Evangeli Ya Yohane

4 Musi Murena a tshi pfa uri Vhafarisei vha a zwi ḓivha uri u* khou ita vhafunziwa vhanzhi na u lovhedza+ u fhira Yohane, 2 naho ho vha hu si Yesu we a vha a tshi khou lovhedza, fhedzi hu vhafunziwa vhawe, 3 a ṱuwa Yudea a ya Galilea. 4 Fhedzi o vha a tshi tea u fhira nga Samaria. 5 A swika muḓini wa Samaria une wa pfi Sikara, tsini na tsimu ye Yakobo a i ṋea Yosefa murwa wawe.+ 6 Henefho ho vha hu na tshisima+ tsha Yakobo. Yesu a tshi pfa o neta nga u tshimbila, a dzula henefho tshisimani. Ho vha hu awara i ṱoḓaho u vha ya vhurathi.*

7 Ha ḓa mufumakadzi wa Samaria u ka maḓi. Yesu a amba nae a ri: “Nkele maḓi ndi nwe.” 8 (Vhafunziwa vhawe vho vha vho ya muḓini u renga zwiḽiwa.) 9 Mufumakadzi wa Musamaria a ri: “Ndi ngani u tshi humbela Musamaria maḓi ngeno u Muyuda?” (Ndi ngauri Vhayuda na Vhasamaria vho vha vha sa anḓani.)+ 10 Yesu a ri: “A u ḓivhi tshifhiwa tshine Mudzimu a u ṋea tshone,+ a u ḓivhi na ane a ri, ‘Nkele maḓi ndi nwe.’ Arali wo vha u tshi zwi ḓivha, wo vha u tshi ḓo vha wo mu humbela maḓi a ṋeaho vhutshilo, a u ṋea.”+ 11 Mufumakadzi a ri: “Muṋe wanga, a u na tsha u ka maḓi, na tshisima tsho tsa. Maḓi a ṋeaho vhutshilo u ḓo a wana ngafhi? 12 Naa u fhira makhulukuku washu Yakobo, we a ri ṋea tshisima tshe a vha a tshi nwa khatsho na vharwa vhawe na kholomo dzawe?” 13 Yesu a ri: “Ane a nwa haya maḓi u ḓo dovha a pfa ḓora. 14 Ane a nwa maḓi ane nda mu ṋea one ha tsha ḓo pfa ḓora,+ fhedzi maḓi ane nda mu ṋea one a ḓo nga tshisima khae tshi ṋeaho vhutshilo vhu sa fheli.”+ 15 Mufumakadzi a ri: “Muṋe wanga, nṋee eneo maḓi uri ndi si tsha dovha nda pfa ḓora kana u dzula ndi tshi ḓa henefha u ka maḓi.”

16 Yesu a ri: “Iya u vhidze munna wau, u ḓe nae.” 17 Mufumakadzi a ri: “A thi na munna.” Yesu a ri: “U khou amba ngoho u tshi ri, ‘A thi na munna.’ 18 Ngauri wo no ḓi vha na vhanna vhaṱanu, munna ane wa khou dzula nae zwino a si wau. U khou amba ngoho.” 19 Mufumakadzi a ri: “Muṋe wanga, ndi khou zwi vhona uri u muporofita.+ 20 Vhomakhulukuku washu vho vha vha tshi rabela kha heyi thavha; fhedzi Vhayuda vha ri vhathu vha fanela u rabela Yerusalema.”+ 21 Yesu a ri: “Ngoho ndi a u vhudza ndi ri, hu ḓo ḓa tshifhinga tshine vhathu vha si tsha ḓo rabela Khotsi kha heyi thavha kana ngei Yerusalema. 22 A ni ḓivhi ane na mu rabela;+ fhedzi riṋe ri rabela ane ra mu ḓivha, ngauri Vhayuda ndi vhone vha u thoma u tshidzwa.+ 23 Naho zwo ralo, hu ḓo ḓa tshifhinga, na zwino tsho no ḓi swika, tshine vhagwadameli vha ngoho vha ḓo rabela Khotsi u tendelana na muya na ngoho, ngauri Khotsi u ṱoḓa vha ngaho vhenevho uri vha mu rabele.+ 24 Mudzimu ndi Muya,+ vha mu rabelaho vha fanela u mu rabela u tendelana na muya na ngoho.”+ 25 Mufumakadzi a ri: “Ndi a zwi ḓivha uri Messia u khou ḓa, ane a vhidzwa Kristo. Musi a tshi swika, u ḓo ri vhudza zwithu zwoṱhe.” 26 Yesu a ri: “Ndi nṋe.”+

27 Vhafunziwa vhawe vha vhuya, vha mangala a tshi khou amba na mufumakadzi. A hu na we a vhudzisa uri: “U khou ṱoḓa mini?” kana “Ndi ngani u tshi khou amba nae?” 28 Mufumakadzi a sia mvuvhelo yawe, a ya muḓini, a vhudza vhathu a ri: 29 “Iḓani ni vhone munna we a mmbudza zwithu zwoṱhe zwe nda zwi ita. Naa a si ene Kristo?” 30 Vha bva henefho muḓini vha ya kha Yesu.

