Daniele
9 Nga ṅwaha wa u thoma musi hu tshi khou vhusa Dario+ murwa wa Ahasiverosi wa lushaka lwa Vhameda we a vha o itwa khosi muvhusoni wa Vhakaladea,+ 2 nga ṅwaha wawe wa u thoma wa u vhusa, nṋe Daniele ndo ṱhogomela dzibuguni* zwe Yehova a amba a tshi vhudza muporofita Yeremia uri hu ḓo fhela miṅwaha ya 70+ Yerusalema wo tshinyadzwa.+ 3 Nda lavhelesa Yehova Mudzimu wa ngoho, nda mu humbela nga thabelo, nda ḓidzima zwiḽiwa,+ nda ambara madzanganda, nda ḓishela nga miḽora. 4 Nda rabela Yehova Mudzimu wanga na u ḓibula zwivhi, nda ri:
“Iwe Yehova Mudzimu wa ngoho, ane a vha muhulwane na A ofhisaho, ane a sa pfuke mulanga wawe, ane a sumbedza lufuno lu sa shanduki+ vhane vha mu funa na u tevhedza milayo yawe,+ 5 ro tshinya, ro u khakhela, ro ita zwo vhifhaho na u u shandukela;+ ri si tevhedze milayo yau na nḓila ine wa haṱula ngayo. 6 A ro ngo thetshelesa vhashumeli vhau vha vhaporofita,+ vhe vha amba nga dzina ḽau kha mahosi ashu, vhakololo vhashu, vhomakhulukuku washu na vhathu vhoṱhe vha shango ḽashu. 7 Iwe Yehova wo luga, fhedzi riṋe ro shona sa zwine zwa vha zwone ṋamusi, na vhathu vha Yuda, vhathu vha Yerusalema na vhathu vhoṱhe vha Isiraele vhane vha vha tsini na vhane vha vha kule, vha re kha mashango oṱhe e wa vha balanganyela khao, ngauri a vho ngo fhulufhedzea kha iwe.+
8 “Iwe Yehova, riṋe na mahosi ashu, vhakololo vhashu na vhomakhulukuku washu ro shona, ngauri ro u khakhela. 9 Iwe Yehova Mudzimu washu u a khathutshela na u hangwela+ naho ro u shandukela.+ 10 A ro ngo thetshelesa zwe Yehova Mudzimu washu a amba, a ro ngo tevhedza milayo yawe ye a ri ṋea yone a tshi shumisa vhashumeli vhawe vha vhaporofita.+ 11 Vhaisiraele vhoṱhe vho pfuka Mulayo wau na u u shandukela nga u sa thetshelesa zwe wa amba, wa ri ḓisela khombo ye ya ṅwaliwa kha Mulayo wa Mushe mushumeli wa Mudzimu wa ngoho,+ ngauri ro U khakhela. 12 O ita zwe a amba kha riṋe+ na kha vhavhusi vhashu,* nga u ri ḓisela khombo khulu i sa athu u vhuya ya vha hone huṅwe nga nnḓa ha Yerusalema.+ 13 Ro welwa nga yeneyo khombo yoṱhe samusi zwo ṅwaliwa kha Mulayo wa Mushe,+ fhedzi a ro ngo humbela Yehova Mudzimu washu uri a ri khathutshele ngauri a ro ngo ṱutshela vhukhakhi hashu+ na u sumbedza u pfesesa ngoho yau.
