Yesaya
6 Nga ṅwaha we Khosi Usia a fa+ ngawo, ndo vhona Yehova o dzula kha khuluṋoni nṱha-nṱha,+ lupendelo lwa tshiambaro tshawe lwo ḓadza thembele. 2 Vhaserafe vho vha vho mu tanga; muṅwe na muṅwe o vha e na phapha dza rathi. Muṅwe na muṅwe o vha o thivha tshifhaṱuwo tshawe nga phapha mbili, dziṅwe mbili dzo thivha milenzhe, a tshi fhufha nga dziṅwe mbili.
3 Vho vha vha tshi vhidzelelana vha tshi ri:
“Mukhethwa, mukhethwa, mukhethwa ndi Yehova wa mavhuthu.+
Ḽifhasi ḽoṱhe ḽo ḓala vhugala hawe.”
4 Mubvumo wa maipfi avho wa dzinginyisa miṋango, nnḓu ya ḓala vhutsi.+
5 Nṋe nda ri: “Ndo welwa nga khombo!
Ndi hone ndo fa,*
Ngauri mulomo wanga u na tshika,
Ndi tshila na vhathu vha milomo i re na tshika;+
Ngauri ndo vhona Khosi, ene Yehova wa mavhuthu!”
6 Nga zwenezwo, muṅwe wa vhaserafe a fhufha a ḓa kha nṋe, tshanḓani tshawe o vha o fara xale*+ ḽine ḽa khou duga ḽe a ḽi bvisa kha aḽeṱare.+ 7 A fara mulomo wanga a ri:
“Ḽeneḽi xale ḽo kwama mulomo wau.
Mulandu wau wo phumulwa,
Wo pfumelelwa tshivhi tshau.”
8 Nda pfa ipfi ḽa Yehova ḽi tshi amba ḽi tshi ri: “Ndi ḓo ruma nnyi, muḓinḓa washu u ḓo vha nnyi?”+ Nda fhindula nda ri: “Ndi fhano! Ruma nṋe!”+
9 A fhindula a ri: “Iya u vhudze vhathu u ri:
‘Ni ḓo zwi pfa lunzhi-lunzhi,
Fhedzi a ni nga zwi pfesesi;
Ni ḓo zwi vhona lunzhi-lunzhi,
Fhedzi a ni nga vhi na nḓivho.’+
10 Rindidza mbilu dza avha vhathu,+
U dzingise nḓevhe dzavho,+
U vha vale maṱo,
Uri vha si vhone
Vha si pfe,
Uri mbilu dzavho dzi si zwi pfesese
Vha si rembuluwe vha fhodzwa.”+
11 Nṋe nda ri: “Iwe Yehova, zwi ḓo dzhia tshifhinga tshingafhani?” Ene a ri:
“U swika miḓi i tshi fheliswa ya vha mashubi i si tsha dzula muthu
Nnḓu dzi si tsha dzulwa nga vhathu
Shango ḽo tshinyiwa, ḽi shubi;+
12 U swika Yehova a tshi bvisela vhathu kule+
Shango ḽa sala ḽi si na muthu.
13 “Fhedzi khaḽo hu ḓo sala muthihi kha vha fumi, ḽi ḓo dovha ḽa fhiswa, u fana na zwine zwa itwa muri muhulu na wa muouku, hu sala tshiguthe musi yo remiwa; tshenetsho tshiguthe tshi ḓo vha mbeu* khethwa.”