Evangeli Ya Yohane
18 Musi o no amba zwenezwo, Yesu na vhafunziwa vhawe vha ya tsimuni+ ye ya vha i seli ha Govha ḽa Kidironi.+ 2 Yudasi we a mu fheṱa o vha a tshi ḓivha henefho fhethu, ngauri Yesu o vha a tshi anzela u ṱangana na vhafunziwa vhawe henefho. 3 Yudasi na tshigwada tsha maswole na vhaḓinḓa vha vhahulwane vha vhotshifhe na Vhafarisei vha ḓa henefho tsimuni vho fara maḓenzhe na dzimbone na zwiṱhavhane.+ 4 Samusi Yesu o vha a tshi khou ḓivha zwoṱhe zwine zwa khou ḓo itea khae, a ya khavho a ri: “Ni khou ṱoḓa nnyi?” 5 Vhone vha ri: “Yesu wa Nazaretha.”+ Ene a ri: “Ndi nṋe.” Na Yudasi o mu fheṱaho o vha o ima henefho navho.+
6 Musi Yesu a tshi ri: “Ndi nṋe,” vha humela murahu vha wela fhasi.+ 7 A dovha a vha vhudzisa a ri: “Ni khou ṱoḓa nnyi?” Vha ri: “Yesu wa Nazaretha.” 8 Yesu a ri: “Ndo ni vhudza uri ndi nṋe. Arali ni tshi khou ṱoḓa nṋe, litshani havha vha ṱuwe.” 9 Zwa ita uri hu itee zwe a amba a tshi ri: “A tho ngo xedza na muthihi kha vhe wa nṋea vhone.”+
10 Simoni Petro we a vha e na banga, a ḽi bvisa a tumula nḓevhe+ ya tsha u ḽa ya mulanda wa tshifhe muhulu. Onoyo mulanda o vha a tshi pfi Malixo. 11 Yesu a amba na Petro a ri: “Vhuyedzedza banga tshipatshini tshaḽo.+ Naa a tho ngo fanela u nwa tshinwelo tshe Khotsi a nṋea tshone?”+
12 Ndi hone maswole, mulangammbi na vhaḓinḓa vha Vhayuda vha tshi fara Yesu vha mu vhofha. 13 Vha thoma nga u mu isa kha Anasi, ngauri o vha e khotsi a mufumakadzi wa Kayafa+ we a vha e tshifhe muhulu nga wonoyo ṅwaha.+ 14 Kayafa ndi ene we a eletshedza Vhayuda uri zwi ḓo vha vhuyedza arali muthu muthihi a fela vhathu vhoṱhe.+
15 Simoni Petro na muṅwe mufunziwa vho vha vha tshi khou tevhela Yesu.+ Onoyo mufunziwa o vha a tshi ḓivhiwa nga tshifhe muhulu. A dzhena muṱani wa tshifhe muhulu khathihi na Yesu, 16 fhedzi Petro o vha o sala o ima muṋangoni. Onoyo mufunziwa we a vha a tshi ḓivhiwa nga tshifhe muhulu, a bvela nnḓa uri a ambe na mulindi wa muṋango uri a dzhenise Petro nga ngomu. 17 Mushumeli wa mufumakadzi we a vha e mulindi wa muṋango a amba na Petro a ri: “Naa a u muṅwe wa vhafunziwa vha uyu munna?” Petro a ri: “Hai.”+ 18 Vhalanda na vhaḓinḓa vho vha vho ima henefho. Vha tshi khou ora mulilo ngauri ho vha hu tshi khou rothola. Petro o vha o ima henefho navho a tshi khou ora mulilo.
