Evangeli Ya Luka

14 Ḽiṅwe ḓuvha nga Savhatha, Yesu a ya kha iṅwe nnḓu ya muṅwe wa vharangaphanḓa vha Vhafarisei u itela u ḽa zwiḽiwa, vha re henefho vho vha vho mu sedza. 2 Henefho ho vha hu na munna a re na vhulwadze ha u zwimba muvhili.* 3 Yesu a vhudzisa vhaḓivhi vha Mulayo na Vhafarisei a ri: “Naa u fhodza nga Savhatha zwo tendelwa?”+ 4 Vhone vha sokou fhumula. A fhodza onoyo munna, a ri a ṱuwe. 5 A vha vhudzisa a ri: “Ndi nnyi ane arali murwa wawe kana kholomo yawe yo wela dindini,+ a si ṱavhanye a i bvisa nga ḓuvha ḽa Savhatha?”+ 6 Vha si mu fhindule.

7 Musi a tshi vhona vhathu vha tshi nanga zwidulo zwa phanḓa,+ a vhudza vho rambiwaho tshifanyiso, a ri: 8 “Arali muṅwe muthu o u ramba munyanyani wa mbingano, u songo dzula zwiduloni zwa phanḓa.+ Khamusi o ramba na muthu wa ndeme u u fhira. 9 Musi we a u ramba a tshi ḓa, a amba na iwe a ri, ‘Takuwa hu dzule hoyu munna.’ U ḓo shona musi u tshi ya u dzula zwiduloni zwa murahu. 10 Fhedzi musi wo rambiwa, u dzule zwiduloni zwa murahu, uri we a u ramba a tshi swika a kone u amba na iwe a ri, ‘Khonani yanga, takuwa u ye u dzule phanḓa.’ Ndi hone u tshi ḓo vha wo huliswa phanḓa ha vhathu vhoṱhe vho rambiwaho.+ 11 Ane a ḓihudza u ḓo ṱukufhadzwa, ane a ḓiṱukufhadza u ḓo huliswa.”+

12 Yesu a amba na we a mu ramba a ri: “Musi u tshi lugiselela u ḽa tshiswiṱulo kana tshilalelo, u songo vhidza khonani dzau, vharathu vhau, mashaka au na vhahura vhau vho pfumaho. Ngauri navho vha nga kha ḓi u ramba. 13 Musi u na munyanya, u rambe vhashai, vho holefhalaho, vha ṱudzaho na vha sa vhoni;+ 14 ndi hone u tshi ḓo takala, ngauri vha nga si kone u u ramba. Fhedzi iwe u ḓo wana malamba musi hu tshi vusiwa+ vho lugaho.”

15 Muṅwe we a vha o rambiwa a tshi pfa zwenezwo a ri: “Hu takala ane a ḽa zwiḽiwa* Muvhusoni wa Mudzimu.”

16 Yesu a amba nae a ri: “Muṅwe munna o vha o ita munyanya muhulu,+ o ramba vhathu vhanzhi. 17 A ruma mulanda wawe nga tshifhinga tsha zwiḽiwa uri a ambe na vho rambiwaho a ri, ‘Iḓani ngauri zwithu zwo no luga.’ 18 Fhedzi vhoṱhe vha hana.+ Wa u thoma a ri, ‘Ndo renga tsimu, ndi khou ṱoḓa u ya u i vhona; mpfarele, a thi nga ḓo kona u swika.’ 19 Muṅwe a ri, ‘Ndo renga kholomo dza fumi, ndi kha ḓi ya u dzi sedza; mpfarele, a thi nga ḓo kona u swika.’+ 20 Muṅwe a ri, ‘Ndi kha ḓi tou bva u vhinga, ndi nga si kone u ḓa.’ 21 Mulanda a ya a vhudza muṋe wawe zwe zwa itea. Muṋe wa nnḓu a sinyuwa, a amba na mulanda wawe a ri, ‘Ṱavhanya u ye dzinḓilani, u vhidze vhashai, vho holefhalaho, vha sa vhoni na vha ṱudzaho.’ 22 Musi mulanda a tshi vhuya a ri, ‘Muṋe wanga, ndo ita zwe wa nndaedza, fhedzi hu kha ḓi vha na vhudzulo.’ 23 Muṋe a amba na mulanda a ri, ‘Iya nḓilani dzi re kule na muḓi, u humbele vhathu uri vha ḓe uri nnḓu yanga i ḓale.+ 24 Ndi a u vhudza ndi ri, a hu na na muthihi kha vhe nda vha ramba vha hana ane a ḓo thetshela tshilalelo tshanga.’”+

25 Musi a tshi khou tshimbila na gogo, a rembuluwa a amba naḽo a ri: 26 “Ane a ṱoḓa u vha mufunziwa wanga u fanela u mpfuna u fhira* ene muṋe, khotsi awe, mme awe, mufumakadzi wawe, vhana vhawe, vharathu vhawe na khaladzi dzawe.+ A sa ralo, a nga si vhe mufunziwa wanga.+ 27 Ane a si hwale danda* ḽawe a ntevhela a nga si vhe mufunziwa wanga.+ 28 Ndi nnyi ane a tshi ṱoḓa u fhaṱa mutsheṱo a si thome a vhalela u itela u vhona arali e na tshelede yo eḓanaho u fhedza mushumo? 29 Arali a sa ita nga u ralo, a nga thoma tshifhaṱo a vho kundwa u tshi fhedza, a vho goḓiwa nga vhoṱhe vha zwi vhonaho, 30 vha ri: ‘Hoyu munna o thoma u fhaṱa, fhedzi ha tsha kona u fhedzisa.’ 31 Kana ndi ifhio khosi i re na maswole a 10 000 ine ya ri i tshi ya u lwa na iṅwe khosi i re na maswole a 20 000, ya si thome ya amba na vhaeletshedzi vhayo u itela u vhona arali i tshi nga kunda? 32 Arali i tshi vhona uri i nga si kunde, i ḓo rumela vhaimeleli vhayo uri vha pfumedzane na yeneyo khosi musi i tshi kha ḓi vha kule. 33 Nga hu fanaho, ni nga si vhe mufunziwa wanga arali ni sa ṱutsheli thundu dzaṋu dzoṱhe.+

34 “Muṋo ndi wavhuḓi, fhedzi arali muṋo u si tsha pfala uri ndi muṋo, u nga itwa mini uri u dovhe u pfale?+ 35 U nga si tsha shelwa mavuni kana u ṱanganyiswa na manyoro, tshawo ndi u laṱwa. A re na nḓevhe nga a pfe.”+