Dotoronomio

31 Mushe a ya a vhudza Vhaisiraele vhoṱhe haya maipfi, 2 a amba navho a ri: “Ṋamusi ndi na miṅwaha ya 120.+ Ndi nga si tsha kona u ni ranga phanḓa,* ngauri Yehova o amba na nṋe a ri: ‘U nga si wele hoyu Mulambo wa Yorodane.’+ 3 Yehova Mudzimu waṋu u ḓo ni ranga phanḓa musi ni tshi wela, u ḓo fhelisa hedzi tshaka dzi re phanḓa haṋu, inwi na dzhia shango ḽavho.+ Yoshua ndi ene ane a ḓo ni ranga phanḓa musi ni tshi wela,+ sa zwe Yehova a amba. 4 Yehova u ḓo dzi ita zwe a ita Sihoni+ na Ogo,+ mahosi a Vhaamori, na zwe a ita shango ḽavho musi a tshi vha fhelisa.+ 5 Yehova u ḓo vha kumedzela zwanḓani zwaṋu, iwni ni ḓo vha ita u tendelana na ndaela dzoṱhe dze nda ni ṋea.+ 6 Ni vhe na tshivhindi na maanḓa.+ Ni songo ofha kana u tetemela phanḓa havho,+ ngauri Yehova Mudzimu waṋu ndi ene ane a khou tshimbila na inwi. A nga si ni laṱe kana u ni ṱutshela.”+

7 Mushe a vhidza Yoshua a amba nae phanḓa ha Vhaisiraele vhoṱhe vha tshi zwi vhona a ri: “Ivha na tshivhindi na maanḓa,+ ngauri ndi iwe ane wa ḓo isa havha vhathu shangoni ḽe Yehova a anela vhomakhulukuku wavho uri u ḓo vha ṋea ḽone, iwe u ḓo vha ṋea ḽone sa ifa.+ 8 Yehova ndi ene ane a khou tshimbila phanḓa hau, u ḓo bvela phanḓa e na iwe.+ A nga si u laṱe kana a u ṱutshela. U songo ofha kana u tshuwa.”+

9 Nga zwenezwo, Mushe a ṅwala hoyu Mulayo+ a u ṋea vhotshifhe, Vhalevi, vhane vha hwala mbulungelo ya mulanga wa Yehova, na vhahulwane vhoṱhe vha Isiraele. 10 Mushe a vha laya a ri: “Mafheleloni a ṅwaha muṅwe na muṅwe wa vhusumbe, nga tshifhinga tsho vhewaho tsha ṅwaha wa u phumula zwikolodo,+ tshifhingani tsha Vhuṱambo ha Mishasha,*+ 11 musi Vhaisiraele vhoṱhe vha tshi ḓa phanḓa ha Yehova+ Mudzimu wau fhethu he a hu nanga, u vhale hoyu Mulayo Vhaisiraele vhoṱhe vha tshi zwi pfa.+ 12 Ni kuvhanganye vhathu,+ vhanna, vhafumakadzi, vhana, mutsinda a re miḓini* yaṋu uri vha thetshelese, vha gude u ofha Yehova Mudzimu waṋu vha tevhedze maipfi oṱhe a hoyu Mulayo. 13 Na vhana vhavho vha sa athu u ḓivha hoyu Mulayo vha ḓo u pfa,+ vha guda u ofha Yehova Mudzimu waṋu maḓuvha oṱhe musi ni tshi khou dzula kha shango ḽine na khou wela Yorodane uri ni ḽi dzhie.”+

14 Nga murahu ha zwenezwo, Yehova a amba na Mushe a ri: “Tshifhinga tsho sendela tsha uri u fe.+ Vhidza Yoshua, ni ime denndeni ḽa muṱangano uri ndi mu vhee sa murangaphanḓa.”+ Ngauralo, Mushe na Yoshua vha ya vha ima denndeni ḽa muṱangano. 15 Yehova a ḓa denndeni e kha gole, ḽeneḽo gole ḽa ima muṋangoni wa dennde.+

