Vhahaṱuli
6 Vhaisiraele vha dovha vha ita zwi sa takadzi phanḓa ha Yehova,+ ngauralo Yehova a vha kumedzela zwanḓani zwa Vhamidiani miṅwaha ya sumbe.+ 2 Vhamidiani vha vhusa Vhaisiraele. Nga nṱhani ha Vhamidiani, Vhaisiraele+ vha ḓiitela fhethu ha u dzumbama* dzithavhani, mabakoni na fhethu he ha vha hu tshi konḓa u dzhena.+ 3 Arali Vhaisiraele vha zwala mbeu, Vhamidiani, Vhaamaleke+ na vhathu vha vhubvaḓuvha+ vho vha vha tshi ḓa vha lwa navho. 4 Vha atha madennde u itela u lwa navho na u tshinyadza zwibveledzwa zwa shangoni u swika nḓilani ya u ya Gaza, vha si siele Vhaisiraele tshithu tsha u ḽa, vha si sie nngu kana mboho kana donngi.+ 5 Ngauri vho vha vho ḓa na zwifuwo zwavho na madennde vho ḓala sa nzie,+ vhone na gamela dzavho vha sa vhalei,+ vho ḓa shangoni u itela u ḽi tshinyadza. 6 Vhaisiraele vha shengedzwa zwihulu nga Vhamidiani. Vhaisiraele vha humbela Yehova uri a vha thuse.+
7 Musi Vhaisiraele vha tshi humbela Yehova uri a vha thuse nga nṱhani ha u shengedzwa nga Vhamidiani,+ 8 Yehova a rumela muporofita kha Vhaisiraele we a amba navho a ri: “Yehova Mudzimu wa Isiraele o amba hezwi, ‘Ndo ni bvisa Egipita nḓuni ya vhupuli.+ 9 Nda ni tshidza zwanḓani zwa Vhaegipita na vhatsikeledzi vhaṋu vhoṱhe nda vha pandela phanḓa haṋu nda ni ṋea shango ḽavho.+ 10 Ndo ni vhudza uri: “Ndi nṋe Yehova Mudzimu waṋu.+ A no ngo tea u ofha midzimu ya Vhaamori vhane na khou dzula shangoni ḽavho.”+ Fhedzi a no ngo nthetshelesa.’”+
11 Nga murahu muruṅwa wa Yehova a ḓa+ a dzula fhasi ha muri muhulu we wa vha u Ofura, we wa vha u wa Yoasi wa Muabiesere.+ Gidioni murwa wawe+ a tshi khou fhula goroi hune ha sukiwa hone nḓirivhe uri a i dzumbele Vhamidiani. 12 Muruṅwa wa Yehova a ḓa khae a ri: “Yehova u na iwe,+ iwe muhali.” 13 Gidioni a mu fhindula a ri: “Mpfarele, muṋe wanga, fhedzi arali Yehova e na riṋe, ndi ngani ro ḓelwa nga hezwi zwithu zwoṱhe?+ I ngafhi mishumo yawe yoṱhe yavhuḓi ye vhokhotsi ashu vha vha vha tshi ri anetshela+ vha ri: ‘Naa Yehova ho ngo ri bvisa Egipita?’+ Zwino Yehova o ri laṱa,+ o ri kumedzela zwanḓani zwa Vhamidiani.” 14 Yehova a mu lavhelesa a ri: “I vha na maanḓa u tshimbile, u ḓo tshidza Vhaisiraele zwanḓani zwa Vhamidiani. Naa a si nṋe we nda u ruma?”+ 15 A fhindula a ri: “Mpfarele Yehova. Ndi nga tshidza hani Isiraele? Ngeno muṱa wanga u wone muṱuku kha lushaka lwa Manase, ndi nṋe a nyadzeaho nḓuni ya khotsi anga.” 16 Fhedzi Yehova a amba nae a ri: “Ngauri ndi ḓo vha na iwe,+ u ḓo vhulaya Vhamidiani zwa tou nga u khou vhulaya muthu muthihi.”
17 Gidioni a amba nae a ri: “Arali u tshi ntakalela, ntsumbedze tshiga tsha uri ndi iwe ane wa khou amba na nṋe. 18 Ndi khou humbela uri u songo ṱuwa fhano u swika ndi tshi vhuya na tshifhiwa tshanga nda tshi vhea phanḓa hau.”+ A fhindula a ri: “Ndi ḓo dzula henefha u swika u tshi vhuya.” 19 Gidioni a ya a bika ṋama ya tshibudzana, a baka vhurotho vhu si na mbiliso nga fuḽauru ya tshikalo tshithihi tsha efa.*+ A dzhenisa ṋama manngini a shela muthotho bodoni; a mu isela zwone fhasi ha muri muhulu.
