Genesi
6 Musi vhathu vha tshi thoma u anda ḽifhasini, ha bebwa vhananyana, 2 vharwa vha Mudzimu*+ wa ngoho vha thoma u vhona uri vhananyana vha vhathu vho naka. Vha vhinga vhane vha vha takalela. 3 Nga murahu Yehova a ri: “A thi nga konḓeleli muthu u ya nga hu sa fheli+ ngauri u sokou vha muthu wa ṋama.* Nga nṱhani ha zwenezwo, u ḓo tshila miṅwaha ya 120.”+
4 Vhanefilimu* vho vha vhe hone kha ḽifhasi misini yeneyo na nga murahu. Tshifhingani tshenetsho vharwa vha Mudzimu wa ngoho vho bvela phanḓa vha tshi ita zwa vhudzekani na vhananyana vha vhathu, vha vha bebela vharwa. Vhenevho vho vha vhe vhahali vha zwifhingani zwa kale, vhanna vha re na bvumo.
5 Yehova a vhona uri vhuvhi ha vhathu ho no anda vhukuma ḽifhasini na uri mihumbulo yoṱhe i bvaho mbiluni dzavho yo vha i mivhi tshifhinga tshoṱhe.+ 6 Yehova a ḓisola* nge a vhumba vhathu kha ḽifhasi, a pfa vhuṱungu.*+ 7 Yehova a ri: “Ndi ḓo fhelisa vhathu vhe nda vha vhumba kha ḽifhasi, muthu khathihi na zwifuwo, zwikokovhi na zwiṋoni ngauri ndi khou ḓisola uri ndo zwi vhumbela mini.” 8 Fhedzi Noaxe o vha a tshi takalelwa nga Yehova.
9 Haya ndi mafhungo a Noaxe.
Noaxe o vha e muvhuya.+ A si na mulandu vhukati ha vhathu vha misini yawe.* Noaxe o tshimbila na Mudzimu wa ngoho.+ 10 Nga u ya ha tshifhinga Noaxe a beba vharwa vhararu, Semu, Hamu na Yafete.+ 11 Fhedzi ḽifhasi ḽo vha ḽo no tshinyala phanḓa ha Mudzimu wa ngoho, ḽo no ḓala vhuvemu. 12 Mudzimu a tshi lavhelesa ḽifhasi, a vhona ḽo tshinyala;+ vhathu vhoṱhe kha ḽifhasi vho fara nḓila i si yavhuḓi.+
13 Mudzimu a amba na Noaxe a ri: “Ndi ḓo fhelisa vhathu vhoṱhe ngauri ḽifhasi ḽo ḓala vhuvemu nga nṱhani havho; ngauralo ndi ḓo vha fhelisa khathihi na ḽifhasi.+ 14 Iwe fhaṱa gungwa* nga thanda dza muṱaululo.+ U ite na kamara khaḽo, u ḽi ḓodze nga tshigonṱiri+ nga nnḓa na nga ngomu. 15 Nḓila ine wa fanela u ḽi fhaṱa ngayo ndi heyi: Gungwa ḽi fanela u vha vhulapfu ha khubithi* dza 300, vhuphara ha khubithi dza 50, u ya nṱha ḽi vhe khubithi dza 30. 16 U ite na fasiṱere ḽa khubithi nthihi kha gungwa u bva nṱha uri hu vhe na tshedza. Muṋango wa gungwa u vhe nga thungo haḽo,+ ḽi vhe na zwipiḓa zwiraru zwo bebekanaho.
17 “Ndi ḓo ḓisa maḓi mahulu+ kha ḽifhasi a u fhelisa zwoṱhe zwi tshilaho zwi re fhasi ha ḽiṱaḓulu. Zwoṱhe zwi re kha ḽifhasi zwi ḓo fheliswa.+ 18 Huno ndi vhofha mulanga wanga na iwe; u dzhene gungwani iwe na vharwa vhau, mufumakadzi wau na vhafumakadzi vha vharwa vhau.+ 19 U dzhenise zwivhumbiwa zwi tshilaho+ nga zwivhili nga zwivhili gungwani u itela uri zwi tshidzwe na iwe, zwa zwiduna na zwa zwisadzi;+ 20 zwa zwiṋoni u ya nga mifuda yazwo, zwifuwo u ya nga mifuda yazwo, zwikokovhi zwoṱhe u ya nga mifuda yazwo, zwi ḓo ḓa ha iwe nga zwivhili nga zwivhili uri u zwi tshidze.+ 21 Iwe u kuvhanganye zwiḽiwa zwa mifuda yoṱhe;+ zwine zwa ḓo ḽiwa nga iwe na nga zwifuwo.”
22 Noaxe a ita zwoṱhe zwe Mudzimu a mu laedza zwone. A ita nga u ralo.+