Evangeli Ya Yohane
16 “Ndo ni vhudza zwenezwi uri ni si khukhuliswe. 2 Vhathu vha ḓo ni pandela sinagogoni.+ Tshifhinga tshi khou ḓa tshine ane a ni vhulaya+ a ḓo humbula u nga u khou itela Mudzimu mushumo mukhethwa. 3 Fhedzi vha ḓo ita zwenezwi zwithu nga nṱhani ha uri a vha ḓivhi Khotsi kana nṋe.+ 4 Ndo ni vhudza zwenezwi uri musi tshifhinga tshi tshi swika tsha uri zwi itee, ni humbule zwa uri ndo ni vhudza.+
“A tho ngo ni vhudza zwenezwi mathomoni, ngauri ndo vha ndi na inwi. 5 Zwino ndi khou ya kha We a nthuma;+ fhedzi a hu na ane a mmbudzisa uri, ‘U khou ya ngafhi?’ 6 Fhedzi no ṱungufhala ngauri ndo ni vhudza zwenezwi.+ 7 Naho zwo ralo, ndi khou ni vhudza ngoho, u ṱuwa hanga zwi ḓo ni vhuyedza. Arali nda sa ṱuwa, muthusi+ a nga si ḓe kha inwi. Fhedzi arali nda ṱuwa, ndi ḓo ni rumela ene. 8 Musi onoyo muthusi a tshi swika u ḓo ṋea shango vhuṱanzi vhu fushaho nga ha tshivhi na u luga na khaṱhulo: 9 u ḓo thoma nga u ṋea vhuṱanzi nga ha tshivhi,+ ngauri a vha ntendi;+ 10 a ṋea vhuṱanzi nga ha u luga, ngauri ndi khou ya ha Khotsi, a ni tsha ḓo dovha na mmbona; 11 a dovha a ṋea vhuṱanzi nga ha khaṱhulo, ngauri muvhusi wa ḽino shango o haṱulwa.+
12 “Ndi kha ḓi vha na zwithu zwinzhi zwine nda nga ni vhudza zwone, fhedzi ni nga si kone u zwi pfesesa zwino. 13 Naho zwo ralo, musi hu tshi ḓa onoyo* muya mukhethwa ane a sumbedza zwi re ngoho,+ u ḓo ni livhisa kha ngoho yoṱhe, ha nga ambi zwi bvaho khae, fhedzi u ḓo amba zwithu zwine a ḓo zwi pfa, a ni ḓivhadza zwithu zwine zwa ḓo ḓa.+ 14 Onoyo u ḓo ita uri ndi huliswe,+ ngauri u ḓo ni vhudza zwe a zwi pfa kha nṋe.+ 15 Zwoṱhe zwine zwa vha zwa Khotsi ndi zwanga.+ Ndi ngazwo ndi tshi ri u ḓo ni vhudza zwe a zwi pfa kha nṋe. 16 Hu si kale a ni tsha ḓo mmbona,+ hu si kale ni ḓo dovha na mmbona.”
17 Musi vha tshi pfa zwenezwo, vhaṅwe vhafunziwa vhawe vha amba nga tshavho vha ri: “Yesu u khou amba mini a tshi ri, ‘Hu si kale a ni tsha ḓo mmbona, hu si kale ni ḓo dovha na mmbona,’ na uri, ‘ngauri ndi khou ya ha Khotsi’?” 18 Vho vha vha tshi khou ri: “Yesu u khou amba mini a tshi ri, ‘hu si kale’? A ri ḓivhi uri u khou amba nga ha mini.” 19 Yesu o vha a tshi zwi ḓivha uri vha khou ṱoḓa u mu vhudzisa, a amba navho a ri: “Naa ni khou vhudzisana uri ndi ngani ndo ri: ‘Hu si kale a ni tsha ḓo mmbona, hu si kale ni ḓo dovha na mmbona’? 20 Ngoho ndi a ni vhudza ndi ri, ni ḓo lila na ṱungufhala, fhedzi shango ḽi ḓo takala; ni ḓo ṱungufhala, fhedzi vhuṱungu haṋu vhu ḓo fhela na takala.+ 21 Musi mufumakadzi a tshi beba, u a pfa vhuṱungu ngauri tshifhinga tshawe tsho swika, musi o no beba, u a hangwa vhuṱungu nga nṱhani ha dakalo ḽa uri ṅwana o bebwa. 22 Na inwi zwino no ṱungufhala; fhedzi ndi ḓo dovha nda ni vhona, ni ḓo takala,+ a hu na ane a ḓo ita uri ni si takale. 23 A ni tsha ḓo mmbudzisa tshithu nga ḽeneḽo ḓuvha. Ngoho ndi a ni vhudza ndi ri, arali na humbela Khotsi tshithu naho tshi tshini+ u ḓo ni ṋea tshone nga dzina ḽanga.+ 24 U swika zwino a ni athu u humbela tshithu nga dzina ḽanga. Humbelani ni ḓo ṋewa uri ni takale.
25 “Ndo ni vhudza zwenezwi nga zwifanyiso. Tshifhinga tshi khou ḓa tshine nda sa tsha ḓo ni vhudza zwenezwi nga zwifanyiso, fhedzi ndi ḓo ni vhudza zwavhuḓi nga ha Khotsi. 26 Nga ḽeneḽo ḓuvha ni ḓo humbela Khotsi nga dzina ḽanga; fhedzi hezwi a zwi ambi uri nṋe ndi ḓo ni humbelela. 27 Ngauri Khotsi u a ni funa, ngauri no vha ni tshi mpfuna,+ ni tshi tenda uri nṋe ndi muimeleli wa Mudzimu.+ 28 Ndo ḓa shangoni uri ndi vhe muimeleli wa Khotsi. Zwino ndi khou ṱuwa shangoni uri ndi vhuyelele kha Khotsi.”+
29 Vhafunziwa vhawe vha ri: “Zwino ri khou u pfesesa ngauri a u tsha shumisa zwifanyiso. 30 Zwino ri a zwi vhona uri u ḓivha zwithu zwoṱhe, a hu tshee na tshine ra ṱoḓa u u vhudzisa. Ndi ngazwo ri tshi tenda uri u bva kha Mudzimu.” 31 Yesu a ri: “Naa zwino ni a tenda? 32 Tshifhinga tshi khou ḓa, na zwino tsho no swika, noṱhe ni ḓo balanganywa na ya nḓuni dzaṋu na ntsia ndi ndoṱhe.+ Fhedzi ndi ḓo vha ndi si ndoṱhe, ndi ḓo vha ndi na Khotsi.+ 33 Ndo ni vhudza zwenezwi uri ni vhe na mulalo nga nṱhani hanga.+ Fhano shangoni ni ḓo pfa vhuṱungu, fhedzi ivhani na tshivhindi! Nṋe ndo kunda shango.”+