha Mutshidzi washu na nga Kristo Yesu fhulufhelo ḽashu,+ 2 ndi ṅwalela Timotheo,*+ mutendi nga nṋe ane a nga ṅwananga+ ndi ri:

Ngavhe Mudzimu Khotsi ashu na Kristo Yesu Murena washu vha tshi u sumbedza vhuthu vhuhulu, vha u khathutshela na u ita uri u vhe na mulalo.

3 Samusi ndo u humbela uri u dzule Efesa musi ndi tsini na u ya Makedonia, zwino ndi humbela uri u laye vhaṅwe uri vha si funze pfunzo dza mazwifhi, 4 kana u thetshelesa mazwifhi+ na u ṱoḓa u ḓivha mutevhe wa lushaka. Zwenezwo zwithu a zwi vhuyedzi,+ ngauri a zwi bvi kha Mudzimu, a zwi khwaṱhisi lutendo, zwi tou ita uri muthu a vhe na dzimbudziso. 5 Ndi tshi laya nga u ralo, ndi itela uri ri fune+ nga mbilu yo kunaho na nga luvalo lwavhuḓi na nga lutendo+ lu si na muhoyo. 6 Nga u sa ita zwenezwi vhaṅwe vha vho amba zwi sa vhuyedzi.+ 7 Vha ṱoḓa u vha vhafunzi+ vha mulayo, fhedzi a vha pfesesi zwine vha zwi amba kana zwine vha zwi funza vha sa ofhi.

8 Ri a zwi ḓivha uri Mulayo ndi wavhuḓi arali u tshi shumiswa nga nḓila yo teaho, 9 ngauri mulayo a wo ngo vhetshelwa vho lugaho, fhedzi wo vhetshelwa vhane vha pfuka mulayo+ na mashandukwa, vha sa ofhi Mudzimu na vhaitazwivhi, vha sa fhulufhedzei, vhane vha nyadza zwikhethwa, vhane vha vhulaya vhokhotsi na vhomme kana vhaṅwe vhathu, 10 vhane vha ḓifara luvhi nga zwa vhudzekani,* vhanna vhane vha ita zwa vhudzekani na vhaṅwe vhanna, vhane vha tswa vhathu, vhane vha zwifha, vhane vha ana nga mazwifhi, na zwoṱhe zwi lwisanaho na pfunzo ya ngoho.*+ 11 Yeneyi pfunzo i bva kha Mudzimu o takalaho, u tendelana na vhugala ha mafhungo maḓifha, e nda ṋewa one.+

12 Ndi livhuwa Kristo Yesu Murena washu, we a nṋea maanḓa, ngauri o ndzhia ndi tshi fhulufhedzea a nṋea mushumo mukhethwa,+ 13 naho ndo vha ndi tshi semana, ndi mutovholi, ndi na vhuhali.+ Naho zwo ralo, ndo khathutshelwa, ngauri ndo zwi ita nga u sa ḓivha na u sa vha na lutendo. 14 Murena washu o ntsumbedza vhuthu vhuhulu vhukuma, ndi na lutendo na lufuno ngauri ndi mufunziwa wa Kristo Yesu. 15 Kristo Yesu o ḓa shangoni uri a tshidze vhaitazwivhi.+ Zwine nda khou zwi amba ndi ngoho, zwo tea u ṱanganedzwa nga mbilu yoṱhe. Nṋe ndi muvhi u fhira vhaitazwivhi vhoṱhe.+ 16 Fhedzi nṋe ane a vha muitazwivhi u fhira vhoṱhe ndo khathutshelwa, uri Kristo Yesu a sumbedze u sa fhela mbilu hawe hoṱhe uri zwi vhe tsumbo kha vhane vha ḓo mu tenda uri vha wane vhutshilo vhu sa fheli.+

17 Nga hu huliswe Khosi ya lini na lini,+ ine ya tshila nga hu sa fheli,+ i sa vhonali,+ ene Mudzimu e eṱhe,+ a ṋewe vhugala ha lini na lini. Amen.

18 Timotheo ṅwananga, ndi khou u laya u tendelana na vhuporofita he ha ambiwa nga ha iwe, vhune ha ḓo u thusa uri u kone u bvela phanḓa u tshi lwa nndwa yo teaho,+ 19 u na lutendo na luvalo lwavhuḓi,+ zwe vhaṅwe vha zwi laṱa, zwa ita uri lutendo lwavho lu tshinyale u fana na tshikepe tsho kwasheaho. 20 Himeneo+ na Alekzanda ndi vhaṅwe vhavho, ndo vha kumedzela Saṱhane*+ uri vha kaidzwe vha si seme Mudzimu.