Bugu Ya U Thoma Ya Dzikhosi

3 Salomo o vha e mukwasha wa Farao khosi ya Egipita. O vhinga* ṅwananyana wa Farao,+ a mu ḓisa Muḓini wa Davida+ u swika a tshi fhedza nnḓu yawe,+ nnḓu ya Yehova+ na luvhondo u mona na Yerusalema.+ 2 Fhedzi vhathu vho vha vha tshi kha ḓi ṋekedza zwiṱhavhelo fhethu ha vhurabeli,+ ngauri nga tshenetsho tshifhinga dzina ḽa Yehova ḽo vha ḽi sa athu u fhaṱelwa nnḓu.+ 3 Salomo o bvela phanḓa a tshi funa Yehova nga u tevhedza milayo ya Davida khotsi awe, o vha a tshi ṋekedza zwiṱhavhelo na zwifhiwa fhethu ha vhurabeli.+

4 Khosi ya ya Gibeoni u itela u ṋekedza zwiṱhavhelo henefho, ngauri henefho fhethu ha vhurabeli ho vha hu huhulu.+ Salomo a ṋekedza zwiṱhavhelo zwa 1 000 zwa u fhiswa henefho aḽeṱareni.+ 5 Henefho Gibeoni Yehova o ḓivhonadza vhusiku kha Salomo nga muḽoro; Mudzimu a ri: “Nkhumbele tshine wa ṱoḓa ndi tshi u ṋea tshone.”+ 6 Salomo a ri: “Wo sumbedza Davida khotsi anga lufuno luhulu lu sa shanduki, musi a tshi fhulufhedzea na u ita zwo lugaho. Wo bvela phanḓa u tshi mu sumbedza lwonolwo lufuno luhulu lu sa shanduki u swika na ṋamusi nga u mu ṋea murwa uri a dzule kha khuluṋoni yawe.+ 7 Iwe Yehova Mudzimu wanga wo vhea nṋe mushumeli wau uri ndi vhe khosi vhudzuloni ha Davida khotsi anga, naho ndi tshi kha ḓi vha muswa,* ndi si na tshenzhelo.+ 8 Mushumeli wau ndi muṅwe wa vhathu vhe wa vha nanga,+ vhane vha vha vhathu vhanzhi vha sa vhalei. 9 Ṋea mushumeli wau mbilu i konaho u thetshelesa uri a kone u haṱula vhathu vhau,+ u ṱalukanya zwivhuya na zwivhi,+ ngauri ndi nnyi ane a nga kona u haṱula vhenevha vhathu vhau vhanzhi-vhanzhi nga u rali?”

10 Yehova a takadzwa nga zwe Salomo a humbela zwone.+ 11 Mudzimu a amba nae a ri: “Ngauri wo humbela zwenezwo, a wo ngo humbela u lalama kana lupfumo kana uri maswina au a fe, fhedzi wo humbela uri u kone u pfesesa musi u tshi pfa mafhungo a khaṱhulo,+ 12 ndi ḓo ita zwe wa humbela.+ Ndi ḓo u ṋea vhuṱali na ṱhalukanyo,+ zwine ha sa athu u vha na muthu na muthihi we a vhuya a vha nazwo, a hu nga ḓo vhuya ha vha na ane a ḓo dovha a vha nazwo.+ 13 Zwiṅwe hafhu, ndi ḓo u ṋea na zwe wa si humbele+ zwine zwa vha lupfumo na vhugala+ uri hu si vhe na iṅwe khosi ine ya nga iwe vhutshiloni hau hoṱhe.*+ 14 Arali wa tshimbila nḓilani dzanga nga u tevhedza maitele anga na ndaela dzanga u fana na Davida khotsi au,+ na iwe ndi ḓo ita uri u lalame.”*+

15 Musi Salomo a tshi karuwa, a zwi ṱhogomela uri o vha a tshi khou ḽora. A ya Yerusalema a ima phanḓa ha mbulungelo ya mulanga wa Yehova a ṋekedza zwiṱhavhelo zwa u fhiswa na zwifhiwa zwa u pfumedzana,+ a itela vhashumeli vhawe vhoṱhe tshimima.

16 Nga tshenetsho tshifhinga, vhafumakadzi vhavhili vha rengisaho muvhili vha ya kha khosi, vha ima phanḓa hayo. 17 Mufumakadzi wa u thoma a ri: “Thovhela, nṋe na hoyu mufumakadzi ri dzula nḓuni nthihi, musi ndi tshi beba o vha e henefho nḓuni. 18 Nga ḓuvha ḽa vhuraru musi ndo no beba, na onoyu mufumakadzi a beba. Ro vha ri tshi dzula roṱhe henefho nḓuni; ho vha hu si na muṅwe muthu, ro vha ri vhavhili fhedzi. 19 Vhuṅwe vhusiku murwa wa hoyu mufumakadzi a fa, ngauri o eḓela nṱha hawe. 20 A vuwa vhukati ha vhusiku a dzhia murwa wanga we a vha e tsini hanga musi nṋe phuli yau ya mufumakadzi ndo eḓela, a mu eḓedza zwanḓani zwawe; a dzhia murwa wawe o faho a mu eḓedza zwanḓani zwanga. 21 Musi ndi tshi vuwa nga matsheloni uri ndi mamise murwa wanga, nda wana o fa. Musi ndi tshi mu lavhelesa zwavhuḓi nda vhona uri a si murwa wanga we nda mu beba.” 22 Fhedzi muṅwe mufumakadzi a ri: “Aiwa, murwa wanga ndi hoyu ane a khou tshila, wau ndi hoyu o faho.” Fhedzi mufumakadzi wa u thoma a ri: “A si zwone, murwa wau ndi hoyu o faho, murwa wanga ndi hoyo ane a khou tshila.” Vha hanedzana nga u ralo phanḓa ha khosi.

23 Khosi ya ri: “Muṅwe u ri, ‘Murwa ane a khou tshila ndi wanga, murwa o faho ndi wau!’ Muṅwe a ri: ‘A si zwone, murwa o faho ndi wau, ane a khou tshila ndi wanga!’” 24 Khosi ya ri: “Nḓiseleni banga.” Vha ḓisa banga ha khosi. 25 Khosi ya ri: “Fhandulani ṅwana a tshilaho nga vhukati, mufumakadzi muṅwe na muṅwe ni mu ṋee tshipiḓa.” 26 Nga khathihi fhedzi mufumakadzi we murwa wawe a vha a tshi khou tshila a amba na khosi, nga⁠uri o vha a tshi khou pfela murwa wawe vhuṱungu. A ri: “Yowee, thovhela! Mu ṋee uyo ṅwana ane a khou tshila! U songo mu vhulaya!” Fhedzi uḽa muṅwe mufumakadzi a ri: “A songo vha wanga kana wau! Nga a fhandulwe nga vhukati!” 27 Khosi i tshi pfa zwenezwo ya ri: “Ṋeani mufumakadzi wa u thoma ṅwana a tshilaho! Ni songo mu vhulaya, ndi ene mme a ṅwana.”

28 Vhaisiraele vhoṱhe vha pfa nga ha khaṱhulo ya khosi, vha ofha khosi,+ nge vha vhona i na vhuṱali vhu bvaho ha Mudzimu ha u haṱula nga nḓila yo teaho.+