Hesekiele

11 Muya wa nkhwala wa nnyisa khoroni ya vhubvaḓuvha ha nnḓu ya Yehova, khoro yo lavhelesaho vhubvaḓuvha.+ Henefho muṋangoni wa khoro nda vhona vhanna vha 25, muṅwe wavho o vha e Yaasanya murwa wa Asuru na Pelatia murwa wa Benaya, vhane vha vha vhakololo vha vhathu.+ 2 A amba na nṋe a ri: “Murwa muthu, havha ndi vhanna vhane vha khou vhamba maano mavhi na u ṋea nyeletshedzo i si yavhuḓi kha wonoyo muḓi. 3 Vha ri, ‘Naa a si tshifhinga tsha u fhaṱa dzinnḓu?+ Muḓi* ndi bodo ya u bika,+ riṋe ri ṋama.’

4 “Porofita nga havho. Porofita, iwe murwa muthu.”+

5 Muya wa Yehova wa ḓa kha nṋe,+ a amba na nṋe a ri: “Amba navho u ri, ‘Zwe Yehova a zwi amba ndi hezwi: “Zwe na amba ndi ngoho, inwi vha nnḓu ya Isiraele, ndi a ḓivha zwine na humbula. 6 No ita uri vhanzhi vha fe kha wonoyo muḓi, no ḓadza nḓila dzawo nga zwitumbu.”’”+ 7 “Nga zwenezwo, zwe Yehova Murena Muvhusahoṱhe a zwi amba ndi hezwi: ‘Zwitumbu zwe na zwi balanganya na muḓi, ndi yone ṋama, muḓi ndi wone bodo ya u bika.+ Fhedzi inwi ni ḓo bviswa khawo.’”

8 “‘Ni ofha banga,+ ndi ngazwo ndi tshi ḓo ni ḓisela ḽone,’ u ralo Yehova Murena Muvhusahoṱhe. 9 ‘Ndi ḓo ni bvisa khawo nda ni kumedzela zwanḓani zwa vhatsinda nda ni haṱula.+ 10 Ni ḓo vhulawa nga banga.+ Nda ni haṱula ngei mikanoni ya Isiraele,+ ndi hone ni tshi ḓo ḓivha uri ndi nṋe Yehova.+ 11 Muḓi a u nga ḓo vha bodo yaṋu ya u bika, a ni nga ḓo vha ṋama nga ngomu hayo; ndi ḓo ni haṱula mukanoni wa Isiraele, 12 uri ni ḓivhe uri ndi nṋe Yehova. Ngauri a no ngo tevhedza maitele anga na milayo yanga,+ fhedzi no ita zwithu u tendelana na milayo ya tshaka dzo ni tangaho.’”+

13 Musi ndi tshi tou fhedza u porofita, Pelatia murwa wa Benaya a fa, nda gwadama nda ṱavha mukosi nga ipfi ḽihulu nda ri: “Yowee, Yehova Murena Muvhusahoṱhe! Naa u ḓo fhelisa vho salaho vha Isiraele?”+

14 Yehova a dovha a amba na nṋe, a ri: 15 “Murwa muthu, vhahau vhane vha vha na ndugelo ya u rengulula shango khathihi na vha nnḓu yoṱhe ya Isiraele, vho vhudzwa nga vhadzulapo vha Yerusalema ha pfi, ‘Ṱutshelani kule na Yehova. Shango ndi ḽashu; ro ṋewa ḽone uri ḽi vhe ifa ḽashu.’ 16 Nga zwenezwo, amba u ri, ‘Yehova Murena Muvhusahoṱhe u ri: “Naho ndo vha i sa kha dzitshaka, nda vha balanganya na mashango,+ nga tshifhinganyana ndi ḓo vha nnḓu khethwa yavho mashangoni e vha ya khao.”’+

17 “Nga zwenezwo, amba u ri, ‘Zwe Yehova Murena Muvhusahoṱhe a zwi amba ndi hezwi: “Ndi ḓo dovha nda ni kuvhanganya kha dzitshaka, nda ni bvisa kha mashango e na balanganyelwa khao, nda ni ṋea shango ḽa Isiraele.+ 18 Vha ḓo vhuyelela khaḽo vha bvisa zwithu zwi nengisaho na u litsha mishumo i nengisaho.+ 19 Ndi ḓo vha ṋea mbilu i re na vhuthihi*+ na muhumbulo* muswa;+ ndi ḓo bvisa mbilu ya tombo kha mivhili yavho,+ nda vha ṋea mbilu ya ṋama,*+ 20 uri vha tevhedze maitele anga na milayo yanga, vha i thetshelese. Ndi hone vha tshi ḓo vha vhathu vhanga, nṋe nda vha Mudzimu wavho.”’

21 “‘“Fhedzi vhane mbilu dzavho dza bvela phanḓa dzi tshi ita zwithu zwi nengisaho na u ita mishumo i nengisaho, ndi ḓo vha lifhedza u ya nga nḓila dzavho,” u ralo Yehova Murena Muvhusahoṱhe.’”

22 Ndi hone vhakerube vha tshi ṱharamudzela phapha dzavho nṱha, malinga e tsini navho,+ vhugala ha Mudzimu wa Isiraele vhu nṱha havho.+ 23 Vhugala ha Yehova+ ha bva muḓini ha ya ha ima nṱha ha thavha i re vhubvaḓuvha ha muḓi.+ 24 Nga zwenezwo, muya wa nkhwala ndi kha bono ḽe ḽa itwa nga muya wa Mudzimu, wa nnyisa kha vhathu vha re vhuthubwani ngei Kaladea. Bono ḽe nda ḽi vhona ḽa nṱutshela. 25 Nda thoma u vhudza vhathu vha re vhuthubwani zwithu zwoṱhe zwe Yehova a ntsumbedza.