Nzumbululo I Yaho Kha Yohane
17 Muṅwe wa vharuṅwa vha sumbe vho faraho zwigoḓelo zwa sumbe+ a ḓa kha nṋe a ri: “Iḓa ndi u sumbedze nḓila ine mufumakadzi ane a rengisa muvhili o dzulaho kha maḓi manzhi+ a ḓo haṱulwa ngayo, 2 onoyo o ḓifara luvhi nga zwa vhudzekani*+ na mahosi a ḽifhasi, o ita uri vhadzulapo vha ḽifhasi vha kambiwe nga waini yawe ine ya fanyisela u ḓifara hawe luvhi nga zwa vhudzekani.”*+
3 A nkhwala a nnyisa sogani a tshi shumisa muya mukhethwa. Nda vhona mufumakadzi o ṋamela tshivhanda tshitswuku-tswuku tsho ḓalaho madzina a maṱamba, tshi re na ṱhoho dza sumbe na ṋanga dza fumi. 4 Onoyo mufumakadzi o vha o ambara zwiambaro zwitswuku-tswuku na zwa phephulu,+ o ḓinakisa nga musuku, matombo a mutengo muhulu na vhulungu,+ o fara tshinwelo tsha musuku tsho ḓalaho zwithu zwi nengisaho na tshika dza u ḓifara hawe luvhi nga zwa vhudzekani.* 5 Kha phanḓa yawe ho vha ho ṅwaliwa dzina ḽa tshiphiri: “Babele Ḽihulu, mme a zwoṱhe zwi nengisaho zwa ḽifhasi+ na vha rengisaho muvhili.”+ 6 Nda vhona onoyo mufumakadzi o kambiwa nga malofha a vhakhethwa na nga malofha a ṱhanzi dza Yesu.+
Nda mangala zwihulu musi ndi tshi mu vhona. 7 Muruṅwa a ri: “Ndi ngani wo mangala? Ndi ḓo u vhudza tshiphiri tsha onoyo mufumakadzi+ na tsha tshivhanda tshi re na ṱhoho dza sumbe na ṋanga dza fumi+ tsho mu hwalaho: 8 Tshivhanda tshe wa tshi vhona, tshe tsha vha hone, tsha si tsha vha hone, tshi ḓo bva mugodini+ hu si kale, tsha fheliswa. Vhadzulapo vha ḽifhasi vhe madzina avho a si ṅwaliwe kha mupombo wa vhutshilo+ u bva tshee shango ḽa sikwa, vha ḓo mangala musi vha tshi vhona uri tshivhanda tshe tsha vha hone, tsha si tsha vha hone, tshi ḓo dovha tsha vha hone.
9 “Ṱhoho dza sumbe+ dzi imela thavha dza sumbe dze mufumakadzi a dzula nṱha hadzo. Zwenezwi zwi nga pfeseswa fhedzi nga o ṱalifhaho. 10 Hu na mahosi a sumbe: Ho fa maṱanu, hu kha ḓi vha na khosi nthihi, iṅwe a i athu u swika, fhedzi i ḓo vha hone lwa tshifhinganyana musi i tshi swika. 11 Khosi ya vhumalo ndi tshivhanda tshe tsha vha hone, tsha si tsha vha hone,+ tshi bva kha aḽa mahosi a sumbe, tshi ḓo fheliswa.
12 “Ṋanga dza fumi dze wa dzi vhona, dzi imela mahosi a fumi a sa athu u thomaho u vhusa, fhedzi a ḓo tendelwa u vhusa na tshivhanda awara nthihi. 13 Eneo mahosi a humbula zwi fanaho ndi ngazwo a tshi ṋea tshivhanda maanḓa ao na muvhuso wao. 14 A ḓo lwa na Ngwana,+ fhedzi i ḓo a kunda ngauri yeneyo Ngwana ndi Murena wa marena na Khosi ya mahosi.+ Zwiṅwe hafhu, vha re na vhuthihi na Ngwana, vho vhidzwaho, vho nangwaho na vha fhulufhedzeaho vha ḓo kunda.”+
15 Muruṅwa a ri: “Wo vhona mufumakadzi o dzulaho kha maḓi ane a rengisa muvhili, eneo maḓi a imela vhathu, gogo, dzitshaka na ndimi* dzo fhambanaho.+ 16 Tshivhanda+ tshe wa tshi vhona tshi re na ṋanga dza fumi,+ tshi ḓo vhenga onoyo mufumakadzi ane a rengisa muvhili,+ tsha mu bvula a sala e fhedzi, tsha ḽa ṋama yawe, tsha mu fhisa tshoṱhe nga mulilo.+ 17 Ngauri Mudzimu o ita uri vha humbule zwi fanaho uri vha kone u ita zwine a zwi ṱoḓa,+ nga u ita uri vha ṋee tshivhanda muvhuso wavho,+ u swikela zwe Mudzimu a zwi amba zwi tshi khunyelela. 18 Mufumakadzi+ we wa mu vhona, u imela muḓi muhulu une wa vhusa mahosi a ḽifhasi.”