16 Yehova a amba na Mushe a ri: “U tsini na u fa,* havha vhathu vha ḓo gwadamela* midzimu ya mazwifhi yo vha tangaho shangoni ḽine vha khou ya khaḽo.+ Vha ḓo nṱutshela+ vha pfuka mulanga wanga we nda u vhofha navho.+ 17 Nga tshenetsho tshifhinga mbiti dzanga dzi ḓo vha dugela,+ ndi ḓo vha ṱutshela+ nda vha dzumbela tshifhaṱuwo tshanga+ u swika vha tshi fheliswa. Nga murahu ha musi vho no ḓelwa nga khombo nnzhi na maṱungu+ vha ḓo ri: ‘Naa idzi khombo dze dza ri ḓela a si ngauri Mudzimu washu haho vhukati hashu?’+ 18 Fhedzi ndi ḓo dzumba tshifhaṱuwo tshanga nga ḽeneḽo ḓuvha nga nṱhani ha vhuvhi hoṱhe he vha vhu ita musi vha tshi pambutshela kha miṅwe midzimu.+

19 “Zwino ḓiṅwalele holu luimbo+ u lu funze Vhaisiraele.+ U ite uri vha lu gude uri holu luimbo lu vhe ṱhanzi kha vhathu vha Isiraele.+ 20 Musi ndi tshi vha isa kha shango ḽi elelaho mafhi na mutoli,+ ḽe nda anela vhomakhulukuku wavho,+ musi vho no ḽa vho no fura, zwi tshi vho vha tshimbilela zwavhuḓi,*+ vha ḓo pambutshela kha miṅwe midzimu vha i shumela, nṋe vha nnyadza vha pfuka mulanga wanga.+ 21 Musi vho no welwa nga khombo nnzhi na maṱungu,+ holu luimbo lu ḓo vha ṱanziela, (ngauri vhaḓuhulu vhavho a vho ngo fanela u lu hangwa), ngauri ndi vho ḓivha zwine vha humbula+ ndi sa athu u vha dzhenisa shangoni ḽe nda vha anela.”

22 Mushe a ṅwala lwonolwo luimbo nga ḽeneḽo ḓuvha, a lu funza Vhaisiraele.

23 A* vhea Yoshua+ murwa wa Nunu, a ri: “Ivha na tshivhindi na maanḓa,+ ngauri ndi iwe ane wa ḓo isa Vhaisiraele shangoni ḽe nda vha anela,+ ndi ḓo bvela phanḓa ndi na iwe.”

24 Musi Mushe a tshi tou fhedza u ṅwala maipfi oṱhe a wonoyu Mulayo kha bugu,+ 25 Mushe a laya Vhalevi vhane vha hwala mbulungelo ya mulanga wa Yehova, a ri: 26 “Dzhiani heyi bugu ya Mulayo+ ni i vhee nga thungo ha mbulungelo+ ya mulanga wa Yehova Mudzimu waṋu, i ḓo shuma sa vhuṱanzi kha inwi. 27 Ngauri ndi a zwi ḓivha zwavhuḓi uri ni mashandukwa,+ ni na tshikhuna.*+ Arali no shandukela Yehova ndi na inwi, musi ndo no fa zwi ḓo vha nga nḓila-ḓe! 28 Nkuvhanganyeleni vhahulwane vhoṱhe vha tshaka dzaṋu na vhaḓinḓa vhaṋu, ndi ambe enea maipfi vha tshi zwi pfa, ḽiṱaḓulu na ḽifhasi zwi ḓo vha ṱanziela.+ 29 Ngauri ndi a zwi ḓivha zwavhuḓi uri musi ndo no fa ni ḓo ita zwithu zwivhi+ na pambuwa kha nḓila ye nda ni laya yone; ni ḓo welwa nga khombo+ tshifhingani tshi ḓaho ngauri ni ḓo ita zwi sa takadzi Yehova, ni ḓo mu sinyusa nga zwine na ḓo zwi ita.”

30 Mushe a amba maipfi a lwonolwu luimbo u bva mathomoni u swika lu tshi fhela, musi tshivhidzo tshoṱhe tsha Isiraele tsho thetshelesa:+