Ekisoda

14 Yehova a amba na Mushe a ri: 2 “Vhudza Vhaisiraele uri vha humele murahu vha athe madennde phanḓa ha Phihaxirotha, vhukati ha Migidolo na lwanzhe, tsini na Baali-tsifoni.+ Ni athe madennde u livhana na lwanzhe. 3 Farao u ḓo amba nga ha Vhaisiraele a ri: ‘Vho xela vha khou sokou mona-mona. A hu tshee na hune vha nga ya hone.’ 4 Ndi ḓo tendela mbilu ya Farao i tshi rindila,+ u ḓo vha pandamedza, nda ḓirendisa nga zwine nda ḓo zwi ita kha Farao na mmbi dzawe dzoṱhe;+ Vhaegipita vha ḓo ḓivha uri ndi nṋe Yehova.”+ Vhaisiraele vha ita nga u ralo.

5 Nga murahu khosi ya Egipita ya vhudzwa uri Vha⁠isiraele vho shavha. Nga u ṱavhanya Farao na vhashumeli vhawe vha shandula mihumbulo nga ha Vhaisiraele,+ vha ri: “Ro zwi itela mini ri tshi vhofholola Vhaisiraele vha si tsha vha phuli dzashu?” 6 Ngauralo, a lugisa gariki dzawe dza nndwa, a ṱuwa na mmbi yawe.+ 7 A dzhia gariki dza 600 dza nndwa dza khwine kha dzoṱhe na dziṅwe gariki dzoṱhe dza nndwa dza Egipita, iṅwe na iṅwe yadzo yo ṋamelwa nga vhahali. 8 Yehova a tendela mbilu ya Farao khosi ya Egipita i tshi rindila, a pandamedza Vhaisiraele, ngeno Vhaisiraele vho vha vha tshi khou ḓi tshimbila vha sa ofhi tshithu.+ 9 Vha⁠egipita vha vha pandamedza,+ gariki dzoṱhe dza Farao na vhaṋameli vha bere na mmbi dzawe vha swika tsini na he Vhaisiraele vha vha vho atha hone madennde tsini na lwanzhe, phanḓa ha Phihaxirotha, tsini na Baali-tsifoni.

10 Musi Farao a tshi sendela tsini, Vhaisiraele vha lavhelesa vha vhona Vhaegipita vha tshi khou vha pandamedza. Vhaisiraele vha ofha, vha thoma u vhidzelela Yehova.+ 11 Vha amba na Mushe vha ri: “Naa ndi ngauri a hu na mavhiḓa ngei Egipita u tshi ri ḓisa fhano uri ri fele sogani?+ Wo vha u tshi khou ri bvisela mini ngei Egipita? 12 Naa a si zwone zwe ra u vhudza ngei Egipita musi ri tshi ri: ‘Ri litshe uri ri shumele Vhaegipita’? Ngauri ndi khwine u shumela Vhaegipita nṱhani ha u fela sogani.”+ 13 Mushe a amba na vhathu a ri: “Ni songo ofha.+ Imani no khwaṱha ni vhone Yehova a tshi ni tshidza ṋamusi.+ Ngauri Vhaegipita vhane na khou vha vhona ṋamusi a ni tsha ḓo dovha na vha vhona na luthihi.+ 14 Yehova ene muṋe u ḓo ni lwela,+ inwi dzikani.”

15 Yehova a amba na Mushe a ri: “Ndi ngani u tshi khou nndilela? Vhudza Vhaisiraele uri vha bvele phanḓa na lwendo lwavho. 16 Iwe u imisele thonga yau nṱha ha lwanzhe u fhandekanye lwanzhe uri Vhaisiraele vha pfuke nga vhukati ha lwanzhe vha tshi kanda mavu o omaho. 17 Nṋe ndi ḓo tendela mbilu dza Vhaegipita dzi tshi rindila uri vha vha tevhele uri ndi ḓirendise nga zwine nda ḓo zwi ita kha Farao, mmbi dzawe dzoṱhe, gariki dzawe dza nndwa na vhaṋameli vhawe vha bere.+ 18 Vhaegipita vha ḓo ḓivha uri ndi nṋe Yehova musi ndi tshi ḓirendisa nga zwine nda ḓo zwi ita kha Farao, gariki dzawe dza nndwa na vhaṋameli vhawe vha bere.”+

19 Muruṅwa wa Mudzimu wa ngoho+ we a vha a tshi khou tshimbila phanḓa ha Vhaisiraele a ya a ima murahu havho, gole ḽi re phanḓa havho ḽa sudzuluwa ḽa ima murahu havho.+ 20 Ḽa ima vhukati ha Vhaegipita na Vhaisiraele.+ Thungo iṅwe ho vha hu gole ḽa swiswi. Thungo iṅwe ḽi tshi vhonetshela vhusiku.+ Vhaegipita vho vha vha sa koni u sendela tsini na Vhaisiraele vhusiku hoṱhe.

21 Mushe a imisela tshanḓa tshawe nṱha ha maḓi;+ Yehova a humisela lwanzhe murahu nga muya wa maanḓa wa vhubvaḓuvha vhusiku hoṱhe, a ita uri lwanzhe lu vhe shango ḽo omaho,+ maḓi a fhandekana.+ 22 Vhaisiraele vha wela lwanzhe vha tshi kanda mavu o omaho,+ maḓi a tshi tou nga luvhondo kha tsha u ḽa na kha tsha monde.+ 23 Vhaegipita vha vha pandamedza, bere dzoṱhe dza Farao, gariki dzawe dza nndwa na vhaṋameli vhawe vha bere vha dzhena lwanzheni vha vha tevhela.+ 24 Nga maḓautsha* Yehova a lavhelesa Vhaegipita e kha mulilo na gole,+ a ita uri Vhaegipita vha ḓaḓe. 25 A ita uri malinga a gariki dzavho a ṱomowe, a ita uri zwi vha konḓele u dzi langa; Vhaegipita vha ri: “Kha ri shavhe ri ṱuwe tsini na Vhaisiraele, ngauri Yehova u khou vha lwela kha Vhaegipita.”+

26 Mafheleloni Yehova a amba na Mushe a ri: “Imisela tshanḓa tshau nṱha ha lwanzhe, uri maḓi a kumbe Vhaegipita, gariki dzavho dza nndwa na vhaṋameli vhavho vha bere.” 27 Mushe a imisela tshanḓa tshawe nṱha ha lwanzhe, musi ḽi tshi vho tsha lwanzhe lwo vha lwo humela vhudzuloni halwo. Musi Vhaegipita vha tshi khou shavha, Yehova a vha posa vhukati ha lwanzhe.+ 28 Maḓi e a vha a tshi khou humela murahu a kumba gariki dza nndwa, vhaṋameli vha bere na mmbi yoṱhe ya Farao ye ya dzhena lwanzheni i tshi khou vha pandamedza.+ A hu na na muthihi wavho we a tshila.+

29 Fhedzi Vhaisiraele vho tshimbila mavuni o omaho vhukati ha lwanzhe,+ maḓi a tshi tou nga luvhondo kha tsha u ḽa na kha tsha monde.+ 30 Nga ḽeneḽo ḓuvha Yehova a tshidza Vhaisiraele zwanḓani zwa Vhaegipita,+ Vhaisiraele vha vhona Vhaegipita vho fa khunzi-khunzini ya lwanzhe. 31 Vhaisiraele vha vhona ma⁠anḓa* mahulu e Yehova a a shumisa u itela u lwa na Vhaegipita; vhathu vha thoma u ofha Yehova na u vha na lutendo kha Yehova na Mushe mushumeli wawe.+