19 Nga tshenetsho tshifhinga, muhulwane wa vhotshifhe o vha a tshi khou vhudzisa Yesu nga ha vhafunziwa vhawe na nga ha zwe a zwi funzwa. 20 Yesu a ri: “Ndo amba vhathu vhoṱhe vha tshi zwi pfa. Ndo vha ndi tshi dzula ndi tshi funza sinagogoni na thembeleni,+ hune Vhayuda vhoṱhe vha kuvhangana hone, a hu na zwe nda zwi amba tshiphirini. 21 Ndi ngani u tshi mmbudzisa? Vhudzisa vhe vha pfa zwe nda vha vhudza zwone. Ndi vhone vha ḓivhaho zwe nda amba.” 22 Musi o no amba zwenezwo, muṅwe wa vhaḓinḓa we a vha o ima henefho tsini, a rwa Yesu khofheni+ a ri: “Naa yeneyi ndi nḓila ine wa fhindula ngayo muhulwane wa vhotshifhe?” 23 Yesu a ri: “Arali ndo amba zwo khakheaho, mmbudze zwe nda khakha; fhedzi arali ndo amba zwone, ndi ngani u tshi nthwa?” 24 Anasi a mu vhofha a mu isa kha tshifhe muhulu Kayafa.+
25 Simoni Petro o vha o ima henefho a tshi khou ora mulilo. Vha mu vhudzisa vha ri: “Naa na iwe a u mufunziwa wawe?” Petro a hanedza a ri: “A thi mufunziwa wawe.”+ 26 Muṅwe wa vhalanda vha tshifhe muhulu, we a vha e shaka ḽa munna we Petro a mu tumula nḓevhe,+ a ri: “Naa a tho ngo u vhona u nae ngei tsimuni?” 27 Petro a dovha a hanedza, nga u ṱavhanya mukukulume wa lila.+
28 Nga matsheloni, vha dzhia Yesu kha Kayafa vha mu isa nḓuni ya muvhusi.+ Fhedzi vhone vha si dzhene nḓuni ya muvhusi, uri vha si ḓishate dzitshika+ uri vha kone u ḽa Paseka. 29 Pilato a bvela nnḓa a amba navho a ri: “Uyu munna ni khou mu pomoka mini?” 30 Vha mu fhindula vha ri: “Ro vha ri sa ḓo mu ḓisa kha iwe, arali o vha e si muitazwivhi.”* 31 Ngauralo, Pilato a amba navho a ri: “Mu dzhieni inwi vhaṋe ni mu haṱule u ya nga mulayo waṋu.”+ Vhayuda vha mu fhindula vha ri: “A ro ngo tendelwa u vhulaya muthu.”+ 32 Zwa ita uri hu itee zwe Yesu a zwi amba u itela u sumbedza nḓila ine a ḓo fa ngayo.+
33 Pilato a dovha a dzhena nḓuni, a vhidza Yesu a ri: “Naa u Khosi ya Vhayuda?”+ 34 Yesu a ri: “Naa zwine wa vhudzisa zwi bva kha iwe, kana wo tou vhudzwa nga ha nṋe?” 35 Pilato a ri: “Kani nṋe ndi Muyuda? Lushaka lwa hau na vhahulwane vha vhotshifhe vho u ḓisa kha nṋe. Wo ita mini?” 36 Yesu a fhindula a ri:+ “Muvhuso wanga a si tshipiḓa tsha ḽino shango.+ Arali Muvhuso wanga wo vha u tshipiḓa tsha ḽino shango, vhatevheli vhanga vho vha vha tshi ḓo vha vho ḓa vha lwa uri ndi si kumedzelwe kha Vhayuda.+ Fhedzi zwi re zwone ndi uri Muvhuso wanga a si wa ḽino shango.” 37 Pilato a ri: “Naa u khosi?” Yesu a ri: “Ndi iwe ane wa khou zwi amba uri ndi khosi.+ Ndo bebelwa zwone, ndo ḓela zwenezwi shangoni, uri ndi ṱanziele nga ha ngoho.+ Ane a funa ngoho u thetshelesa ipfi ḽanga.” 38 Pilato a ri: “Ngoho ndi mini?”
Musi o no amba zwenezwo, a dovha a vhuyelela kha Vhayuda a amba navho a ri: “A thi mu vhoni mulandu.+ 39 Huufha no ḓowela uri nga Paseka ndi vhofholola muthu muthihi,+ kani ni ṱoḓa ndi tshi vhofholola Khosi ya Vhayuda?” 40 Vha ṱavha mukosi vha ri: “U songo vhofholola hoyu munna, fhedzi vhofholola Baraba!” Baraba o vha e ḽivemu.+