Bugu Ya U Thoma Ya Samuele

15 Samuele a amba na Saulo a ri: “Yehova o nthuma uri ndi u ḓodze u vhe khosi ya vhathu vhawe vha Isiraele;+ zwino thetshelesa zwine Yehova a zwi amba.+ 2 Zwe Yehova wa mavhuthu a zwi amba ndi hezwi: ‘Ndi ḓo lifhedza Vhaamaleke zwe vha ita Vhaisiraele musi vha tshi lwa navho vha tshi bva Egipita.+ 3 Zwino i ya u vhulaye Vhaamaleke,+ u vha fhelise+ na zwoṱhe zwine vha vha nazwo. U songo vha litsha; u vhulaye+ vhanna khathihi na vhafumakadzi, vhana na dzitshetshe, mboho na nngu, gamela na donngi.’”+ 4 Nga zwenezwo, Saulo a kuvhanganya vhathu a vha vhala ngei Thelaimi: Ho vha hu na maswole a 200 000 na vhanna vha 10 000 vha Yuda.+

5 Saulo a swika muḓini wa Vhaamaleke a vha lalela govhani.* 6 Nga tshenetsho tshifhinga Saulo a amba na Vhakeni a ri:+ “Ibvani vhukati ha Vhaamaleke uri ndi sa ḓo ni fhelisa navho.+ Ngauri no sumbedza vhathu vhoṱhe vha Isiraele lufuno lu sa shanduki+ tshifhingani tsha musi vha tshi bva Egipita.” Ngauralo, Vhakeni vha bva vhukati ha Vhaamaleke. 7 Nga murahu ha zwenezwo, Saulo a vhulaya Vhaamaleke+ u bva Havila+ u swika Shuru,+ hune ha vha tsini na Egipita. 8 A fara Agagi+ khosi ya Vhaamaleke a si mu vhulaye, fhedzi vhaṅwe vhathu vhoṱhe a vha vhulaya nga banga.+ 9 Naho zwo ralo, Saulo na maswole vha litsha u vhulaya* Agagi na sambi ḽavhuḓi, kholomo, zwifuwo zwo nonaho, thutha na zwoṱhe zwe zwa vha zwi zwavhuḓi.+ Vho vha vha sa ṱoḓi u zwi vhulaya. Fhedzi thundu yoṱhe ye ya vha i si ya ndeme, i sa ṱoḓei vha i fhelisa.

10 Yehova a amba na Samuele a ri: 11 “Ndi a ḓisola* uri ndo vhetshela mini Saulo uri a vhe khosi, ngauri o ntshandukela, ho ngo ita zwe nda mu vhudza zwone.”+ Zwenezwo zwa tsikeledza Samuele, a lilela Yehova vhusiku hoṱhe.+ 12 Samuele a vuwa nga matsheloni-tsheloni uri a ṱanganedze Saulo. Fhedzi Samuele a vhudzwa uri: “Saulo o swika Karamele,+ a ḓifhaṱela tshihumbudzi henefho.+ A rembuluwa a tsela Giligala.” 13 Musi Samuele a tshi swika khae, Saulo a amba nae a ri: “Ngavhe Yehova a tshi u fhaṱutshedza. Ndo ita zwe Yehova a mmbudza zwone.” 14 Fhedzi Samuele a ri: “Zwino iyi phosho ya zwifuwo zwine nda khou zwi pfa zwi tshi khou lila ndi ya mini?”+ 15 Saulo a fhindula a ri: “Zwi bva kha Vhaamaleke, ngauri vhathu a vho ngo vhulaya* zwifuwo zwavhuḓi uri vha itele ngazwo Yehova Mudzimu wau zwiṱhavhelo; fhedzi zwo salaho ro zwi fhelisa.” 16 Samuele a amba na Saulo a ri: “Fhumula ndi u vhudze zwe Yehova a mmbudza zwone madekwe.”+ Saulo a ri: “Amba!”

17 Samuele a bvela phanḓa a ri: “Naa iwe wo vha u sa ḓivhoni u si wa ndeme+ musi u tshi itwa murangaphanḓa wa tshaka dza Isiraele na musi Yehova a tshi u ḓodza uri u vhe khosi kha ḽa Isiraele?+ 18 Nga murahu Yehova o u ruma a ri: ‘Iya u fhelise Vhaamaleke vhane vha vha vhaitazwivhi.+ U lwe navho u swika u tshi vha fhelisa.’+ 19 Ndi ngani u songo thetshelesa zwe Yehova a amba? Wo gidimela u kumba zwe wa thuba,+ wa ita zwi sa takadzi Yehova.”