20 Muruṅwa wa Mudzimu wa ngoho a amba nae a ri: “Dzhia ṋama na vhurotho vhu si na mbiliso u zwi vhee henefho nṱha ha tombo ḽihulu, u shele na muthotho.” Gidioni a ita nga u ralo. 21 Muruṅwa wa Yehova a imisa lubaḓa lwe a vha o lu fara a kwama ngalwo ṋama na vhurotho vhu si na mbiliso, ha bva mulilo kha tombo wa fhisa ṋama na vhurotho vhu si na mbiliso.+ Muruṅwa wa Yehova a ngala-ngala, Gidioni a si tsha mu vhona. 22 Nga zwenezwo, Gidioni a zwi ṱhogomela uri o vha e muruṅwa wa Yehova.+
Nga u ṱavhanya Gidioni a ri: “Yowee, Yehova Murena Muvhusahoṱhe, ndo vhona muruṅwa wa Yehova ro livhana zwifhaṱuwo!”+ 23 Fhedzi Yehova a amba nae a ri: “Mulalo nga u vhe na iwe. U songo ofha;+ a u nga fi.” 24 Gidioni a fhaṱela Yehova aḽeṱare henefho, i vhidzwa Yehova-shalomo*+ u swika na ṋamusi. I kha ḓi vha Ofura ḽa Vhaabiesere.
25 Vhusiku honoho Yehova a amba nae a ri: “Dzhia mbohwana ya khotsi au na iṅwe mbohwana ya miṅwaha ya sumbe, u thuthe aḽeṱare ya Baali ine ya vha ya khotsi au, u reme na thanda khethwa* dzi re tsini nayo.+ 26 Musi wo no fhaṱela Yehova Mudzimu wau aḽeṱare nṱha ha ḽeneḽi dzhavhelo ḽa matombo o ṱhophiwaho, u dzhie iṅwe mbohwana u i ṋekedze sa tshifhiwa tsha u fhiswa nṱha ha khuni dza thanda khethwa dze wa dzi rema.” 27 Gidioni a ṱuwa na vhashumeli vhawe vha fumi a ita zwe Yehova a mu vhudza zwone. Fhedzi o vha a tshi ofha vha muṱa wa khotsi awe na vhanna vha wonoyo muḓi, ndi ngazwo o zwi ita vhusiku a songo zwi ita nga masiari.
28 Musi vhanna vha wonoyo muḓi vha tshi vuwa nga matsheloni-tsheloni a ḓuvha ḽi tevhelaho, vha vhona uri aḽeṱare ya Baali yo thuthwa na thanda khethwa* dzi re tsini nayo dzo remiwa, na uri iṅwe mbohwana yo ṋekedzwa kha aḽeṱare ye ya fhaṱiwa. 29 Vha vhudzisana vha ri: “Ndi nnyi o itaho zwenezwi?” Musi vho no ṱoḓisisa, vha ri: “Zwo itwa nga Gidioni murwa wa Yoasi.” 30 Vhanna vha wonoyo muḓi vha amba na Yoasi vha ri: “Bvisela murwa wau nnḓa uri a vhulawe, ngauri o thutha aḽeṱare ya Baali na uri o rema thanda khethwa* dzi re tsini nayo.” 31 Musi Yoasi+ a tshi pfa zwenezwo a amba na vhoṱhe vho mu vutshelaho a ri: “Naa ndi inwi vhane na fanela u lwela Baali? Naa u fanela u tshidzwa nga inwi? Ane a mu lwela u fanela u vhulawa ṋamusi.+ Arali e mudzimu, mu litsheni a ḓi lwele,+ samusi ho thuthwa aḽeṱare yawe.” 32 Nga ḽeneḽo ḓuvha a ri Gidioni u pfi Yerubaali,* a ri: “Litshani Baali ene muṋe a ḓilwele, samusi ho thuthwa aḽeṱare yawe.”
33 Vhamidiani+ vhoṱhe, Vhaamaleke+ na vhathu vha Vhubvaḓuvha vha kuvhangana,+ vha wela* Govhani ḽa Yeseriele, vha atha madennde. 34 Muya wa Yehova wa ḓa kha Gidioni+ a lidza luṋanga,+ Vhaabiesere+ vha mu sala murahu. 35 A rumela vhaḓinḓa kha ḽoṱhe ḽa Manase, na vhone vha mu sala murahu. A dovha a rumela vhaḓinḓa kha Ashere, Sebuloni na Nafutali, vha ḓa vha mu ṱanganedza.
36 Gidioni a amba na Mudzimu wa ngoho a ri: “Arali u tshi khou shumisa nṋe u itela u tshidza Isiraele, sa zwe wa fhulufhedzisa,+ 37 ndi khou adza nguvho ya mamvele fhethu hune ha fhefherwa hone.* Arali ṅwando wa wela kha nguvho, fhedzi fhasi ho oma, ndi ḓo ḓivha uri u ḓo shumisa nṋe u tshidza Isiraele, sa zwe wa fhulufhedzisa.” 38 Zwenezwo zwa itea. Musi a tshi vuwa nga matsheloni-tsheloni a ḓuvha ḽi tevhelaho, a hamula ṅwando kha yeneyo nguvho yo itwaho nga mamvele une wa nga ḓadza tshigoḓelo tshihulwane nga maḓi. 39 Naho zwo ralo, Gidioni a amba na Mudzimu wa ngoho a ri: “U songo ntsinyutshela, ntendele ndi dovhe ndi u vhudzise. Ndi khou humbela uri u nnditshe ndi dovhe ndi ite muṅwe mulingo nga nguvho ya mamvele. Ndi khou humbela uri nguvho ya mamvele i sale yo oma, ngeno fhasi ho ṋukala.” 40 Zwenezwo ndi zwe Mudzimu a zwi ita nga honoho vhusiku; ndi nguvho fhedzi ye ya vha yo oma, mavu oṱhe e na ṅwando.