Muhuweleli

8 Ndi nnyi ane a fana na wa vhuṱali? Ndi nnyi ane a nga piringulula thaidzo?* Vhuṱali ha muthu vhu vhonetshela tshifhaṱuwo tshawe, ha ita uri tshi si tsha sinyalala.

2 Ndi ri: “Tevhedza ndaela dza khosi+ u tshi ṱhonifha muano we wa u anela Mudzimu.+ 3 U songo ṱavhanya wa ṱuwa phanḓa hayo.+ U songo imelela zwithu zwivhi;+ ngauri khosi i nga ita tshiṅwe na tshiṅwe tshine ya funa, 4 ngauri zwe khosi ya amba a zwi nga shanduki;+ ndi nnyi ane a nga amba nayo a ri: ‘U khou ita mini?’”

5 Ane a tevhedza ndaela ha nga huvhadzwi,+ mbilu yo ṱalifhaho i ḓivha tshifhinga tsho teaho na maitele.+ 6 Mafhungo maṅwe na maṅwe a na tshifhinga tshao na maitele ao,+ ngauri maṱungu a vhathu ndi manzhi. 7 Samusi hu si na ane a ḓivha zwine zwa ḓo itea, ndi nnyi ane a nga amba uri zwi ḓo itea nga nḓila-ḓe?

8 Samusi muthu a si na maanḓa a u langa muya* kana u u thivhela, a hu na ane a vha na maanḓa a u langa ḓuvha ḽa lufu.+ Samusi hu si na ane a vhofhololwa nga tshifhinga tsha nndwa, vhuvhi vhu nga si tendele vhane vha vhu ita vha tshi ponyoka.*

9 Ndo zwi vhona zwoṱhe, mbilu yanga ya elekanya mishumo yoṱhe ine ya itwa fhano fhasi ha ḓuvha, hune muthu a vhusa muṅwe a mu huvhadza.+ 10 Ndo vhona vhavhi vha tshi vhulungwa, vha dzulelaho u dzhena na u bva fhethu hukhethwa, fhedzi vho hangwiwa muḓini we vha vha vha tshi ita zwenezwo.+ Na zwenezwi ndi mahandana.

11 Nga nṱhani ha uri mishumo mivhi a yo ngo haṱulwa nga u ṱavhanya,+ ndi ngazwo mbilu dza vhathu dzo ḓiimisela u ita vhuvhi.+ 12 Naho muitazwivhi a tshi nga ita vhuvhi lwa ḓana a ḓi lalama, fhedzi ndi a zwi ḓivha uri vhane vha ofha Mudzimu wa ngoho zwi ḓo vha tshimbilela, ngauri vha a mu ofha.+ 13 Fhedzi muvhi zwi nga si mu tshimbilele,+ a nga si engedze maḓuvha awe ane a nga murunzi,+ ngauri ha ofhi Mudzimu.

14 Hu na zwiṅwe zwithu zwa mahandana zwine zwa bvelela kha ḽifhasi: Hu na vho lugaho vhane vha farwa sa vhavhi,+ hu na vhavhi vhane vha farwa sa vho lugaho.+ Ndi ri na zwenezwi ndi mahandana.

15 Ndi khoḓa u takala,+ ngauri a hu na tshithu tshi re khwine kha muthu fhano fhasi ha ḓuvha u fhira u ḽa na u nwa na u ḓiphiṋa; ngavhe muthu a tshi vha na zwenezwi zwithu musi a tshi khou shuma nga maanḓa tshifhingani tsha maḓuvha a vhutshilo hawe,+ e a ṋewa nga Mudzimu wa ngoho fhano fhasi ha ḓuvha.

16 Ndo elekanya mbiluni yanga uri ndi wane vhuṱali na uri ndi vhone zwithu zwoṱhe zwine zwa khou itea kha ḽifhasi,+ ndo vha ndi sa eḓeli vhusiku na masiari. 17 Nda vhona mishumo yoṱhe ya Mudzimu wa ngoho, nda wana uri vhathu vha nga si kone u pfesesa zwine zwa itea fhano fhasi ha ḓuvha.+ Naho vhathu vha lingedza u ita vhuḓidini, vha nga si kone u zwi pfesesa. Naho vha amba uri vho ṱalifha nga maanḓa lune vha nga zwi ḓivha, vha nga si kone u zwi pfesesa zwa vhukuma.+