Bugu Ya U Thoma Ya Dzikhosi

13 Mushumeli wa Mudzimu a ḓa Bethele a tshi bva Yuda o laedzwa nga Yehova,+ musi Yerobeamu o ima henefho aḽeṱareni+ uri a dubise zwiṱhavhelo. 2 Onoyo munna we a vha o rumiwa nga Yehova a vhidzelela aḽeṱare a ri: “Hee aḽeṱare, iwe aḽeṱare! Zwe Yehova a zwi amba ndi hezwi: ‘Hu ḓo bebwa murwa ane a pfi Yosia+ nḓuni ya Davida! U ḓo vhulaya vhotshifhe vha fhethu ha vhurabeli, vhane vha dubisa zwiṱhavhelo henefha kha iwe, a fhisa na marambo a vhathu henefha kha iwe.’”+ 3 Nga ḽeneḽo ḓuvha a ṋea tshiga* a ri: “Khetshi tshiga tshe wa ḓivhadzwa nga Yehova: Aḽeṱare i ḓo fhanduwa nga vhukati, miḽora* i re khayo i ḓo shuluwa.”

4 Musi Khosi Yerobeamu a tshi tou pfa zwe mushumeli wa Mudzimu wa ngoho a zwi amba nga ha aḽeṱare i re ngei Bethele, a imisa tshanḓa tshawe o ima henefho aḽeṱareni a ri: “Mu fareni!”+ A oma* tshanḓa tshe a vha o mu sumba ngatsho, a si tsha kona u tshi vhuyisela murahu.+ 5 Aḽeṱare ya fhanduwa, miḽora ya shuluwa kha aḽeṱare, u ya nga tshiga* tshe mushumeli wa Mudzimu a vha o ṋewa nga Yehova.

6 Khosi ya amba na mushumeli wa Mudzimu wa ngoho ya ri: “Nkhumbetshele pfarelo kha Yehova Mudzimu wau, u nthabelele uri tshanḓa tshanga tshi fhole.”+ Mushumeli wa Mudzimu wa ngoho a mu humbelela kha Yehova uri a mu farele, tshanḓa tsha khosi tsha fhola. 7 Khosi ya amba na mushumeli wa Mudzimu wa ngoho ya ri: “Iḓa ri ṱuwe roṱhe hayani u ḽe zwiḽiwa, ndi u ṋee tshifhiwa.” 8 Fhedzi mushumeli wa Mudzimu wa ngoho a amba na khosi a ri: “Naho wa nkovhela zwa muṱani wau nga vhukati a thi nga ṱuwi na iwe nda ḽa vhurotho na u nwa maḓi afha fhethu. 9 Ngauri Yehova o nndaedza a ri: ‘U songo ḽa vhurotho kana u nwa maḓi, u songo huma nga nḓila ye wa ḓa ngayo.’” 10 Nga⁠uralo, a huma nga iṅwe nḓila, a si tsha huma nga nḓila ye a ḓa ngayo Bethele.

11 Ho vha hu na muṅwe muporofita wa mukalaha we a vha a tshi dzula Bethele, vharwa vhawe vha vhuya hayani vha mu anetshela zwoṱhe zwe mushumeli wa Mudzimu a zwi ita Bethele nga ḽeneḽo ḓuvha na zwoṱhe zwe a vhudza khosi. Musi vho no anetshela khotsi avho, 12 khotsi avho a vha vhudzisa a ri: “O huma nga nḓila ifhio?” Vharwa vhawe vha mu sumbedza nḓila ye mushumeli wa Mudzimu wa ngoho a bvaho Yuda a ṱuwa ngayo. 13 A amba na vharwa vhawe a ri: “Vhofhelelani sale kha donngi yanga.” Vha vhofhelela sale kha donngi yawe, a i ṋamela.

