Genesi

18 Nga murahu Yehova+ a ḓa kha Abrahamu nga masiari tshivhangalala, o dzula muṋangoni wa dennde mirini mihulu ya Mamure.+ 2 A tshi lavhelesa a vhona vhanna vhararu vho ima kulenyana.+ Musi a tshi vha vhona, a takuwa muṋangoni wa dennde, a gidima a ya a vha ṱanganedza, a gwadama. 3 Abrahamu a ri: “Yehova, arali u tshi ntakalela, ndi humbela uri u songo fhira u songo dzhena ha mushumeli wau. 4 Ndi khou humbela uri hu ḓiswe maḓinyana a u ṱamba milenzhe;+ ni kone u awela murunzini. 5 Samusi no swika kha mushumeli waṋu, ndi ḓo ni ḓisela vhurothonyana uri ni wane maanḓa.* Musi no no ḽa ndi hone ni tshi ḓo ṱuwa.” Vhone vha ri: “Zwo luga. U nga ita zwe wa amba.”

6 Abrahamu a gidimela denndeni hu re na Sara a ri: “Ṱavhanya u dzhie fuḽauru tsekene ya mielo* miraru, u i suke, u bake vhurotho.” 7 Abrahamu a gidimela sambini, a nanga mbohwana yavhuḓi. A i ṋea muḓinḓa uri a ṱavhanye a i ṱhavhe. 8 A dzhia boḓoro na mafhi na ṋama ya mbohwana ye a vha o vha ṱhavhela yone, a zwi vhea phanḓa havho. A ima tsini navho murunzini musi vha tshi khou ḽa.+

9 Vha mu vhudzisa vha ri: “Sara mufumakadzi wau u ngafhi?”+ Ene a ri: “U denndeni!” 10 Muṅwe wavho a ri: “Ndi ḓo vhuya kha iwe ṅwaha u ḓaho nga tshenetshi tshifhinga, Sara mufumakadzi wau u ḓo vha na ṅwana wa mutukana.”+ Sara o vha o thetshelesa e muṋangoni wa dennde we wa vha u nga murahu ha onoyo munna. 11 Abrahamu na Sara vho vha vho no vha vha⁠aluwa.+ Sara o vha o no pfuka miṅwaha ya u beba.+ 12 Huno Sara a thoma u sea, a ri: “Samusi ndo no kegula na muṋe wanga o no kalaha, ndi nga vha hani na lutamo lwo raloho?”+ 13 Yehova a amba na Abrahamu a ri: “Ndi ngani Sara o sea a ri: ‘Naa ndi nga beba ṅwana ndo no kegula?’ 14 Naa hu na zwine Yehova a si zwi kone?+ Ndi ḓo vhuya kha iwe ṅwaha u ḓaho nga tshifhinga tsho vhewaho, Sara u ḓo vha na ṅwana wa mutukana.” 15 Fhedzi Sara a hanedza a ri: “A tho ngo sea!” Ngauri o vha a tshi khou ofha. Mudzimu a ri: “Wo sea.”

16 Nga murahu vhenevho vhanna vha takuwa vha lavhelesa thungo ya Sodoma,+ Abrahamu a tshimbila navho a vha fhelekedza. 17 Yehova a ri: “Naa ndi nga dzumbela Abrahamu zwine nda ṱoḓa u zwi ita?+ 18 Abrahamu u ḓo vha lushaka luhulu lu re na ma⁠anḓa, tshaka dzoṱhe dza kha ḽifhasi dzi ḓo fhaṱutshedzwa nga nṱhani hawe.+ 19 Ngauri ndo mu ḓivha u itela uri a laye vharwa vhawe na vha muḓini wawe na vhane vha ḓo bebwa muḓini wawe, uri vha tevhedze nḓila ya Yehova nga u ita zwo lugaho na zwo teaho,+ uri Yehova a vha itele zwe a fhulufhedzisa Abrahamu.”

20 Yehova a ri: “Mukosi wa u lila nga ha miḓi ya Sodoma na Gomora ndi muhulu+ na zwivhi zwayo ndi zwihulu.+ 21 Ndi ḓo tsa u itela u vhona arali zwililo zwo swikaho kha nṋe zwi ngoho. Arali zwi songo ralo, ndi ḓo zwi ḓivha.”+

22 Vhenevho vhanna vha ṱuwa henefho vha livha Sodoma; fhedzi Yehova+ a sala na Abrahamu. 23 Abrahamu a amba nae a ri: “Naa u ḓo fhelisa vhavhuya khathihi na vhavhi?+ 24 Kha ri ri hu na vhavhuya vha 50 kha wonoyu muḓi, naa u ḓo vha fhelisa, u si u hangwele u tshi itela vhenevho vhavhuya vha 50 vha re ngomu hawo? 25 A thi humbuli uri u nga fhelisa muvhuya khathihi na muvhi, muvhuya na muvhi wa vha ita zwi fanaho!+ A thi humbuli uri u nga ita nga u ralo.+ Naa Muhaṱuli wa ḽifhasi ḽoṱhe a nga si ite zwo lugaho?”+ 26 Yehova a ri: “Arali nda wana vhavhuya vha 50 muḓini wa Sodoma ndi ḓo u hangwela woṱhe ndi tshi itela vhenevho.” 27 Fhedzi Abrahamu a dovha a ri: “Ndo dovha nda vha na tshivhindi nda amba na Yehova ngeno ndi tshi tou vha buse na miḽora. 28 Kha ri ri kha vhavhuya vha 50 hu khou ṱahela vhaṱanu. Naa u ḓo fhelisa muḓi woṱhe nge ha ṱahela vhaṱanu?” A fhindula a ri: “A thi nga ḓo u fhelisa arali nda wana hu na vha 45.”+

29 Fhedzi a dovha a amba nae a ri: “Kha ri ri hu na vha 40 henefho.” Mudzimu a ri: “A thi nga ḓo u fhelisa ndi tshi itela vha 40.” 30 A bvela phanḓa a ri: “Yehova ndi khou humbela uri u songo sinyuwa,+ fhedzi nnditshe ndi ambe: Kha ri ri hu na vha 30 henefho.” A fhindula a ri: “A thi nga ḓo u fhelisa arali hu na vha 30 henefho.” 31 Fhedzi Abrahamu a dovha a ri: “Ndo vha na tshivhindi nda amba na Yehova: Kha ri ri hu na vha 20 henefho.” A fhindula a ri: “A thi nga ḓo u fhelisa ndi tshi itela vha 20.” 32 Mafheleloni a ri: “Yehova, ndi khou humbela uri u songo sinyuwa, ntendele ndi ambe lwa u fhedza: Kha ri ri hu na vha fumi henefho.” A fhindula a ri: “A thi nga ḓo u fhelisa ndi tshi itela vha fumi.” 33 Musi Yehova a tshi fhedza u amba na Abrahamu, a ṱuwa,+ Abrahamu a humela muḓini wawe.