14 “Yehova o bvela phanda a tshi ri lavhelesa, a ri ḓisela maṱungu, ngauri mishumo yoṱhe ye Yehova Mudzimu washu a i ita yo luga, naho zwo ralo, a ro ngo thetshelesa zwe a amba.+
15 “Iwe Yehova Mudzimu washu, Iwe we wa bvisa vhathu vhau shangoni ḽa Egipita nga tshanḓa tsha maanḓa,+ wa ḓiitela dzina u swika na ṋamusi,+ ro khakha na u ita zwo vhifhaho. 16 Iwe Yehova, ane a dzula a tshi ita zwo lugaho,+ ri humbela uri u litshe u sinyutshela muḓi wau wa Yerusalema une wa vha thavha khethwa yau; Yerusalema na vhathu vhau vha khou nyadziwa nga vhoṱhe vho ri tangaho nga nṱhani ha zwivhi zwashu na vhukhakhi ha vhomakhulukuku washu.+ 17 Iwe Mudzimu washu, thetshelesa thabelo ya mushumeli wau na khumbelo dzawe, u sumbedze vhuthu fhethu hau hukhethwa+ ho tshinyadzwaho,+ u tshi itela iwe muṋe, Iwe Yehova. 18 Iwe Mudzimu wanga, thetshelesa, u pfe! Vula maṱo au u vhone muḓi washu wo tshinyadzwaho une wa vhidzwa nga dzina ḽau; ngauri a ri khou humbela nga nṱhani ha mishumo yashu yo lugaho, fhedzi ndi nga nṱhani ha u khathutshela hau huhulu.+ 19 Iwe Yehova, ri thetshelese. Iwe Yehova, ri hangwele.+ Iwe Yehova, ri thuse! Iwe Mudzimu wanga, u songo lenga, u tshi itela iwe muṋe, ngauri muḓi wau na vhathu vhau vha vhidzwa nga dzina ḽau.”+
20 Musi ndi tshi kha ḓi amba, u rabela na u bula zwivhi zwanga na zwa vhathu vhanga vha Isiraele na u humbela uri Yehova Mudzimu wanga a sumbedze vhuthu kha thavha khethwa yawe,+ 21 ndi tshi kha ḓi rabela, Gabriele+ we nda mu vhona kha bono+ ḽo fhiraho, a ḓa kha nṋe musi ndo neta nga maanḓa hu nga mathabama nga tshifhinga tsha u ṋea zwifhiwa. 22 A ita uri ndi pfesese, musi a tshi ri:
“Iwe Daniele, ndo ḓa u ita uri u ṱalukanye na u pfesesa. 23 Musi u tshi tou thoma u rabela, ndo wana mulaedza, ndo u ḓisela wone, ngauri u munna a funwaho.*+ Thetshelesa enea mafhungo, u pfesese ḽeneḽi bono.
24 “Hu na vhege* dza 70 dzo vhetshelwaho vhathu vhau na muḓi wau mukhethwa,+ uri hu fheliswe vhukhakhi, zwivhi,+ u pfumelela vhukhakhi+ na u ḓisa zwivhuya lwa tshoṱhe,+ u khwaṱhisedza bono na vhuporofita*+ na u ḓodza fhethu Hukhethwa-khethwa. 25 U fanela u ḓivha na u pfesesa uri musi ho no ambiwa uri muḓi wa Yerusalema u ḓo fhaṱululwa na u vusuluswa,+ hu ḓo thoma ha fhela vhege dza 7 na vhege dza 62+ u swikela Messia*+ Murangaphanḓa+ a tshi ḓa. Muḓi wa Yerusalema u ḓo fhaṱululwa na u vusuluswa, wa vha na khoro na maḓi o u tangaho, fhedzi zwi ḓo itea zwifhingani zwi konḓaho.
26 “Nga murahu ha vhege dza 62, Messia u ḓo vhulawa,+ hu si sale na tshithu na tshithihi tshawe.+
“Vhathu vha murangaphanḓa ane a khou ḓa vha ḓo fhelisa muḓi na fhethu hukhethwa.+ Wa tou nga wo kumbiwa nga maḓi mahulu. Hu ḓo dzula hu na nndwa u swika vhufheloni; Mudzimu o dzudzanya uri hu ḓo vha na u fheliswa.+
27 “Ha nga vunḓi mulanga u swikela vhege nthihi i tshi fhela a tshi itela vhanzhi; u ḓo ita uri tshiṱhavhelo na zwifhiwa zwi fheliswe musi yeneyo vhege i vhukati.*+
“Kha phapha dza zwithu zwi nengisaho hu ḓo vha hu na ane a tshinyadza;+ zwo dzudzanywaho zwi ḓo shululelwa na o tshinyadzwaho u swikela hu si tshee na tshithu.”