14 A tevhela mushumeli wa Mudzimu wa ngoho, a mu wana o dzula fhasi ha muri muhulu. A amba nae a ri: “Naa ndi iwe mushumeli wa Mudzimu wa ngoho a bvaho Yuda?”+ Ene a ri: “Ndi nṋe.” 15 Muporofita wa mukalaha a ri: “Iḓa ri ṱuwe roṱhe hayani, ri ye u ḽa vhurotho.” 16 Fhedzi a ri: “Ndi nga si kone u huma na iwe kana u dzhena nḓuni yau kana u ḽa vhurotho kana u nwa maḓi na iwe afha fhethu. 17 Ngauri Yehova o mmbudza a ri: ‘U songo ḽa vhurotho kana u nwa maḓi henefho. U songo huma nga nḓila ye wa ḓa ngayo.’” 18 A amba nae a ri: “Na nṋe ndi muporofita u fana na iwe, muruṅwa o laedzwaho nga Yehova o mmbudza uri: ‘Humela nḓuni yau nae uri a ḽe vhurotho na u nwa maḓi.’” (O vha a tshi khou mu fhura.) 19 Ngauralo, a huma nae uri a ḽe vhurotho na u nwa maḓi nḓuni yawe.

20 Musi vho dzula ṱafulani, ipfi ḽa Yehova ḽa ḓela uyo muporofita wa mukalaha we a mu humisa, 21 a amba na mushumeli wa Mudzimu wa ngoho a bvaho Yuda, a ri: “Yehova o ri: ‘Ngauri wo shandukela ndaela ya Yehova, u si tevhedze ndaela ye Yehova Mudzimu wau a u ṋea yone, 22 fhedzi wa huma wa ḽa vhurotho na u nwa maḓi fhethu he wa vhudzwa uri: “U songo ḽa vhurotho kana u nwa maḓi,” tshitumbu tshau a tshi nga ḓo vhulungwa vhiḓani ḽa vhomakhulukuku wau.’”+

23 Musi o no ḽa vhurotho na u nwa, muporofita wa mukalaha a vhofha sale kha donngi ya muporofita we a mu humisa. 24 A ṱuwa, fhedzi a ṱangana na ndau nḓilani ya mu vhulaya.+ Tshitumbu tshawe tsha rambalala henefho nḓilani, donngi ya ima tsini natsho; na ndau yo vha yo ima tsini na tshitumbu. 25 Vhathu vha fhiraho nga henefho vha vhona tshitumbu tsho rambalala henefho nḓilani. Vha ḓa vha amba nga ha enea mafhungo muḓini we onoyo muporofita wa mukalaha a vha a tshi dzula hone.

26 Musi muporofita we a mu humisa lwendoni lwawe a tshi zwi pfa, a ri: “Ndi mushumeli wa Mudzimu wa ngoho we a shandukela ndaela ya Yehova;+ ngauralo Yehova o mu kumedzela ndau, ya mu zhongondedza ya mu vhulaya, u ya nga he Yehova a mu vhudza ngaho.”+ 27 A amba na vharwa vhawe a ri: “Vhofhelelani sale kha donngi yanga.” Vha i vhofhelela. 28 A ṱuwa, a wana tshitumbu tsho rambalala nḓilani, donngi na ndau zwo ima nga thungo ha tshitumbu. Ndau i songo ḽa tshitumbu kana u zhongondedza donngi. 29 Muporofita a hwala tshitumbu tsha mushumeli wa Mudzimu wa ngoho a tshi vhea kha donngi, a vhuya natsho muḓini wa hawe uri a mu lilele na u mu vhulunga. 30 A vhulunga tshitumbu vhiḓani ḽawe, a mu lilela a ri: “Yowee, murathu wanga!” 31 Musi o no mu vhulunga, a vhudza vharwa vhawe a ri: “Musi ndi tshi fa ni mmbulunge fhethu he ha vhulungwa mushumeli wa Mudzimu wa ngoho. Marambo anga ni a vhee tsini na marambo awe.+ 32 Ngauri zwe a vhudzwa nga Yehova uri a zwi vhidzelele aḽeṱareni i re ngei Bethele na nḓuni dzoṱhe dzi re fhethu ha vhurabeli+ ngei miḓini ya Samaria zwi ḓo itea.”+

33 Na nga murahu ha musi zwenezwi zwo no bvelela, Yerobeamu a si rembuluwe kha nḓila dzawe mmbi, a ḓi bvela phanḓa a tshi nanga vhotshifhe vha fhethu ha vhurabeli kha vhathu zwavho.+ O vha a tshi vhea ane a zwi takalela uri a vhe tshifhe, a tshi ri: “Nga a vhe muṅwe wa vhotshifhe vha fhethu ha vhurabeli.”+ 34 Tshenetsho tshivhi tshe tsha itwa nga vha muṱa wa Yerobeamu+ tsho ita uri vha fheliswe kha ḽifhasi.+