20 Naho zwo ralo, Saulo a amba na Samuele a ri: “Fhedzi ndo thetshelesa zwe Yehova a amba! Ndo ita mushumo we Yehova a nthumela wone, ndo vhuya na Agagi khosi ya Amaleke, ndo fhelisa Vhaamaleke.+ 21 Fhedzi vhathu vha dzhia nngu na kholomo kha zwe vha thuba, zwe zwa vha zwi zwavhuḓi u fhira zwe zwa vhulawa uri vha itele Yehova Mudzimu wau zwiṱhavhelo ngei Giligala.”+

22 Samuele a ri: “Naa u ri Yehova a nga takalela zwifhiwa zwa u fhiswa na zwiṱhavhelo+ u fhira u thetshelesa zwine Yehova a amba? U pfa hu fhira tshiṱhavhelo,+ u thetshelesa hu fhira mapfura+ a thutha; 23 ngauri vhuravhele+ vhu fana na u ita tshivhi nga u bvumba,+ u ḓihudza hu fana na u shumisa zwa manditi na midzimu ya zwifanyiso.* Ngauri a wo ngo tevhedza zwe Yehova a amba,+ na ene u ḓo u laṱa u si tsha vha khosi.”+

24 Saulo a amba na Samuele a ri: “Ndo khakha, ndo pfuka ndaela ya Yehova na zwe wa amba, ngauri ndo vha ndi tshi khou ofha vhathu, nda thetshelesa zwe vha amba. 25 Zwino ndi khou humbela uri u nkhangwele tshivhi tshanga u humele na nṋe murahu uri ndi kone u gwadamela Yehova.”+ 26 Fhedzi Samuele a amba na Saulo a ri: “Ndi nga si humele na iwe murahu, ngauri a wo ngo tevhedza zwe Yehova a amba, Yehova o u laṱa uri u si tsha bvela phanḓa u khosi kha ḽa Isiraele.”+ 27 Musi Samuele a tshi rembuluwa uri a ṱuwe, Saulo a mu fara nga lupendelo lwa tshiambaro tshawe tshi si na zwanḓa, fhedzi tsha kheruwa. 28 Samuele a amba nae a ri: “Yehova o u dzhiela vhuhosi kha ḽa Isiraele ṋamusi, u ḓo vhu ṋea muṅwe muthu ane a vha khwine u fhira iwe.+ 29 Zwiṅwe hafhu, Mudzimu wa Vhugala wa Isiraele+ a nga si zwifhe+ kana u shandula muhumbulo wawe,* ngauri Ha sokou vha muthu zwawe ane a shandula muhumbulo wawe.”*+

30 Saulo a ri: “Ndo khakha. Zwino ndi khou humbela uri u nkhulise phanḓa ha vhahulwane vha vhathu vhanga na phanḓa ha Vhaisiraele. Huma na nṋe, ndi ḓo gwadamela Yehova Mudzimu wau.”+ 31 Ngauralo, Samuele a humela murahu na Saulo, Saulo a gwadamela Yehova. 32 Nga murahu ha zwenezwo Samuele a ri: “Ḓisani Agagi khosi ya Vhaamaleke ngeno.” Agagi a ya khae a tshi khou timatima,* fhedzi mbiluni yawe o vha a tshi khou ri: “A thi tsha ofha uri ndi ḓo vhulawa.” 33 Naho zwo ralo, Samuele a ri: “Samusi banga ḽau ḽo ita uri vhafumakadzi vha sale vha si na vhana, na mme au u ḓo sala a si na ṅwana u fana na vhaṅwe vhafumakadzi.” Samuele a remekanya Agagi phanḓa ha Yehova ngei Giligala.+

34 Samuele a ya Rama, Saulo a ya nḓuni yawe ngei Gibia. 35 Samuele a ṱuwa a lilela Saulo, ho ngo tsha dovha a vhona Saulo u swika a tshi fa.+ Yehova a ḓisola uri o vhetshela mini Saulo uri a vhe khosi kha ḽa Isiraele.+