Sakaria

14 “Hu khou ḓa ḓuvha, ndi ḓuvha ḽa Yehova, ḽine ngaḽo ha ḓo kovhekanywa thundu yau* u tshi zwi vhona. 2 Ndi ḓo kuvhanganya tshaka dzoṱhe dzine dza ḓo lwa na Yerusalema; wonoyo muḓi u ḓo thubiwa, ha dzhiiwa zwi re ngomu nḓuni, ha tzhipiwa na vhafumakadzi. Vhaṅwe vha vhadzulapo vha wonoyo muḓi vha ḓo iswa vhuthubwani, vho salaho vha ḓo dzula muḓini.

3 “Yehova u ḓo bva a lwa na dzenedzo tshaka+ samusi o lwa na maswina awe tshifhingani tsho fhiraho.+ 4 Nga ḽeneḽo ḓuvha, milenzhe yawe i ḓo ima nṱha ha Thavha ya Miṱwari,+ ine ya vha vhubvaḓuvha ha Yerusalema; Thavha ya Miṱwari i ḓo fhandulwa nga vhukati, u bva vhubvaḓuvha u swika vhukovhela,* zwa ita uri hu vhe na govha ḽihulu; iṅwe thavha i ḓo sudzulutshela devhula, iṅwe ya sudzulutshela tshipembe. 5 Ni ḓo shavhela govhani ḽa thavha dzanga, ngauri ḽeneḽo govha ḽi ḓo swika na Atsele. Ni ḓo tea u shavha, samusi no shavha nga nṱhani ha mudzinginyo we wa itea tshifhingani tsha Khosi Usia wa Yuda.+ Yehova Mudzimu wanga u ḓo ḓa e na vhakhethwa vhoṱhe.+

6 “Nga ḽeneḽo ḓuvha a hu nga vhi na tshedza,+ zwithu zwi ḓo rothola zwa vha gwada. 7 Ḽi ḓo ḓivhiwa sa ḓuvha ḽa Yehova.+ A ḽi nga vhi masiari kana vhusiku; nga madekwana hu ḓo vha hu na tshedza. 8 Nga ḽeneḽo ḓuvha, maḓi a vhutshilo+ a ḓo elela a tshi bva Yerusalema,+ maṅwe a ya vhubvaḓuvha ha lwanzhe,*+ maṅwe a ya vhukovhela ha lwanzhe.*+ Zwenezwi zwi ḓo itea tshilimo na vhuria. 9 Yehova u ḓo vha Khosi kha ḽifhasi ḽoṱhe.+ Nga ḽeneḽo ḓuvha, vhathu vhoṱhe vha ḓo gwadamela Yehova fhedzi.+ Vha renda dzina ḽawe fhedzi.+

10 “Shango ḽoṱhe ḽi ḓo fana na Araba,+ u bva Geba+ u swika Rimoni+ hune ha vha tshipembe ha Yerusalema; wonoyu muḓi u ḓo huliswa, vhathu vhawo vha ḓo dovha vha dzula fhethu havho,+ u bva Khoroni ya Benyamini+ u swika Khoroni ya u Thoma, u swika Khoroni ya Khonani, na u bva Mutsheṱoni wa Hananele+ u swika hune ha sukelwa hone nḓirivhe dza khosi. 11 Vhathu vha ḓo dovha vha dzula khawo; a vha tsha ḓo dovha vha haṱulelwa u tshinyadzwa,+ vha ḓo dzula Yerusalema vho tsireledzea.+

12 “Haya ndi malwadze ane Yehova a ḓo a ḓisela vhathu vhane vha lwa na Yerusalema:+ Lukanda lwavho lu ḓo sina vha tshi kha ḓi tshila, maṱo avho a sina, na ndimi dzavho dza sinela mulomoni.

13 “Nga ḽeneḽo ḓuvha, Yehova u ḓo ita uri vha ḓaḓe vhoṱhe; vha ḓo farana nga zwanḓa vha lwa nga tshavho.+ 14 Na Yuda u ḓo shela mulenzhe kha nndwa ya Yerusalema; lupfumo lwoṱhe lwa tshaka dza nga tsini lu ḓo kuvhanganywa, musuku, siḽiva na zwiambaro zwinzhi.+

15 “Bere, meila, gamela, donngi na zwifuwo zwoṱhe zwine zwa vha henefho, zwi ḓo farwa nga eneo malwadze.

16 “Vhoṱhe vho salaho kha tshaka dzoṱhe dzine dza khou lwa na Yerusalema, vha ḓo ya Yerusalema ṅwaha muṅwe na muṅwe+ u gwadamela* Khosi ine ya vha Yehova wa mavhuthu+ na u pembelela Vhuṱambo ha Mishasha.*+ 17 Arali kha miṱa ya ḽifhasi ha vha na ane a si ye Yerusalema u gwadamela Khosi ine ya vha Yehova wa mavhuthu, a vha nga niselwi mvula.+ 18 Arali vha muṱa wa Vhaegipita vha sa ya kha wonoyo muḓi, a vha nga niselwi mvula. Nṱhani hazwo, Yehova u ḓo vha ḓisela malwadze ane a ḓo a ḓisela dziṅwe tshaka dzine dza si ye u pembelela Vhuṱambo ha Mishasha. 19 Egipita na tshaka dzoṱhe dzi ḓo pfiswa vhuṱungu nga yeneyi nḓila nga nṱhani ha tshivhi tsha u sa ya u pembelela Vhuṱambo ha Mishasha.

20 “Ḓilogo dza bere dzi ḓo ṅwaliwa maipfi ane a ri ‘Vhukhethwa ndi ha Yehova!’+ nga ḽeneḽo ḓuvha. Bodo+ dzi re nḓuni ya Yehova dzi ḓo nga zwigoḓelo+ zwi re phanḓa ha aḽeṱare. 21 Bodo dzoṱhe dzi re Yerusalema na Yuda dzi ḓo vha khethwa, dzi ḓo vha dza Yehova wa mavhuthu, vhoṱhe vhane vha ṋekedza zwiṱhavhelo vha ḓo ḓa vha vhilisela ṋama kha dziṅwe dzadzo. Nga ḽeneḽo ḓuvha, a hu tsha ḓo vha na Mukanana* nḓuni ya Yehova wa mavhuthu.”+