Bugu Ya Vhuvhili Ya Samuele
24 Yehova a dovha a sinyutshela Vhaisiraele+ musi muṅwe muthu a tshi ṱuṱuwedza Davida a ri: “Iya u vhale+ Vhaisiraele na Vhayuda.”+ 2 Ngauralo, khosi ya amba na Yoaba+ mulangammbi ya ri: “Ndi khou humbela uri u buḓekanye na tshaka dzoṱhe dza Isiraele, u bva Dani u swika Beresaba,+ u ṅwalise vhathu uri ndi ḓivhe uri hu na vhathu vhangana.” 3 Fhedzi Yoaba a amba na khosi a ri: “Ngavhe Yehova Mudzimu wau a tshi ita uri vhathu vha ande kaḓana, thovhela muṋe wanga a zwi vhone, fhedzi ndi ngani thovhela muṋe wanga a tshi khou ṱoḓa u ita zwithu zwo raloho?”
4 Fhedzi khosi i si thetshelese zwe Yoaba na vhalangammbi vha zwi amba. Ngauralo, Yoaba na vhalangammbi vha ṱuwa phanḓa ha khosi vha ya vha ṅwalisa vhathu vha Isiraele.+ 5 Vha wela Mulambo wa Yorodane vha atha madennde ngei Aroere,+ nga thungo ya tsha u ḽa* tsha muḓi we wa vha u vhukati ha govha* thungo ya shango ḽa Vhagada na thungo ya shango ḽa Yasere.+ 6 Nga murahu ha zwenezwo vha ya Giḽiada+ na shangoni ḽa Thahatimi-hodishi vha fhirela Dani-yani, vha ya Sidoni.+ 7 Vha ya muḓini wa Tiro+ wo tangiwaho nga mbondo na miḓini yoṱhe ya Vhahevi+ na ya Vhakanana, mafheleloni vha swika Negebe+ ya Yuda ngei Beresaba.+ 8 Vha buḓekanya na shango ḽoṱhe vha swika Yerusalema ho no fhela miṅwedzi ya ṱahe na maḓuvha a 20. 9 Yoaba a ṋea khosi tshivhalo tsha vhathu vhe vha ḓiṅwalisa. Vhahali vha Isiraele vha faraho mabanga vho vha vhe 800 000, vhanna vha Yuda vho vha vhe 500 000.+
10 Fhedzi Davida a rwiwa nga luvalo*+ musi o no fhedza u vhala vhathu. Davida a amba na Yehova a ri: “Ndo tshinya+ zwihulu nga zwe nda ita. Yehova, ndi humbela uri u hangwele mushumeli wau vhukhakhi hawe,+ ngauri ndo ita zwa vhutsilu.”+ 11 Musi Davida a tshi vuwa nga matsheloni, Yehova o vha o no amba na muporofita Gada+ ane a vha muvhoni wa Davida, a ri: 12 “Tshimbila u ye u ambe na Davida uri, ‘Yehova o ri: “Ndi khou u ṋea zwithu zwiraru zwine wa fanela u nanga khazwo. Nanga tshithihi tshine nda fanela u u ḓisela tshone.”’”+ 13 Gada a ḓa kha Davida a ri: “Naa u ḓo nanga uri hu vhe na nḓala miṅwaha ya sumbe shangoni ḽau?+ Kana naa u ḓo nanga u pandamedzwa nga maswina au miṅwedzi miraru?+ Kana u ḓo nanga uri hu vhe na dwadze maḓuvha mararu shangoni ḽau?+ Elekanya zwavhuḓi nga ha zwine nda tea u fhindula We a nthuma.” 14 Ngauralo, Davida a fhindula Gada a ri: “Zwi khou ntsikeledza vhukuma. Ndi humbela uri ri wele zwanḓani zwa Yehova,+ ngauri u a khathutshela zwihulu;+ fhedzi u songo nnditsha ndi tshi wela zwanḓani zwa vhathu.”+
15 Yehova a ḓisa dwadze+ kha Vhaisiraele u bva nga matsheloni u swika nga tshifhinga tsho vhewaho, u bva Dani u swika Beresaba+ ho fa vhathu vha 70 000.+ 16 Musi muruṅwa a tshi imisela nṱha tshanḓa tshawe thungo ya Yerusalema uri a u fhelise, Yehova a ḓisola nga iyo khombo,+ a amba na muruṅwa we a vha a tshi khou fhelisa vhathu a ri: “Zwo eḓana! Humisa tshanḓa tshau.” Muruṅwa wa Yehova o vha e tsini na fhethu hune ha fhefherwa hone* ha Arauna+ wa Muyebusi.+
17 Musi Davida a tshi vhona muruṅwa we a vha a tshi khou vhulaya vhathu, a amba na Yehova a ri: “Ndi nṋe we nda tshinya, ndi nṋe ndo khakhaho; fhedzi idzi nngu+ dzo ita mini? Ndi humbela uri tshanḓa tshau tshi ḓe kha nṋe na vha nnḓu ya khotsi anga.”+
18 Gada a ya ha Davida nga ḽeneḽo ḓuvha a amba nae a ri: “Gonya u ye u fhaṱele Yehova aḽeṱare fhethu hune ha fhefherwa hone* ha Arauna wa Muyebusi.”+ 19 Davida a gonya a tshi tevhedza zwe Yehova a mu laya a tshi shumisa Gada. 20 Musi Arauna a tshi lavhelesa a vhona khosi na vhashumeli vhayo vha tshi khou ḓa khae, Arauna a ṱavhanya a bva, a gwadama phanḓa ha khosi o kwatamisa tshifhaṱuwo. 21 Arauna a ri: “Ndi ngani thovhela muṋe wanga o ḓa kha mushumeli wawe?” Davida a ri: “Ndo ḓa u renga fhethu hune wa fhefherela hone* uri ndi fhaṱele Yehova aḽeṱare, uri dwadze ḽe ḽa fara vhathu ḽi fhele.”+ 22 Fhedzi Arauna a amba na Davida a ri: “Thovhela muṋe wanga nga a dzhie fhethu ha u fhefherela a ṋekedze zwine a vhona zwi zwavhuḓi.* Kholomo dza tshifhiwa tsha u fhiswa khedzi na tshiḽei tsha u fhula na dzhogo zwine wa ḓo ita ngazwo khuni. 23 Nṋe Arauna ndi ṋea khosi zwenezwi zwithu zwoṱhe.” Arauna a dovha a amba na khosi a ri: “Ngavhe Yehova Mudzimu wau a tshi u takalela.”
24 Naho zwo ralo, khosi ya amba na Arauna ya ri: “Aiwa, ndi ḓo tou hu renga. Ndi nga si ṋekedze Yehova Mudzimu wanga zwiṱhavhelo zwa u fhiswa zwe nda si zwi bvisele tshithu.” Nga zwenezwo, Davida a renga fhethu ha u fhefherela hone* na kholomo nga shekele* dza siḽiva dza 50.+ 25 Davida a fhaṱela Yehova aḽeṱare+ henefho, a ṋekedza zwiṱhavhelo zwa u fhiswa na zwiṱhavhelo zwa u pfumedzana. Yehova a pfa thabelo dza vhathu,+ dwadze ḽe ḽa ḓela Vhaisiraele ḽa fhela.