31 Nga tshenetsho tshifhinga vhafunziwa vho vha vha tshi khou mu humbela vha tshi ri: “Rabi,+ i ḽa.” 32 Fhedzi ene a ri: “Ndi na zwiḽiwa zwine ni si zwi ḓivhe.” 33 Vhafunziwa vha amba nga tshavho vha ri: “Kani hu na we a mu ḓisela zwiḽiwa?” 34 Yesu a ri: “Zwiḽiwa zwanga ndi u ita zwi funwaho nga o nthumaho+ na u khunyeledza mushumo wawe.+ 35 Inwi ni ri: “Ho sala miṅwedzi miṋa uri ni kaṋe. Fhedzi nṋe ndi ri, lavhelesani masimu, o no lugela u kaṋiwa.+ 36 Mukaṋi u khou wana muholo, u khou kuvhanganya mitshelo ine ya ḓo wana vhutshilo vhu sa fheli, uri hu takale muzwali na mukaṋi.+ 37 Ndi ngoho uri: Muṅwe ndi muzwali, muṅwe ndi mukaṋi. 38 Ndo ni ruma uri ni ye u kaṋa zwe ni si zwale. Vhaṅwe vho shuma vhukuma, inwi ni khou wana zwe vha zwi shumela.”

39 Vhasamaria vhanzhi vha wonoyo muḓi vha tenda Yesu nge vha pfa zwe onoyo mufumakadzi a zwi amba, a tshi ri: “O mmbudza zwithu zwoṱhe zwe nda zwi ita.”+ 40 Musi Vhasamaria vha tshi ḓa khae, vha mu humbela uri a dzule navho, a dzula henefho maḓuvha mavhili. 41 Vhanzhi vha tenda musi vha tshi pfa zwe Yesu a zwi amba, 42 vha amba na onoyo mufumakadzi vha ri: “A ri tsha tenda nga zwe wa zwi amba; ri vho tenda nga zwe ra zwi pfa, ri a zwi ḓivha zwa vhukuma uri hoyu munna ndi mutshidzi wa shango.”+

43 Nga murahu ha maḓuvha mavhili a ṱuwa henefho a ya Galilea. 44 Naho zwo ralo, Yesu o vha o amba uri muporofita ha huliswi shangoni ḽa hawe.+ 45 Musi a tshi swika Galilea, Vhagalilea vha mu ṱanganedza, ngauri vho vhona zwoṱhe zwe a zwi ita ngei Yerusalema vhuṱamboni,+ ngauri na vhone vho vha vho ya henengei.+

46 Yesu a vhuyelela muḓini wa Kana kha ḽa Galilea, he a shandula maḓi a vha waini.+ Ho vha hu na muḓinḓa wa musanda we murwa wawe a vha a tshi khou lwala ngei Kapernaume. 47 Musi onoyo munna a tshi pfa uri Yesu o ya Galilea a tshi bva ngei Yudea, a ya khae a mu humbela uri a ḓe a fhodze murwa wawe, ngauri o vha a tshi khou fa. 48 Fhedzi Yesu a ri: “Arali na sa vhona vhuṱolo na zwithu zwi mangadzaho, a ni nga tendi.”+ 49 Muḓinḓa wa musanda a ri: “Murena, kha ri ṱuwe ṅwananga a sa athu u fa.” 50 Yesu a ri: “Ṱuwa, murwa wau o fhola.”+ Onoyo munna a tenda zwe Yesu a zwi amba, a ṱuwa. 51 Musi e nḓilani, a ṱangana na vhalanda vhawe vha mu vhudza uri mutukana wawe o fhola. 52 A vha vhudzisa tshifhinga tshee mutukana a fhola ngatsho. Vhone vha ri: “O fhola mulovha nga awara ya vhusumbe.”* 53 Khotsi a zwi ḓivha uri o fhola nga tshifhinga tshee Yesu a ri: “Murwa wau o fhola.”+ Ene na muṱa wawe woṱhe vha tenda Yesu. 54 Ndi hone vhuṱolo ha vhuvhili+ he Yesu a vhu ita musi a tshi bva Yudea a tshi ya Galilea.