Ekisoda

2 Nga tshenetsho tshifhinga, muṅwe munna wa nnḓu ya Levi a vhinga ṅwananyana wa Levi.+ 2 Onoyo mufumakadzi a vhifha muvhilini a beba ṅwana wa mutukana. Musi a tshi vhona ṅwana o naka, a mu dzumba miṅwedzi miraru.+ 3 Musi a si tsha kona u mu dzumba,+ a dzhia manngi* wo itwaho nga muṱaṱe a ḓodza zwithu zwi ngaho tshigonṱiri a dzhenisa ṅwana nga ngomu, a u vhea vhukati ha dziṱhanga tsini ha philiphili ya Mulambo wa Nili. 4 Fhedzi khaladzi+ a ṅwana o vha o imela kule u itela u vhona zwe zwa vha zwi tshi ḓo bvelela khae.

5 Musi ṅwananyana wa Farao a tshi khou ḓa u ṱamba Mulamboni wa Nili, vhaḓinḓa vhawe vha vhafumakadzi vho vha vha tshi khou tshimbila nga thungo ha mulambo. A vhona manngi u vhukati ha dziṱhanga. A ruma phuli yawe ya mufumakadzi nga u ṱavhanya uri i ye i u dzhie.+ 6 Musi a tshi vula manngi a vhona ṅwana wa mutukana a tshi khou lila. A mu pfela vhuṱungu, a ri: “Hoyu ndi muṅwe wa vhana vha Vhahevheru.” 7 Khaladzi awe a amba na ṅwananyana wa Farao a ri: “Naa ndi nga ya nda u vhidzela mufumakadzi a mamisaho kha vhafumakadzi vha Vhahevheru uri a u mamisele ṅwana?” 8 Ṅwananyana wa Farao a amba nae a ri: “Tshimbila!” Musidzana a ya a vhidza mme+ a ṅwana nga u ṱavhanya. 9 Ṅwananyana wa Farao a amba nae a ri: “Dzhia hoyu ṅwana u ṱuwe nae u mmamisele ene, ndi ḓo u holela.” Onoyo mufumakadzi a ṱuwa na ṅwana, a mu mamisa. 10 Musi ṅwana a tshi aluwa, a mu isa kha ṅwananyana+ wa Farao, a vha murwa wawe. A mu ira dzina ḽa Mushe,* a ri: “Ndi ngauri ndo mu ṋula maḓini.”+

11 Misini yeneyo Mushe o no aluwa,* a ya kha vhahawe u itela u vhona tshengelo ye vha vha vha tshi khou sedzana nayo;+ a vhona Muegipita a tshi khou rwa Muhevheru, muṅwe wa vhathu vhahawe. 12 A sedza thungo dzoṱhe a vhona hu si na muthu ane a khou mu vhona. A vhulaya Muegipita a mu dzumba muṱavhani.+

13 Fhedzi a bva nga ḓuvha ḽi tevhelaho, a vhona vhanna vhavhili vha Vhahevheru vha tshi khou lwa. A vhudzisa o levhaho a ri: “Ndi ngani u tshi rwa wahau?”+ 14 Ene a ri: “Ndi nnyi we a ri u muvhusi na muhaṱuli washu? Naa u khou ṱoḓa u mmbulaya samusi wo vhulaya uḽa Muegipita?”+ Mushe a tshuwa, a ambela mbiluni a ri: “Zwi tou vha khagala uri mafhungo a vho ḓivhea!”

15 Nga zwenezwo, Farao a zwi pfa, a lingedza u vhulaya Mushe; fhedzi Mushe a shavha phanḓa ha Farao a ya a dzula shangoni ḽa Midiani;+ a dzula tshisimani. 16 Huno tshifhe wa Midiani+ o vha e na vhananyana vha sumbe, vhenevho vhananyana vha ḓa u ka maḓi uri vha ḓadze mikungwa uri vha kone u nwisa sambi ḽa khotsi avho. 17 Sa nga misi ha ḓa vhalisa vha vha pandela. Musi Mushe a tshi vhona zwenezwo a takuwa a vha thusa,* a nwisa sambi ḽavho. 18 Musi vha tshi swika hayani ha khotsi avho Ruwele,*+ a vha vhudzisa o mangala a ri: “Ndi ngani ṋamusi no ṱavhanya u vhuya?” 19 Vha mu fhindula vha ri: “Muṅwe Muegipita+ o ri lamulela kha vhalisa, a ri kela maḓi a u nwisa sambi.” 20 A vhudzisa vhananyana vhawe a ri: “U ngafhi? No mu siela mini? Mu vhidzeni uri a ḓe a ḽe na riṋe.” 21 Mushe a tenda u dzula na onoyo munna, Ruwele a mu ṋea Tsipora+ ṅwananyana wawe uri a vhe mufumakadzi wawe. 22 Nga murahu a beba ṅwana wa mutukana, a mu ira dzina ḽa Gerisomi,*+ nge a ri: “Ndo vha mutsinda shangoni ḽi sili.”+

23 Musi ho no fhela miṅwaha minzhi khosi ya Egipita ya fa,+ fhedzi Vhaisiraele vha bvela phanḓa vha tshi khou shengela nga nṱhani ha vhupuli he vha vha vhe khaho, vha tshi khou lila nga u pfa vhuṱungu, tshililo tshavho tsha u ṱoḓa thuso kha vhupuli honoho tsha swika ha Mudzimu wa ngoho.+ 24 Nga u ya ha tshifhinga Mudzimu a pfa u gomela havho,+ a humbula mulanga we a u vhofha na Abrahamu, Isaka na Yakobo.+ 25 Ngauralo, Mudzimu a lavhelesa Vhaisiraele, Mudzimu a livhisa ṱhogomelo kha vhuimo havho.