Mishumo Ya Vhaapostola
10 Ngei Kesarea ho vha hu na muṅwe munna ane a pfi Koronelio muhulwane wa maswole,* maswole ane a vha kha tshigwada* tshine tsha pfi Italia. 2 O vha a tshi gwadamela Mudzimu na vha muṱa wawe woṱhe, a tshi ṋea vhathu zwifhiwa na u rabela Mudzimu tshifhinga tshoṱhe. 3 Nga awara i ṱoḓaho u vha ya vhuṱahe,*+ a vhona muruṅwa kha bono a tshi ri: “Koronelio!” 4 Koronelio a mu lavhelesa o tshuwa, a ri: “Murena, ndi mini?” Muruṅwa a ri: “Mudzimu o pfa thabelo dzau,+ o vhona na nḓila ine wa thusa ngayo vhashai. 5 Ruma vhanna ngei Yope uri vha ye u vhidza Simoni ane a pfi Petro. 6 Onoyo munna ndi mueni wa Simoni musuki wa mikumba ane nnḓu yawe ya vha tsini na lwanzhe.” 7 Nga u ṱavhanya musi muruṅwa we a amba nae a tshi tou ṱuwa, a vhidza vhashumeli vhawe vhavhili na swole ḽi ofhaho Mudzimu, 8 a vha vhudza zwoṱhe, a kona u vha ruma Yope.
9 Nga ḓuvha ḽi tevhelaho musi vhe nḓilani, vhe tsini na u swika muḓini, Petro a gonya ṱhangani ya nnḓu nga awara i ṱoḓaho u vha ya vhurathi* uri a rabele. 10 A farwa nga nḓala khulu, a tama zwiḽiwa. Musi vha tshi kha ḓi lugiselela zwiḽiwa, a vhona bono,+ 11 a vhona ḽiṱaḓulu ḽo vulea, hu tshi tsa tshithu tshi ngaho labi ḽihulu tsho farwa thungo dzoṱhe dzatsho nṋa; 12 nga ngomu ho vha hu na zwipuka zwi re na milenzhe miṋa, zwikokovhi zwa mifuda yoṱhe na zwiṋoni. 13 A pfa ipfi ḽi tshi ri: “Petro, takuwa u ṱhavhe u ḽe!” 14 Fhedzi Petro a ri: “Na khathihi Murena, ngauri a thi athu u ḽa tshithu tshi songo kunaho kana tshi re na tshika.”+ 15 Ha pfala ipfi lwa vhuvhili ḽi tshi ri: “Litsha uri zwithu zwo kunakiswaho nga Mudzimu zwi na tshika.” 16 Ha pfala ipfi lwa vhuraru, nga u ṱavhanya tshenetsho tshithu tshi ngaho labi ḽihulu tsha humiselwa ṱaḓulu.
17 Musi Petro a tshee o mangala uri bono ḽe a ḽi vhona ḽi nga vha ḽi tshi amba mini, vhaḽa vhanna vho rumiwaho nga Koronelio vha vhudzisa hune nnḓu ya Simoni ya vha hone, vha ima henefho khoroni.+ 18 Vha vhudzisa arali Petro a tshi khou dzula henefho. 19 Musi Petro a tshi kha ḓi elekanya nga ha bono, muya mukhethwa+ wa ri: “Hu na vhanna vhararu vhane vha khou u ṱoḓa. 20 Takuwa, u tsele kamarani ya fhasi u ṱuwe navho, u songo timatima ngauri ndi nṋe ndo vha rumaho.” 21 Petro a tsa a ya kha vhenevho vhanna, a ri: “Muthu ane na khou mu ṱoḓa ndi nṋe. Ndi ngani ni fhano?” 22 Vha ri: “Koronelio+ muhulwane wa maswole ndi munna o lugaho na a ofhaho Mudzimu, ane ha ambiwa zwavhuḓi nga hae nga lushaka lwoṱhe lwa Vhayuda. Mudzimu o ruma muruṅwa mukhethwa uri a vhudze Koronelio uri a u rambe nḓuni yawe u itela u pfa zwine wa ḓo zwi amba.” 23 Petro a ri vha dzhene nḓuni, vha vha vhaeni vhawe.
Nga matshelo a ṱuwa navho na vhaṅwe vhahawe vha bvaho Yope. 24 Nga ḓuvha ḽi tevhelaho a swika Kesarea. Koronelio o vha o vha lindela, o kuvhanganya mashaka awe na khonani dzawe dza tsini. 25 Musi Petro a tshi swika, Koronelio a mu ṱanganedza, a gwadama a mu losha. 26 Fhedzi Petro a mu takusa, a ri: “Takuwa; na nṋe ndi muthu.”+ 27 Petro a dzhena a tshi khou amba na Koronelio, a wana vhathu vhanzhi vho kuvhangana henefho. 28 A amba navho a ri: “Ni a zwi ḓivha uri a zwo ngo tendelwa uri Muyuda a konane kana u amba na muthu wa luṅwe lushaka.+ Naho zwo ralo, Mudzimu o ntsumbedza uri a tho ngo fanela u amba uri muṅwe muthu ho ngo kuna kana u na tshika.+ 29 Ndi ngazwo ndi songo hana musi ndi tshi vhidzwa. Nga zwenezwo, ndi ri no mmbidzela mini?”
30 Koronelio a ri: “Ho vha hu nga tshenetshi tshifhinga maḓuvha maṋa o fhiraho ndi tshi khou rabela nḓuni yanga nga awara ya vhuṱahe,* musi hu tshi bvelela munna o ambaraho zwiambaro zwi penyaho a ima phanḓa hanga 31 a ri: ‘Koronelio, Mudzimu o pfa thabelo dzau, o vhona na nḓila ine wa thusa ngayo vhashai. 32 Ruma vhathu uri vha ye ngei Yope u vhidza Simoni ane a pfi Petro. Onoyo munna ndi mueni nḓuni ya Simoni musuki wa mikumba, a dzulaho tsini na lwanzhe.’+ 33 Nda rumela vhathu nga u ṱavhanya uri vha u vhidze, wo ita zwone wa ḓa. Zwino roṱhe ro kuvhangana phanḓa ha Mudzimu uri ri pfe zwoṱhe zwe wa vhudzwa nga Yehova.”*
34 Petro a tshi pfa zwenezwo a ri: “Zwino ndi a zwi pfesesa ngangoho uri Mudzimu ha ṱaluli,+ 35 kha tshaka dzoṱhe ane a mu ofha, a ita zwo lugaho u a mu ṱanganedza.+ 36 Mudzimu o rumela Vhaisiraele mulaedza nga u vha ḓivhadza mafhungo maḓifha a mulalo+ une wa vha hone nga nṱhani ha Yesu Kristo, onoyo ndi Murena wa vhoṱhe.+ 37 Ni a ḓivha mafhungo e a ambiwa kha ḽoṱhe ḽa Yudea, u thoma Galilea,+ musi Yohane o no huwelela nga ha ndovhedzo: 38 nga ha Yesu we a vha a tshi bva Nazaretha, nga ha nḓila ye Mudzimu a mu ḓodza ngayo nga muya mukhethwa+ na u mu ṋea maanḓa, a tshimbila a tshi ita zwivhuya shangoni ḽoṱhe na u fhodza vhoṱhe vho tsikeledzwaho nga Diabolo,+ ngauri Mudzimu o vha e nae.+ 39 Zwino ri ṱhanzi dza zwoṱhe zwe a zwi ita shangoni ḽa Vhayuda na ngei Yerusalema; fhedzi vho mu vhulaya nga u mu ombela kha danda.* 40 Mudzimu o mu vusa nga ḓuvha ḽa vhuraru,+ a si tende a tshi vhonwa 41 nga vhathu vhoṱhe, fhedzi a tenda a tshi vhonwa nga ṱhanzi dze a dzula o dzi nanga, nga riṋe ro ḽaho na u nwa nae musi o no vuswa vhafuni.+ 42 Zwiṅwe hafhu, o ri laedza uri ri huwelele kha vhathu na u ṱanziela nga vhuḓalo+ uri onoyo ndi we a rumiwa nga Mudzimu uri a vhe muhaṱuli wa vha tshilaho na vho faho.+ 43 Vhaporofita vhoṱhe vho ṱanziela nga hae,+ uri ane a mu tenda u ḓo hangwelwa zwivhi dzinani ḽawe.”+
44 Musi Petro a tshi kha ḓi amba nga ha eneo mafhungo, vhoṱhe vho mu thetshelesaho vha wana muya mukhethwa.+ 45 Vhatendi* vho fumbiswaho vhe vha ḓa na Petro vha mangala, ngauri vhathu vha dziṅwe tshaka vho vha vho shululelwa tshifhiwa tsha muya mukhethwa. 46 Ngauri vho vha pfa vha tshi khou amba nga nyambo* dzo fhambanaho vha tshi khou renda Mudzimu.+ Petro a ri: 47 “Naa hu na ane a nga hana musi vhenevha vhathu vhe vha wana muya mukhethwa u fana na riṋe vha tshi lovhedzwa?”+ 48 A amba navho uri vha lovhedzwe dzinani ḽa Yesu Kristo.+ Vha mu humbela uri a dzule navho maḓuvhanyana.